Matiyu 10

Isus At Nasugu fag Labi Duwa at Ngayan

(Mar. 3:13-19; Lukas 6:12-16)

1Ay Isus nafaful at Nasugu fag Labi Duwa#10:1 Nasugu fag Labi Duwa: sis Grigu, labi duwak tagadal. ay nafon at fagmadaragangun laman mafaayan at ngay mafurat fag falad, ay laman mafafiya nus nge wain at taw daylan. 2Tuy Isus at Nasugu fag Labi Duwa at ngayan: taguna Simun (at sadi at ngayan, Pedru), ay at ariyan, Andres. Ay Sebidiyu at baguwama fag duwa, Santiagu, ay at ariyan, Uan. 3Ay Filipi, ay Bartulume, ay Tumas, ay Matiyu, sik taget buwis, ay Santiagu, Alfiu at baguwama, ay Tadyu, 4ay Simun (kanya ebi sik takamabo sis talun Ruma), ay Udas Iskaryute (kanya at nafoyung Isus sat mauri fag ngay taw).

Isus At Nasugu fag Labi Duwa at Fagbulun

(Mar. 6:7-13; Lukas 9:1-6)

5Gina Isus nasugu at Labi Duwa nalong yay te, “Lag am glo sas yud Udyu fag ngay taw at ngay fulan ay sa sangay taw Samarya at ngay fulan. 6Ay fagloan sai yakmans taw Israel, anway ka fag ngay taw kata way sik ngay tupa at malyaman. 7Ay foyungi sanya te, ‘Makbang wan Diyus nu gmagurang taw.’ 8Ay fafiyai at ke ngay daylan, ay falelegi at ngay kinkate, ay fafiyai at ke ngay mason fag daylan sit balat, ay ayani at ngay mafurat fag falad siginan sangay taw. Nafon aw sa ayu yud e fansali, nu katanya, foni yangay yud e fansali. 9Ay lag guba ay singku. 10Ay lag gambagan. Ay lag gfaduwa ay balukas. Ay lag gsinilasan. Ay lag gsuwanan sa ay ngaba dalan, anway sik taw tagfagbulun, e gfon wa fiya sa anya at fagayudanun.

11“Ay nus nganday fag fulan nu mdasug am, fangintoi yap sanya te, ‘Dada manga stiye at masine em fagnantiyugan fag bale?’ Ay nu e nafoyung tuwa ayu, sanyai wan nu gtiyug am, ginanya mandi fag lo. 12Ay nu nasakbo wam sasad bale, darangini at ngay taw tagbanwan sanya. 13Ay sanya fag bale at ngay taw nu kaumsig wa fiya gfasakbo ayu, darangini laman Diyus nanfanabayan anya. Ay nu dway kaumsig gfasakbo ayu, lag am gdarangin. 14Ay nus nga sinu sanya fag bale at taw at yud gfasakbo ayu ay anggan at yud kaumsig nandungugan ay foyungan, nu glo wam sanya ginan fag fulan, farikfiki yap at dafug siginan ay darafa, sik famasaful sanya fag taw te, e yud masine at kumgurungan ban sa anya. 15At matuyan iglong aw ayu te, gina ban Diyus nanfauri ngay taw, ka fag fulan amauri yap ban sas fulan Suduma ay Gumura at faurianan at fagdumalanun.”

E Nanfauri ban at ngay Tagafanud

(Mar. 13:9-13; Lukas 21:12-27)

16“Amatangani, gsugu akwa ayu kata sik ngay tupa sas wa idu talun. Ay am, matagakani tuwa kata sik ubyanun nu matagakan. Ay malukmei yangay katvngvd sik linatad nu malukme. 17Ay matagakani tuwa siginan tibak taw, anway kanya gumamat ban ayu ay tumaban ayu sa sangay fagfasinean fanlonganan fag bale, ay malang ban ayu sa at ngay bale fakafulan. 18Ay tumaban ayu sa sangay gubernadur ay sa sangay fun at akbang, teway gafanud am sa angku. Ay ginanya ban gfoyung am ku longan sanya fag ngay taw ay anggan sas yud Udyu fag ngay taw. 19Ay nu nataban ban ayu sas fagfasinean fanlonganan fag bale, lag am gafanawa te, tain ro siring ay famalus. Anway ginanya ro e moyung yay ro ayu sa ay amatanganan sik longan at matuyan, laman ro e foyungan tuwam anya. 20Ay bunwa am at tagelongan, antuwa ay Tama at Masine fag Falad.

