2 Akorinti 9

1LOMBA zyoŵatumikila asanto niliye malizu omlemberani, 2panuziŵa kapampu kanu, kanulitamya nako chikomo cha mweo kwa a mMakedoniya, kakuti pa Akaya paluwamizyiretu chirimika chamsuma; na kuti ntina yanu iŵapikisya anyinji ngaŵo. 3Lomba nuŵatuma akwasu kuti kulitamya kwasu chikomo cha mweo kusaŵa kwatyala pali ichi; kuti mnanenera muŵe ŵoliikilatu, 4kano kati akaza nane pamo ŵambi a mMakedoniya nomfwanani ŵosaliikilatu, seo (tisati, mweo) tingatozoke mchigomezyo ichi. 5Teti ni pinichiti niŵapapatire akwasu atangule kwanu akawamizizye kaŵera vyabule vimwipanga kale, viŵe vyoŵikiwilatu, nga ni vyamatapo nte vyopinda.

6Lomba nunena ichi, Uyo okomola vyokangafi azawezye soti vyokangafi; na uyo okomola vyamatapo azawezye soti vyamatapo. 7Ali wonse nachite umo muupangwila mtima wake, nte kwa utani kano kokangamizya: pakuti Mlungu otemwa akupa na nseko. 8Naye Mlungu okumowandisya kwanu chawanzi chonse; kuti pakuŵa naŵo nsiku zyonse makumaniro ŵonse mvyonse mowanda ku milimo yonse iweme: 9nga ni mkwilembewera,

Emwazyamwazya, echipa kwa akavu;

Chilungamo chake chonkalilila vyaka na vyaka.

10Soti uyo omperatu mbuto mkomoli na mitanda alyeko azaperetu nowandisya mbuto yanu yokomola, noyangizya vitwalo vyolungama kwanu: 11ninga muŵe ŵosambazyiwa mvyonse kowama mtima konse, kwamene kuchita muli seo kumuŵonga Mlungu. 12Pakuti utumiki wa mulimo uyu sukumanizya mlingo wosoŵelwa kwa asanto ŵeka, lomba uwanda soti kwa Mlungu mmayamikilo anyinji; 13pakuti pomlingani notumiki uyu omchinzika Mlungu komvwila kwa chizomerezyo chanu cha ku evangelo ya Kristo, na kowama mtima kwa msonko wanu kuli ŵeve na ku ŵonse; 14naŵo ŵeka soti pomsengerani olyokalyoka mweo chikomo cha chawanzi ngacho cha Mlungu chiri mwanu. 15Nalumbiwe Mlungu ku mtulo wake wosalululika.

Currently Selected:

2 Akorinti 9: MA23

Highlight

Copy