Matiyu 23

Isus Nafatagak sa sangay Tagfoyung Muisis at Suguwan

(Mar. 12:38-39; Lukas 11:43,46; 20:45-46)

1Ay Isus nafoyung sa sangay taw ay anggan sat ngay tagadal. 2Nalong te, “Ngay tagfoyung Muisis at Suguwan ay taw Parisiyu, kanya wan at tagfayamag Muisis at Suguwan. 3Ay nu katanya, faningi fagayu at longan ayu. Ay roro, lag gfaning at ngay fagbulun, anway kanya gfoyung way fagtvngvd ay wa gfaning at foyungan fiya fiya. 4Ka fag ngay tagfoyung nafamut way sik ngay longan laman ngay taw maning at longan. Ay at famamut kata way sik mabiyat fag ubanan. Madyay kanya oma tagfoyung wa kaumsig gtarabang nus di oma glangbud sumyu. 5Ay fagayu at fagbulun anway te, nanfalagan laman ngay taw luminggat anya. Kanya nafadaul at fagsuwadan Diyus at longan si at alfuyu.#23:5 fagsuwadan ... alfuyu: ngay fagsuwadan sirut, sanya at bilug ngay afud Diyus at longan, ngay taw Udyu at fagsiyukun si at alfuyu ay si at take. Ay manga nafaaba at buragawan si at fungfung balukas.#23:5 balukas: ngay taw Udyu gina gdarangin, gfasat alfuyu takata sik falefe at ke buragawan si at fungfung. 6Ay manga gina e fagmafulun at fakaumsigun si tuwas fagunaan fag faglunggungan. Ay manga at fakaumsigun si tuwa tiba tungud fag faglunggungan nus nganday nu ndasug fag bale fakafulan. 7Ay manga kaumsig dawdaw glo swa taw laman at nafablang anya fag taw, gngayan anya te, ‘Takamoyung.’ 8Ay am, lag kaumsig ay iba nu gngayan ayu te, ‘Takamoyung,’ teway sadi way ay Takamoyung. Ay am fagayu, sik dugsayan way am. 9Ay lag gfangayan sik taw ste swa daga te, ‘Mama,’ anway sadi way ay Tama tagsa tuwas banwa. 10Ay lag am kaumsig ay iba nu gngayan ayu te, ‘Em Fun,’ anway sadi way ay Fun. Aw tuwa ay Fun. 11Ay roro ngap nus nga sinu at tiba tungud sa ayu, kanya ay fanuguwan way. 12Ay sik taw nu gfandaragang way at longan ay anggan at fagbulun, bandi ban Diyus gfababa anya. Ay roro sik taw nu nafababaun tuwa at longan ay anggan at fagbulun, bandi ban Diyus gfaabat anya.”

Isus Kalimata sa sangay Taw Parisiyu ay sa sangay Tagfoyung Muisis at Suguwan

(Mar. 12:40; Lukas 11:39-52; 20:47)

13Ay e nanfauri ban ayu, am fag ngay tagfoyung Muisis at Suguwan, ay am fag ngay taw Parisiyu, sik ngay tagfanluk way am! Madyay gsalag way am at ngay taw laman wa kaful sas Diyus at fagmagurangan taw. Ay manga am sigon, wam umful, madyay igsalag yay am takaumsig nangaful.

14“Ay e nanfauri ban ayu, am fag ngay tagfoyung Muisis at Suguwan, ay am fag ngay taw Parisiyu. Sik ngay tagfanluk way am! Madyay gfamin way am burangday fag ngay mangena at fagagbilugun. Ay manga dewa gfalugo nu gdarangin am, sik famalagan way. Umdasug way ban sa ayu at taglabi fag faurianan.

15“Ay e nanfauri ban ayu, am fag ngay tagfoyung Muisis at Suguwan, ay am fag ngay taw Parisiyu. Sik ngay tagfanluk way am! Glo way am sa sangay talun ay gdife dagat dewa ro sadik taw at mafanud ayu. Ay ka fag taw nu nafanud wa ayu, glabi yay ban ayu at faurianan sas lino afuy anway sa ay nafoyungan anya. 16Ay e nanfauri ban ayu, am at yud glag fag ngay tagtaban ay iba! Igfoyung am te, ‘Sik taw nu gfatvngvd at longan sas Diyus bale, masine way dewa gyud gfagurungan. Ay roro nu gfatvngvd at longan sas gintu sanya sas Diyus bale, ani tuwa fagurungani.’ 17Am at yud glag, at yud mamatanganan fag ngay taw! Go inday at mafanud, gintu ay ate Diyus bale? Diyus bale, go kin? Ka fag gintu mafasamanan sas Diyus fagbulun. 18Ay gfoyung yangay am te, ‘Sik taw nu gfatvngvd at longan sas fagyagoan, masine way dewa gyud gfagurungan. Ay roro nu gfatvngvd at longan sas anyun tagsis fagyagoan, ani tuwa fagurungani.’ 19Am at yud glag! Go inday at mafanud, anyun ay ate fagyagoan tagfasine ka fag anyun? 20Nu katanya, sik taw nu gfatvngvd at longan sas fagyagoan, kanya gfatvngvd at longan sas fagyagoan ay fagayu sanya fagyagoan. 21Ay sik taw nu gfatvngvd at longan sas Diyus bale, kanya gfatvngvd at longan sas Diyus bale ay anggan sas Diyus, at tagbanwan sanya. 22Ay sik taw nu gfatvngvd at longan sas banwa, kanya gfatvngvd at longan sas Diyus at faglunggungan baliwa ay anggan sat malunggung sanya.