21“Ay ginanya ban fag lungud, at fadugsay tumaban at fadugsay sa tiba, laman fate anya. Ay katanya yangay, at tama tumaban at unga sa tiba, laman fate anya. Ay anggan at ngay unga kamabo at magurang ay igfafate anya. 22Ay fagayu taw kalimata ayu, teway gafanud am sa angku. Ay roro ngap nus nga sinu at nasungatan anggan sas fakatabuwan fag ngay menit, umlangfe wa fiya. 23Ay sa sik fulan at taw nu gfauri way ban ayu, lagyui yap sa tibak fulan. Anway matuyan iglong aw ayu te, ya ban am gfafus talun Israel at ngay fulan, yap ngay aw, Taw at Baguwama, umdasug.

24“Sik tagadal wa glabi sa at takamoyung. Ay sik fanuguwan wa glabi sa at fun. 25Balikam sik tagadal nu katvngvd tuwa at takamoyung. Ay balikam sik fanuguwan nu katvngvd yangay at fun. Nu aw wa ngap daw ay Fun tibak taw nafangayan angku te, Satanas, glabi yay ro kamauri nu gfangayan ayu, am tagfaning angku.”

Sinui tuwa Tam Fakalimuun

(Lukas 12:2-7)

26“Lag am kalimu dewa mauri ban kanya fag ngay taw at fagbulun. Anway nus nge wain dewa nasuksuk katsi, e fasure yay ban fagayu. Ay dewa masuksukan katsi, e sumaful yay ban fagayu. 27Ay ku nafoyung ayu sad marum, longi yap sad mayamag, ay ku naibug sa ayu, uroi, laman ban fagayu taw dumungug. 28Ay lag kalimu at tagfate ayu, anway we mafafate ay falad. Ay fakalimuun antuwa Diyus, anway kanya mafafate ayu, ay mafafatsa sas lino afuy ay falad. 29Ay duwak maya at fansali, wa ngayu, go kin? Dewa katanya, nus di sadi wa mtong sas wa daga, nu dway ay Tama fakaumsigun. 30Ay glabi yay am, dewa ay buk at kayuwan Diyus gsaful tuwa fiya fiya. 31Nu katanya, lag kalimu, Diyus nu kesug ayu glabi yay fiya fiya sik ngay maya.”

Nu Gfoyung Tam Isus sa sangay Taw

(Lukas 12:8-9)

32“Sik taw nu nafoyung tuwa tiba te, ‘Aw, gafanud aw sas Isus,’ anggan aw, gfoyung akyangay ban sa ku Mama sas banwa te, ‘Kanya ku taw.’ 33Roro ngap, kanya fag taw nu kamayud way angku katsi sa tiba, anggan aw, kamayud akyangay ban anya sa ku Mama sas banwa.”

Isus At Fagnastiyeun Nanfasadsamanan Taw

(Lukas 12:51-53; 14:26-27)

34-35“Lag am gamatangan te, ku fagnastiyeun nanfanabayan aw at ngay taw ste swa daga. Ku fagnastiyeun anyay te, nanfasadsamanan akway at ngay taw. Sik baguwama ban gfaringangan sat tama. Ay sik baguyna ban gfaringangan sat tina. Ay sik nugang fag mangena ban gfaringangan sat nugangina. 36Ay sik taw at fabarangyan at kalongan wa mandi.

37“Ay takesug at tama ay at tina nu glabi way nu kesug angku, kanya wa maumsig sa angku. Ay takesug at unga nu glabi way nu kesug angku, kanya wa maumsig sa angku. 38Ay sik taw nu dway gfasan at salibagan kayu ay nu dway gfaning angku, kanya wa maumsig sa angku. 39Ay nus nga sinu fag taw nu kesug way at leleg katsi, malyam wa ban at leleg. Ay nus nga sinu tagfon at leleg katsi, laman e fanambagun aw, ka fag taw ban e leleg tuwa faggugat.”

Isus At Foyungan sa baliwa sik Taw At Natvngvdan

(Mar. 9:41)

40“Sik taw nu gfasakbo tuwa ayu sat bale, kata wa nu gfasakbo yangay angku. Ay sik taw nu gfasakbo tuwa angku, kanya gfasakbo yangay anggan at nasugu angku. 41Ay sik taw nu gfasakbo tuwa sik taglong, teway kanya Diyus at taglong, at tagfasakbo mul ban at natvngvdan, kata yangay Diyus at taglong nu gbul at natvngvdan. Ay sik taw nu gfasakbo tuwa sik matuyan fag taw, at tagfasakbo mul ban at natvngvdan, kata yangay ka fag matuyan fag taw nu gbul at natvngvdan. 42Ay nus nga sinu fag taw at nafon sik taya mamam sa ku tagadal at yud katvngvd tiba, matuyan kanya mul wa ban at natvngvdan.”

Currently Selected:

Matiyu 10: TAWEAST

Highlight

Copy