2 Akorinti 8

1SOTI, akwasu, tumziŵisyani chawanzi cha Mlungu chipewa mmaeklezya a mMakedoniya, 2chakuti mmayezyo akuru a matamano kupulamo kwa chimwemwe chaŵo na ukaŵe ukuru waŵo vipaka ku mpango zyowama mtima kwaŵo. 3Chikomo umo muŵenzele na mpamvu, nuchita untoni, inde na kupula muŵenzele na mpamvu, ŵechipa kozomera, 4notipapatira seo na matetelelo anyinji pa chawanzi ichi na chisanzyano cha mkwatumikila asanto: 5kwenze teti, nte mtenzogomezyera, sembe potatika elipa ŵeka kwa Asikuru, na kuli seo mchipangwilo cha Mlungu. 6Koteti ni petimchimula Tito kuti umo mwechitatikira kale, tetyo soti asilizye muli mweo na chawanzi ichi. 7Lomba umo mmupakila mvyonse, mvwano, malongosolewe, maziŵilo, na ntina yonse, na chintemwa chanu cha kuli seo, mopaka na mchawanzi ichi. 8Sinulaŵira mwa tetulo, sembe nga ni kuchilinga na ntina ya ayanu chintemwa chanu soti chiliyonjaru. 9Pakuti muchiziŵa chawanzi cha Asikuru wasu Yesu Kristo, chakuti chukanga enze msambazi, lomba pa milandu yanu eyaruka mkavu, kuti mu ukavu wake mwe mwakuŵa asambazi. 10Pa ichi nupingula neka: pakuti ichi nchiweme kwanu, mwe mwitangulotatika chirimika chipita nte kuchita kweka, sembe kupangwa soti. 11Sembe lomba silizyani kuchita nako; kuti umo mkwenzele kapampu kopangwa, tetyo kuŵe na chisiliziko soti mvimuli navyo. 12Pakuti kati kalipo kapampu, ni kozomereka nga ni muntu mwalili nacho, nte mwasali nacho. 13Chikomo sinuteti kuti ŵambi alekelewe na mweo kuzingwa, 14sembe pamo na pamo; mapakilo ŵanu akumanizye pa nsita ino kusoŵelwa kwaŵo, kuti mapakilo ŵaŵo soti akumanizye kusoŵelwa kwanu; paŵe pamo: 15nga ni mkwilembewera, Uyo ekusa chinyinji enzeve chosalapo, na uyo ekusa chitonto aliyosoŵelwa.

16Lomba nalumbiwe Mlungu, oŵikamo mu mtima wa Tito ntina yamene ya kuli mweo. 17Pakuti lezee emvwila machimulo ŵasu; sembe pakuŵa mwine na ntina ngayo eima kuya kwanu yeka. 18Nase tumtuma mkwasu pamo naye, wakuŵirikila malumbo ŵake a mu evangelo mmaeklezya ŵonse; 19nte teti mpera, lomba esaluliwa soti na maeklezya kuya nase ulwendo pa chawanzi ichi, chutumikiliwa na seo komchinzika Asikuru na kolangizya kapuvya kasu: 20tupambauka ichi, chakuti ali wonse angatituzule pa chabule ichi chutumikiliwa na seo: 21pakuti tulingilatu vyamchinzi, nte pa menso pa Asikuru peka, sembe na pa menso pa ŵantu. 22Nase tumtuma mkwasu pamo naŵo, witilinga kaŵirikaŵiri kuti ana ntina mvinyinji, sembe lomba ni wa ntina yopulamo, chikomo chomchetekerani kwake kukuru. 23Kati akakonsha zya Tito, ni muyangu na wa mulimo umo kuli mweo; kano zya akwasu, ni nkalamba zya maeklezya, ni mchinzi wa Kristo. 24Teti ŵaŵonesyeni pa menso pa maeklezya chiziŵikwilo chotemwa kwanu na cholitamya kwasu pali mweo.

Currently Selected:

2 Akorinti 8: MA23

Highlight

Copy