1 कुरिन्थियो 10

इस्राएलान एतिहासा से चेतावणी

1हे बायहो, मारी ईच्छा नाह कि तुमु वातू पुर रीन बिगर ओतील रेणेन जुवी कि आमरा आखा पूर्वज वादुद बुंदे एता, आखान आखाज समुद्रामायरीन ता पुरलेउखीर निकलीन गीया; 2एने आखाच वादलामाय एने समुद्रा माय, मुसान बाप्तिस्मा लियेल; 3एने आखाच एकुच आत्मिक जेवण किरील; 4एने आखाच एकुच आत्मिक पाणी पियील, कारण ता आत्मिक देगडामायरीन पिताला जाता हेऱ्या चालताला, एने तो दिगुड यीशु मसीह इतू. 5पुण बोगवान तामायरीन मोक्तास जाणा आनंद एनो नाहं, तामुळे ते जेंगलामाय ढिंग एय गीया.

6आवो वातू आमरे केरता उदाहरण ठेरील, हेते कि जोहलो तास लोभ किरील, तोहोलो आपु वाईट वस्तून लोभ केरूह नाहा; 7एने तुमूह मूर्ती पूजा केरणारा एहू नाह एता, कोलाक जान बुणील एता, जोहलो लिखील हि, “माणहे खाणेन पिईल बोह्ना एने खेलने कुदणे उठना हि. 8एने आमु व्यभिचार केरणू, जोहलो तामाय केताहा किरील” एने एक दिहामाय तेवीस हजार मोरीन गीया. 9एने आमु प्रभु नाह परिक्षा काडनु, जोहलो तामायरीन केताहा किरील एने गेयळेक द्वारे नाश किरील गीया. 10एने तुमूह बोडबोड केरूह, मा ता प्रकारे तामायरीन केताहा बोडबोड केरील एने नाश केरणारान द्वारे नाश किरील गीया. 11पुण आवो आखा वातू, ज्या तां पोर आवीन उदाहरण सारख्या एता; एने ते आमरा चेतांवणीसाठी जगाच्या शेवटेस वेलाम आवीन रेणे हे आपणो बोधासाठी लिखील गीया हि. 12तामुळे ज्याह लागीह, “मी स्थिर हि” तान होमंबालीन रिजी कि कां पोडीन जाहू नाहा. 13तुमूह कायताहा ओहला परिक्षा माय पोडील नाहं, जे माणहान सहन करीन पुरलेउखीर हि. बोगवान विश्वास योग्य हि एने तो तुमूह शक्तीचे बाहेर परिक्षा माय पोडहुं आपण्यू नाहं, पुण परिक्षा बरोबर उपाय पुण केरुहू कि तुमूह सहन केरूह शकणार.

मूर्ती पूजान विरुद्ध चेतावणी

14“ज्यानकेरता हे, मारो प्रियांनो, मूर्ती पूजा से सेटो रीवू.” 15मी बुद्धिमान होमजाडीन तुमूह किथे: जे मी किथी हि, ताह तुमूह पारखत्लू. 16तो आशीर्वादान प्याला, ज्याह आमु धन्यवाद आपथु; काय मसीहान रक्तान भागीदार नाहं? ती रूटू जीह आमु मुडनू, काय ती मसीहान शरीरान भागीदार नाहं? 17तामुळे एकुच शरीर रूटू हि तर आमु पुण जे जुलुम जन हि, एकुच शरीर हि; कारण आमु आखा ता एकुच रोटामाय भागीदार एतो. 18शरीरान संबधामाय जां इस्राएली हेते, जो अर्पण किरील भी खातेह ता वेदीन भागीदार हेते नाह काय? 19ओवतो ती काय किथी हि? काय हे कि मूर्तीही चेढाविल अर्पण काही हि, ज्याह मूर्ती काय हेते? 20नाहं, पुण हे कि दिहरी जाती अर्पण केरतीन रेणू; ते बोगवानान केरता नाहं पुण दुष्ट आत्मासाठी अर्पण केरणू एने मारी ईच्छा नाहं कि तुमूह दुष्ट आत्मान भागीदार एने जुवी. 21तुमूह प्रभुन प्याला दुष्ट आत्मान प्याला बेनजामायरीन पिहु शकत नाहं. तुमूह प्रभुन मेजाचे एने दुष्ट आत्मान मेजाचे दुयुन भेलाय शकत नाहं. 22काय आमु प्रभुह रागाम करने? काय आमु तापुरीन शक्तीमान हेते?

सोब बोगवानन महिमान केरता

23आखा वस्तु मारकेरीन योग्य तर हि पुण आखा पायदा नाहं: आखा वस्तु मारकेरीन योग्य तर हि, पुण आखा वस्तु ने विकास एता नाहं. 24कूण आपणाच हाजो ला देखहुं नाहा, तर दिहरान हाजो ला होदणे. 25जे काही खाटिक बाजारामारीन वेचने जातेह, ते शंका केरीन खा एने विवेक बुद्धी कारण से कायीच फुसहु मा? 26“कारण पृथ्वी एने तान भरपूरही प्रभुन हि.” 27जर अविश्वासी माणहामाय तुमूह कूण तुमूह नेवतो आपण्यू, एने तुमरी जाणेन ईच्छा हि, तर जे काही तुम्राओगाण मिलील जाय ते खा; एने विवेक बुद्धी मुळे कायीच फुसहु मा. 28पुण जर कूण तुमूह केनार, “हे तर मूर्तीही चेढाविल वस्तु हि” तेवी ता केनारान केरता एने विवेक बुद्धी कारणाने खाहू मा. 29मारा केणेन अर्थ ओहलो नाहं, कि तारी विवेक बुद्धी, पुण ता दिहीराआ. हाजो, मारी स्वतंत्रता दिहरान फुसणे काहा पारखिल जाणेन जुवी? 30जर मी धन्यवाद आपील, रोटामाय भेलाईल एतो तर ज्याह मी धन्यवाद आपथु तान मुळे मारी बदनामी काहा एता?

31तान्केरता जर तुमूह खाण्यू, जर पिनार, जे काही केरुहू, आखा काही बोगवानान महिमासाठी केरू. 32तुमूह यहूद्यांसाठी नाहं, यूनानी, केरता नाहं एने बोगवानान कलीसियान केरता पुण पेलरीन पोचाडनेन कारण बोणावूहु मा. 33जोहलो मी आखा आखा वातून आनंद मेली, एने आपणा नाहं पुण मोक्ताजानाह फायदाकेरता होदथू कि तान उद्धार एने जुवी.

Currently Selected:

1 कुरिन्थियो 10: NLXNT

Highlight

Copy

Compare