रोमियो 7

वाराडवाला जीवनान वार्ता

1हे बायहो, काय तुमु नाह ओलखते मी नियमशास्त्रान ओलखिणार किथे कि ताहेरया एक माणुह जीवतालू रेणे, तो ताहवोर तापोर व्यवस्था सत्ता रेणू? 2काहाकाय वाराडावाली बायकू व्यवस्था अनुसार आपणो एदम्याह जीवानामाय तान हेरी बांधील हि, पुण केध्दीह एदमी मोरीन जाहो, तर ती माणहान नियममायरीन सुळीन गीयी. 3जानकेरता केध्दीह एदम्या जीवतालू एयताहा ती कायताहा दिहीरा एद्म्याह एय गीयी, तर व्यभिचारामाय जाहो, पुण केध्दीह एदमी मोरीन गीयो, तर ती ता व्यवस्था मायरीन सुळीन गीयी, न्या ताहवोर कि केध्दीह कूण दिहीरा एदम्यान एय गीयी तेभी व्यभिचारणी ठेहरी. 4तोहोलोच मारो बायहो, तुमूह पुण मसीहान शरीरान जर व्यवस्था मुरील बोनाडीन गीया, कि ता दिहीरान एय जावू, जो मोरील मायरीन जीव उठिल: का आमु बोगवानान केरता फोल लावहू. 5काहाकाय कि ताहेरया आमु शारीरिक एता, तर पापान अभिलाषा जे व्यवस्था द्धारे एती, मृत्यू चे फोल उत्पन्न केरणेन केरता आमरा शरीरा माय काम केरतीन एता. 6पुण ज्यान बंधनामाय आमु एता तान केरता मोरीन, ऐवी व्यवस्था तून इही सुळीन गीया, कि पाहून लेखणो जुना रीत उपेर नाहं, नापून आत्मान नोवालो रीतीपूर सेवा केरणू.

व्यवस्था एने पाप

7तर आमु काय केहू? काय व्यवस्था पाप हि? केधीच नाहं! नापून विना व्यवस्था मी पाप नाहं ओळखतेह: व्यवस्था केध्दीह नाहं कियेल, कि लालूच केरहू मां तर मी लालच्य ओलखिल नाहरेने. 8पुण पाप ने संधी साधून आज्ञा द्धारे कुणबी आखा प्रकारान लालूच उत्पन्न किरील, काहाकाय कि वोगर व्यवस्था पाप मुरील हि. 9मी तर व्यवस्था वोगर जीवतालू एतो, पुण ताहेरया आज्ञा आवी, तर पाप जीवतालू एय गीयो, एने मी मरण जाईल. 10एने तीस आज्ञा जी जीवनान केरीन एती मारकेरीन मोरनी कारण ठेराईल. 11काहाकाय कि पापण्या संधी साधून आज्ञा द्धारे माहु बोह्कावी एने ताणुच द्धारे माहु देद्बी टाकील.

12ज्याकेरता व्यवस्था पवित्र हि, एने आज्ञा पुण हाजो एने हाजी हि.

पापा से वोचणे माय व्यवस्था असमर्थ

13तर काय ती हाजी एती, मारकेरीन मृत्यू ठेरना केदिबी नाहं, पुण पाप तान हाजो वस्तून द्धारे मारकेरीन मुरील उत्पन्न केरणार एनो कि तान पाप एने; प्रगट एय गीयो, एने आज्ञा द्धारे पाप बहुमच पापमय ठेरना.

14आमु ओळखणे कि व्यवस्था तर आत्मिक हि पुण मी करने शारीरिक एने पाप्यान मी वेचील हि. 15जे मी करने ताह ओळखतेह नाहं, काहाकाय कि जे मी इच्छितो ते नाहं करने, पुण ज्यान माहु हेष लागीह तोज करने. 16केध्दीह जे मी नाहं इच्छितो तोज करने तर मी मानीन लेणे कि व्यवस्था हाजो हि. 17तेवी ओला देशामाय माय तान केरणार मी नाहं, नापून पाप हे कुणबी बुहील हि. 18काहाकाय कि मी ओळखणे कि कुणबी अर्थात मारो शरीरामायरीन काल्ली हाजी वस्तु वास नाहं केरतीन ईच्छा तर कुणबी हि, पुण हाजो काम मारकेरीन बोणावीन नाहं जात. 19कारण कि ज्या इच्छो कामान मी हाजो करने, तो तर नाहं केरतीन, पुण ज्या चुकीने हाजो नाहं केरतीन, तोज केरतेच रेणे. 20सेवट केध्दीह मी तोज करने ज्यान ईच्छा नाहं केरतीन तेवी तान केरणार मी रेणा नाहं पुण पाप जे कुणबी बुहील हि.

21ज्योच प्रकारे मी हे व्यवस्था मेलावीन लेणे कि ताहेरया हाजो केरणेन ईच्छा करने, तर वाईट मारो उगे आवी. 22काहाकाय कि मी माय वाला माणहान तर बोगवानान व्यवस्था तून जुलुम प्रसन्न रेणे. 23पुण माहु आपणो शरीरा माय दिहीरा प्रकारची व्यवस्था देखाईल आवी जे मारो बुद्धी व्यवस्था तून चालाडील एने माहु पाप्यान बंधनामाय टाकणे जे मारो शरीराहे-या हि. 24मी कोहलो काही माणुह हि! माहु ज्याह मृत्युन शरीरान कूण सोडवे. 25आमरा प्रभु यीशु मसीहाच्या द्वारे बोगवानान धन्यवाद एय, जानकेरता मी आपणो बुद्धी बोगवानान व्यवस्था तून पुण शरीर केरीन पापान नियमोमाय सेवा करने.

Currently Selected:

रोमियो 7: NLXNT

Highlight

Copy

Compare