23“Ay e nanfauri ban ayu, am fag ngay tagfoyung Muisis at Suguwan, ay am fag ngay taw Parisiyu. Sik ngay tagfanluk way am! Dewa am gfon ay fasafuluwan kafud sas Diyus siginan ay nabul ay famayayum fakonun, kalyam way am at matvngvd fag ngay suguwan, anway te, wam gfagbulun at masine ay at matuyan sa ay iba, ay wam kafanyu ay iba, ay wa matuyan nu gelongan am sa ay iba. Nu gdi am kalyam at matvngvd fag ngay suguwan, dangai kalyam anggan at alay fag suguwan. 24Am at yud glag fag ngay tagtaban ay iba! Gtaga am at alay ayu sirut fag ngay inaut laman di e inaut si ay faginumun, ay roro ay fagtulunun sik kamelyu.

25“Ay e nanfauri ban ayu, am fag ngay tagfoyung Muisis at Suguwan, ay am fag ngay taw Parisiyu. Sik ngay tagfanluk way am! Dewa am nafegus ay faginuman fag taya at guyuy ay anggan ay fagfangonan fag taya at guyuy, ay roro sa ay basad mapnu way fagalabianun ay fakamilugun. 26Ay am at yud glag fag ngay taw Parisiyu. Fegusi yap ay faginuman fag taya at basad, laman anggan at basad ay anggan sit guyuy mafegusan tuwa.

27“Ay e nanfauri ban ayu, am fag ngay tagfoyung Muisis at Suguwan, ay am fag ngay taw Parisiyu. Sik ngay tagfanluk way am! Kata way am sik ngay faglibingan at mafalagsian dawdaw at ngaba tigyangan, ay masine nu kalag at tigyangan. Ay roro sa at basad at ngay kinkate way at ngay butul ay mafurat way ngap. 28Katanya yangay ay bilug. Sik taw nu glag ay bilug, masine dawdaw. Ay roro mangaro sa ay amatanganan tanan wa fagfanlukun ay fagmauriun.”

Tain ban at Faurianan sanya fag ngay Tagfanluk?

(Lukas 11:47-51)

29“Ay e nanfauri ban ayu, am fag ngay tagfoyung Muisis at Suguwan, ay am fag ngay taw Parisiyu. Sik ngay tagfanluk way am! Kawat way am ay gfasine Diyus at ngay taglong ay ngay matuyan fag ngay taw at faglibingan. 30Ay glong am te, ‘Dewa ro ami gleleg gina em ngay aguyangan gleleg, wa ro ami gtarabang anya gfate Diyus at ngay taglong.’ 31Nu katanya way ay longan, igfoyung wam te, ‘Ami, tagfate yangay ami Diyus at ngay taglong at kadagdagan.’ 32Nu katanya, anggan katsi ay fagbulun igfatunglus yay am ay aguyangan at asalanan! 33Kata way am sik ngay kubra! Wam e fangalfasan sas lino afuy. 34Nu katanya, sumugu akyay ban sa ayu ku ngay taglong, ay ku ngay mamatanganan fag taw, ay ku ngay tagfoyung. Ay gfate ban am at tiba. Ay tumuktuk ban am at tiba sas salibagan kayu. Ay malang ban am at tiba sa ay ngay bale fakafulan. Ay at tiba gsarap ban am sa sangay fulan laman nanfauri ban am. 35Anway katanya, umfaurianan ban fagayu at nafate sik taw at matuyan, siginans Abel ay anggan sas Sakariyas, at tama Barakiya. Kanya ebi ay nafate sisad Diyus bale ay at fagyagoan at buknga. 36At matuyan iglong aw ayu te, umsure wa ban fiya fagayu ku longan anggan sa katsi fag ngay taw.”

Isus At Longan sa sangay Taw Erusalem baliwa

(Lukas 13:34-35)

37“Am fag ngay taw Erusalem, am wan tagfalang batu ay tagfate Diyus at ngay taglong, at nasugu sa ayu. Ngayu ginan kyama gananfafulun ayu, kata sik fanginan nu gfaful at ngay riyangan sat daga fakfak, roro wam kaumsig nangaful sa angku. 38Ay katanya wayay, ay mubun wam ay bale. 39Anway nalong aw ayu te, siginan katsi wa ban am lumag angku yap ngay ban am lumong te, ‘Masine o, anway am fagindasugun am fagmadaragangun siginans Diyus.’ ”

Currently Selected:

Matiyu 23: TAWEAST

Highlight

Copy