1 कुरिन्थियो 1

अभिवादन

1पौलुसा फायरीन जो बोगवानान ईच्छा से यीशु मसीहान प्रेरित केरता हादील एतो एणेन आमारो बाहाक सास्तीनेस न्या फायरीन, 2बोगवानान ता कलीसियान नावापुर जी कुरिन्थियो माय हेते हि, म्हणजे तान नाव जे मसीह यीशु माय पवित्र किरील हेते, एने पवित्र एणेन केरता हादाडील हेते; एने ता आखाह हाजो नावान जे प्रत्येक जागीपोर आमुफायरीन आपणो प्रभु यीशु मसीहान नावान प्रार्थना केरणू. 3आपणो आबोक बोगवान एने प्रभु यीशु मसीहा फायरीन तुमूह कृपा एने शान्ति जुडते रेंय

मसीह माय आशीष

4मी तुमरे विषयामाय आपणा बोगवानान धन्यवाद केरथू, ज्यानकेरता का बोगवानान कृपा तुमरे पोर मसीह यीशु माय एनी 5का तान मायरीन तुमूह प्रत्येक वातून, म्हणजे आखा वचनामाय एने आखा ज्ञानात मालदार एय जायील हेते. 6कि मसीहान गवाही तुमरे माय पाक्को निकेलनी. 7न्याओर कि वरदान माय तुमूह थोडो भी कमी नाहं, एने तुमूह आपणा प्रभु यीशु मसीहान प्रगट ला वाट दिखिती रेतेह. 8तो तुमूह शेवेट ताहवोर स्थिर केरुहू कि तुमूह आपणा प्रभु यीशु मसीहान दिहामाय निर्दोष निकालणेन जुवी. 9बोगवान विश्वास योग्य हि, ज्यान तुमूह आपणो सोरो आमारो प्रभु यीशु मसीहान संगतीमाय हादाडील हि.

कालीसियामाय फुट

10हे बायहो, मी तुमूह आपणा प्रभु यीशु मसीहान नावान विनंती केरथू कि तुमूह आखा एकुच वात केवो, एने तुमरे माय फुट रेणेन मां, पुण एकुच मोन एने एकुच विचार केरीन मिलिन रीवू. 11कारण हे मारो बायहो, खलोईल कुटुंबांआ माणहान माहु तुमरो विषयाम कियील हि कि तुमरे माय लेडानु एता हेते. 12मारो केरणू अर्थ हि कि तुमरे मायरीन कूण तर स्वताह “पौलुसान” तर कूण “अप्पुलोसचा” तर कूण कैफाचा, तर कूण “मसीहान” किथी हि. 13काय मसीहान तुमूह भाग पाडीन आपील हि? काय पौलुस तुमरीकेरता क्रुस पोर चेढाविन गीयो? केव्ही तुमूह पौलुसुसान नावापुर बाप्तिस्मा जुडील? 14मी बोगवानान धन्यवाद करने कि क्रिस्पूस एने गयुस न्या सोडीन मी तुमरे मायरीन कुणीहुच बाप्तिस्मा आपील नाहं. 15कां इही एणेन मां कि कूण केनार तुमूह मारो नावापुर बाप्तिस्मा जुडील. 16एने हा, मी स्तीफणुसाच्या कुटुंब पुण बाप्तिस्मा आपील; न्या सोडीन माहु मालूम नाहं कि मी उंजू कोणीही बाप्तिस्मा आपील. 17कारण मसीहाने माहु बाप्तिस्मा आपणे केरता नाहं, तर सुवार्ता केनेनकेरता मोकलील हि, एने हे पुण शब्दान ज्ञानाप्रमाणे नाहं, इही एणेन मां कि मसीहान क्रुस वाया ठेरणार.

मसीह बोगवानान ज्ञान एने सामर्थ हि

18कारण क्रुस ची वात नाश केरणारान केरता मूर्खता हि, पुण आपु उद्धार मिलावनेकेरीन बोगवानान सामर्थ्य हि. 19कारण लिखील हि,

“मी ज्ञानवानांच्या ज्ञानाह नाश केरुहू एने होमजनेपेक्षा समजावे तुच्छ केरीन आपण्यू.”

20कां रेणू ज्ञानवान? कां रेणू शास्त्री? कां रेणू आवो जगान वातू केरावणार? काय बोगवानान जगाच्या ज्ञानाह मूर्खता ठेरायेल नाहं? 21कारण ताहेरया बोगवानान ज्ञानाप्रमाणे जगान ज्ञानासे परमेश्वाराला ओलखिल नाहं तर बोगवानान हे हाजो लागनो कि आवो पोरचार गांडाहारखो विश्वास केरणारा उद्धार आपण्यू. 22यहूदी तर चिन्हे मांगताला एने, यूनानी ज्ञानाच्या होदमाय हि, 23पुण आमु तर ता क्रुस पोर चेढाविल येतो मसीहान पोरचार करने, जे यहूद्यांसाठी ठोकराचे कारण एने दिहरी जाती केरता मूर्खता हि. 24पुण जे हादाडील हि ते काय यहूदी, काय यूनानी, ताहेऱ्यो मसीह बोगवानान सामर्थ्य एने बोगवानान ज्ञान हि. 25कारण बोगवानान मूर्खता माणहान ज्ञानापुररीन ज्ञानवान हि एने बोगवानान लुलोहो माणहान परयापरत जादा बलवान हि.

26हे बायहो, आपणो हादणेन जाणेन विचार केरू शरीराप्रमाणे तर जादा ज्ञानवान एने जादा सामर्थी नाहं एने कुलीन इही हादाडील. 27पुण बोगवानान जगाच्या मूर्खानां निवाडीन लीईल म्हणजे ते हुशार माहुउ लज्जीत केरुहू एने बोगवानान जगाच्या मूर्खाह निवाडीन लीईल हि कि जोरावाराह् लज्जीत केरुहू; 28एने बोगवान जगान गेरीब एने तुच्छ मानीलाह जां नगण्य ताह भी निवाडील ज्यानकेरता का ज्या काय तेभी हेते ताह आतली किरील जात एतो एने ते जे कायीच नाहं बोगवानान ओहलाह निवाडील. 29म्हणजे बोगवाना ओगाण माणुह गर्व केरूह शकणार नाहं. 30पुण तुमूह यीशु मसीह ताणुच कारणाने स्थिर हि, तोज बोगवानान वरदानान रुपाम बुद्धी अर्थाम धार्मिकता, एने पवित्रता, एने सुटकारो. 31जोहलो का शास्त्रामाय लिखील हि, “जर कोणीही काही गर्व केरुहू हि तर तो प्रभु माय आपणो स्थितीचा गर्व केरुहू.”

Currently Selected:

1 कुरिन्थियो 1: NLXNT

Highlight

Copy

Compare