Aroma 14

1LOMBA uyo wolenda mu mvwano mpokeleleni, sembe nte ku ntota yoyumikana naye. 2Muntu umo ana mvwano wakulya vyonse, sembe uyo wolenda akulya ndiŵo zya matepo. 3Uyo akulya asampwazya asalya; na uyo asalya asampingula akulya, Mlungu pakumpokera. 4Nga weo niwe ŵani paumpingula kapolo wa muyako? kwa asikuru wake mwine ni kwakupanama kano kuwa. Aye, azapanamikiwe, Asikuru paali na nsaka yompanamika. 5Muntu umo olemekezya siku limo kupula liyake: muyake olemekezya masiku ŵonse. Ali wonse nankazikike mu mtima mwake mwine. 6Uyo olilukana siku olilukana kwa Asikuru: na uyo akulya akulya kwa Asikuru, pakuti omuŵonga Mlungu; na uyo asalya, kwa Asikuru ni kwasalya nomuŵonga Mlungu. 7Pakuti paliye yeka umo wa seo ali moyo pa yeka, paliye yeka umo akufwa pa yeka. 8Chikomo tikaŵa na moyo tiri nawo kwa Asikuru; nase tikafwa tikufwa kwa Asikuru: teti tikaŵa na moyo kano kufwa nise ŵake Asikuru. 9Pakuti chikomo ichi ni chechifwila Kristo na kuŵa soti na moyo, chakuti aŵe Asikuru wa akufwa na amoyo. 10Sembe weo umpinguliranji mkwanu? nawe soti umpwazyiranji mkwanu? pakuti tonse tikapaname pantanzi pa chilimba chopingula cha Mlungu. 11Pakuti kwilembewa,

Umo munilili moyo, akuti Asikuru, nkokola zyonse zize zinifukamile neo,

Na malulimi ŵonse azasokolole kwa Mlungu.

12Teti ali wonse wa seo akalipendere mlandu kwa Mlungu.

13Teti tisapingulana soti: sembe ngakongako pingulani ichi, chakuti yeka umo asamuŵikira mkwaŵo chokumbulwako pa njira, kano chomuwisisyako. 14Nuziŵa nonkazikika mwa Asikuru Yesu kuti keka kantu ni ka usali pa keka: sembe kuti kwa uyo ochisya chintu kuŵa chosali ni chosali kuli yeve. 15Pakuti kati chikomo cha nyama mkwanu ondandaula, weo suyendayenda lomba mchitemwano. Usamcheneka na nyama yako wechifwila Kristo. 16Teti chiweme chako chisanenewa viipa: 17pakuti ufumu wa Mlungu nteuli kukulya na kumwa, sembe chilungamo na mtendere na chimwemwe cha mwa Mzimu Mtuŵa. 18Chikomo uyo omtumikila Kristo pa ivi ni womtemwesya Mlungu nolumbiwa na ŵantu. 19Teti natulondola nakale vya mtendere na vyowamyana umo na muyake. 20Usaupasula chikomo cha nyama mulimo wa Mlungu. Chendi vyonse viliyosali; lomba ni kuŵipa kwa uyo akulya kopilingisya. 21Ni chiweme kusalya nyama, na kusamwa mvinyu, na kusachita kantu kakukumbulwako mkwanu. 22Mvwano uuli nawo wakuŵa nawo weka pa menso pa Mlungu. Ana shuko uyo asalipingula mchakuzomerezya. 23Sembe uyo okanganya okonwa kati akalya, pasalya kwa mvwano; na chiri chonse chisali kwa mvwano ni chiipa.

Currently Selected:

Aroma 14: MA23

Highlight

Copy