Aroma 12

1TETI numchimulani, akwasu, kwa vifundo vya Mlungu, kupeleka miŵili yanu kuŵa nsembe yamoyo, ituŵa, yomtemwesya Mlungu, ni ulambilo wanu wa ku nzeru. 2Msalilinganisya umo mchilili charo chino cha pansi: sembe mwakuŵa ŵosanguka powamya soti mitima yanu, kuti molinga wino chipangwilo cha Mlungu ni vinji, chila chiweme notemwesya noterama.

3Pakuti nunena kwa chawanzi chinipewa neo ku muntu ali wonse ali mwanu, asalimekera kupula mwakuwamilila kulinga; sembe naŵolinga kolilesya, nga ni Mlungu mwechiyaŵira ku ali wonse mlingo wozomera. 4Pakuti umo mtilili navyo vizo vinyinji mmuŵili umo, na vizo vyonse siviri nawo mulimo umo na umo, 5teti nase kumo patiri anyinji ni mtilili muŵili umo mwa Kristo, na vizo vya mmuŵili umo na ayasu. 6Patina mitulo yosiyana nga ni mchitipewera chawanzi, kano wolosya, natulosya kwa mlingo wa mvwano wasu; 7kano wotumikila, natuyumilila utumiki wasu; soti uyo osambizya naŵoyumilila kusambizya kwake; 8na uyo ochimula kuchimula kwake; uyo akupa naŵekupa kwa wanangwa; uyo oyondolola naŵochita ntina; uyo ochita lusungu naŵochita na chimwentumwentu. 9Chintemwa nachikuŵa chiliye kulipazya. Tinkisyani viipa; katisyani viweme. 10Potemwana na akwanu mwakuŵa na mitima ya chisomo umo na muyake, kutanguzyana nochitira ayanu ulemo. 11Msaŵa okatasi, sembe a ntina; mitima yanu naikupya. Momtumikila Asikuru, 12nosangalala mchigomezyo, nosisikanya mmatamano, nokoselela mmalombero, 13noyaŵira kwa asanto amene osoŵelwa, noteŵetera alwendo. 14Ashukisyeni aŵo omzuzyani; ashukisyeni, msaŵashamika yai. 15Temwanani naŵo ŵotemwa, nolila naŵo ŵolila. 16Iŵani na mtima umo umbi na muyake. Msatunamila vintu vikuru; molisisya kwaŵo ŵosishiwa. Msaŵa ŵolilumba kuti mwina nzeru. 17Msawezezya muntu ali wonse chiipa na chiipa. Lukanani vintu vyochinzikiwa pa menso pa ŵantu ŵonse. 18Kati kukakumika iŵani na mtendere na ŵantu ŵonse umo mmukumila. 19Mwaŵotemweka, msawezyamo, sembe kutalamukapo pokali: pakuti kwilembewa, Kuwezyamo ni kwangu; niti nze niwezyemo nine, akuti Asikuru. 20Sembe wokupata akaŵa na njala umulyesye; akaŵa na njota ummwenshe: pakuti pochita teti weo uzounjike minyeku ya mulilo pa mutu wake. 21Usaŵeŵa na chiipa, lomba woŵevya chiipa pochita chiweme.

Currently Selected:

Aroma 12: MA23

Highlight

Copy