1 कुरिन्थियो 11

1तुमु मारहारखो वागणू केरू जोहलो मी मसीहा होस वागणू करने.

आराधनामाय मुंड डापणो

2हे बायहो, मी तुमरो वाहवा करने कि आखा वातीमाय तुमूह माहु इआवीह केरणू; एने जी परंपरा मी तुमूह आपील हेते, तान पोहणे केरणू. 3पुण मारी ईच्छा हि कि तुमूह हे सेमजीन ली कि प्रत्येक एदमी मुंडे मसीह हि, एने बायकू न मुंडे माणहे हि, एने मसीहान मुंडे बोगवान हि. 4जो माणहे मुंडे डापिल प्रार्थना केव्ही भविष्यवाणी करने तो आपणो मुंडीन अपमान करने. 5पुण जी बायकू उगडी मुंडाकेरिन प्रार्थना केव्ही भविष्यवाणी केरूह, ती आपणो मुंडीन अपमान करने, ती मुंडीन लेट्या काटीलान होस हि. 6जर बायकू ओढणी नाय पागरी नाहं तर लेडया; पुण काटीन लेणेन जुवी जर बायकू केरता लेडया काटणु केव्ही मुंडण केरणेन लाज वात हि तर ओढणी पाघरीन नाय. 7हां, माहु आपणा मुंडे तापनारो योग्य नाहं कारण तो बोगवानान स्वरूप एने महिमा हि; पुण बायकू एदमी महिमा हि. 8कारण माणहा बायकू फायरीन सोरीफायरीन एनो नाहं तर बायकू माणहा फायरीन एनी हि. 9एने माणहा बायकू केरता बोणील नाहं, तर बायकू माणहान केरीन बोनाडी गीयी हि. 10तामुळे स्वर्गदूतांमुळे बायकू योग्य हि कि अधिकार आपणो मुंडीपोर मेल. 11तेभी पुण प्रभु माय बायकू एदमी, एने माणहे तीवहे-यो हि. 12कारण जीही बायकू एदम्याफायरीन हि, तोहलोच माणहे बायकू फायरीन हि पुण आखा वस्तु बोगवाना फायरीन हि. 13तुमूह खुदेन विचार केरू, काय बायकू उखडो मुंडे मेलीन बोगवानान प्रार्थना केरणेन होपतलो? 14काय सोभाहारकेरिन तुमूह मालूम हि कि जर माणहे सेटो लेडया मेलूह, तर तान केरता अपमानाची वात हि. 15पुण जर बायकू सेटो लेडया मेलूह तर तीनकेरिन होबा हि कारण तीह लेडया फुसीलकेरीन आपील हि. 16पुण कोणीही चर्चा केरणेन हि, तर हे सेमजीन लेणेन कि आमरी एने बोगवानान कलीसियाची पुण ओहलो रीत नाहं.

प्रभु भोजने विषयमा

(मत्ती 26:26-29; मरकुस 14:22-25; लूका 22:14-29)

17पुण जी आज्ञा आपतेन येतो मी तुमरी वाहवा केरीन नाहं, ज्यानकेरता कि तुमरो एक्ठाच एने हजो नाहं पुण नुकसान एता. 18कारण पेल्ला तर हे होमलथू कि, ताहेरया तुमूह कलीसिया माय एक्ठाच ऐतेह तेवी तुमु माय फुट एता, एने मी जापोर काही विश्वास पुण करने. 19कारण भेदभाव पुण आवश्यक हि, तान केरता कि जे माणहे तुमरे माय खेरो हेते ते प्रगट एईन जाहू. 20सेवट तुमूह जे एक जागीपोर एक्ठाच ऐतेह तर हे प्रभु रोटू खाणेन केरता नाहं, 21काहाकाय खाणेन टाइम एक दिहरान पेल्ला आपणा रोटूखाणे खाइन जातेह, ज्यानप्रमाणे कुणबी बुख्यो रेणे एने कूण होरूपिणार एईन जाथू. 22काय खाणेन एने पीणेन आपणा घेर नाहं? केव्ही बोगवानान कलीसियान तुच्छ होमोलनु, एने न्यानहेऱ्यो नाहं ताह लाज आली केरणू? मी तुमूह काय केहू? काय आवो वातीमाय तुमरी प्रशंसा केरूह? नाहं, मी प्रशंसा केरीन नाहं. 23कारण जीवात माहु प्रभु फायरीन जुडील हि एने मी तुमरे जागे पोचाडीन आपील कि प्रभु यीशुह ज्या राती देरीन आपील गीयो, रूटू लीईल, 24एने धन्यवाद आपील ती मुळनु एने कियील, “हे मारा शरीर हि, जे तुमरीकेरता हि, मारो एर केरणेन केरता हे केरतीन रीवू.” 25ज्यानंतर तान रोटोखाणेनबाद प्याला पुण लियेल एने कियील, “हा प्याला मारो रक्तामाय नोवालो वाचा हि, ताहेरया हा पिनार, तेवी मारो एर केरणेन केरता हे केरतीन रीवू.” 26कारण ताहेरया तुमूह हि रूटू खाणु एने हा प्याला पियलू तेवी प्रभुन मोरणाह ताहेरया ताहवोर तो आविह नाहं ताहउर पोरचार केरतीन रेणू. 27तामुळे जो कूण कायनयहाजो रीतीमाय प्रभुन रूटू खाण्यू केव्ही ता प्याला मायरीन पिनार तो प्रभुन शरीर एने रक्ताब्द्द्ल अपराधी ठेरणार. 28तामुळे “माणहान जीवाह पारखिल्यु लेणेन जुवी एने आवो प्रकारे आवो रोटामायरीन खालोताहा आवो प्याला मायरीन पिवू.” 29कारण जो खाणे पिपलू येतो प्रभुन शरीराह ओळखतेह नाहं तो खाणे एने पित येतो मारपोर शिक्षा लावथू. 30तामुळे तुमरे माय मोक्तास जन दुर्बल एने दुखारया हेते एने मोक्तास जन हूवगीयाह पुण गीया. 31जर आमु जीवाह पारखीन हि तर शिक्षा जुडी नाहती. 32पुण प्रभु आमूह दण्ड आपील आमरी शिक्षा करने ज्यानकेरता कि आमु जगाहे-या दोषी ठेरहू नाहा. 33त्याकेरता हे मारो बायहो, ताहेरया तुमूह खाणेन केरता एक्ठाच ऐतेह तर एकदिहरांकेरता वाट देखू. 34जर कूण फुकलागीही रेंय तर आपणो घेरामाय खावू ज्यान मुळे तुमरो एखठाच एने दण्डाचे कारण एय नाहं बाकीह्य वातू मी आवीन केरुहू.

Currently Selected:

1 कुरिन्थियो 11: NLXNT

Highlight

Copy

Compare