लूका 7
7
गोटक सुबेदार चो बिश्वास उपरे ईशु चो भक्यातोर
1जिदलदाय हुन लोगमन ले ऐ सपाय गोठमन बोललो, तेबे कफरनहूम ने ईलो। 2हुता कोनी सुबेदार चो गोटक दास जोन हुनचो लाड़रा रलो, बेमार ले मरतो थाने रलो। 3हुन ईशु चो चरचा सुनुन भाती यहूदीमन चो कितलो सियानमन के हुनचो ले ऐ गुहार करतो काजे हुनचो लगे पठालो कि ऐऊन मोचो दास के चेंगा करो। 4हुनमन ईशु चो लगे ईला, आउर हुनचो ले बड़े बिनती करून बोलुक मुरयाला, “हुन ऐ लायक आय कि तुय हुनचो काजे ऐ कर, 5कसनबल्लोने हुन आमचो जाति ले मया संगाऊ आय, आउर हुनी ची आमचो आराधना घर के बनालो से।” 6ईशु हुनमन चो संगे गेलो, मान्तर जिदलदाय हुन घर ले लापी नी रये, तेबे सुबेदार हुनचो लगे कितलो मीतमन चो बाटले सांगुक पठालो, “हे परबु, दुख नी उठाव, कसनबल्लोने मय ऐ लायक नुआय कि तुय मोचो छानी चो खाले आव। 7ऐई लागुन मय आपन खुद के ऐ लायक बले नी समज ले कि तुचो लगे ऐयें दें, मान्तर बचन ची बोलुन देस तेबे मोचो सेवक चेंगा होऊन जाये दे। 8मय बले पराधीन मनुक आय, आउर पलटन मोचो हाथ ने आसोत; आउर जिदलदाय गोटक के बोलु आंय, ‘जा,’ तेबे हुन जाऊ आय; आउर दुसर ले बोलु आंय, ‘आव,’ तेबे ऐऊ आय; आउर आपलो कोनी दास के कि ‘ऐ कर,’ तेबे हुन हुनके करू आय।” 9ऐ सुनुन भाती ईशु अकचकित होलो आउर हुन उलटुन भाती हुन भीड़ ले जोन हुनचो पाटे ऐते रली, बल्लो, “मय तुमचो ले बलें सें कि मय इस्राएल ने बले असन बिश्वास नी पावले।” 10आउर पठालो लोगमन घरे ऐऊन भाती हुन दास के चेंगा पावला।
मोरलो माने के जीवदान
11खिन्डिक दिन चो पाचे हुन नाईन नाव चो गोटक नंगर ने गेलो। आउर हुनचो चेलामन आउर बड़े भीड़ हुनचो संगे जाते रली। 12जिदलदाय हुन नंगर चो दुआर लगे अमरलो, तेबे दका, लोग गोटक मोड़ा के बाहरे नेते रला; जोन आपलो आया चो एकला बेटा रये, आउर हुन रान्डी रली; आउर नंगर चो खुबे असन लोग हुनचो संगे रवत। 13हुनके दकुन भाती परबु के जीव दुकली, आउर हुनचो ले बल्लो, “नी गाग।” 14तेबे हुन लगे ऐऊन भाती टण्डरी के छिंवलो; आउर उठातो बितामन थेबुन गेला। तेबे हुन बल्लो, “हे जुआन, मय तुचो ले बलें सें, उठ!” 15तेबे हुन मुरदा उठून बसलो, आउर गोठयाऊक मुरयालो। हुन हुनके हुनचो आया के सोपुन दिलो। 16ऐचो ले सपाय के डर चेपाली, आउर हुनमन माहापुरू चो बड़ाई करून बोलुक मुरयाला, “आमचो मंजी ने गोटक बड़े अगम गिआनी उठलो से, आउर माहापुरू आपलो लोगमन उपरे दयाधरम करलो से।” 17आउर हुनचो बारे ने ऐ गोठ सपाय यहूदिया आउर लगे-लगे चो सपाय देश ने फयलुन गेली।
यूहन्ना डूबन देतो बिता चो सवाल
18यूहन्ना के हुनचो चेलामन ऐ सपाय गोठमन चो खबर दिला। 19तेबे यूहन्ना आपलो चेलामन ले दुय झान के हाग देउन भाती परबु चो लगे ऐ पचारतो काजे पठालो, “काय ऐतो बिता तुय ची आस, नाहले आमी कोनी दुसर चो बाट दकु आंव?” 20हुनमन हुनचो लगे ऐऊन भाती बल्ला, “यूहन्ना डूबन देतो बिता आमके तुचो लगे ऐ पचारतो काजे पठालो से कि काय ऐतो बिता तुय ची आस, नाहले आमी कोनी दुसर चो बाट दकु आंव?” 21हुनी समया हुन खुबे असन ची बेमारमन आउर दुखमन, आउर दुष्टआत्मामन ले दूर करलो आउर खुबे असन कानामन के आँईक दिलो; 22आउर हुन हुनमन ले बल्लो, “जोन काई तुमी दकलास आउर सुनलासास, जाऊन यूहन्ना के सांगुन दिआस; कि कानामन दक सोत, खोड़ीयामन हिन्डे सोत बुलसोत, कोढ़ी शुद्ध करा जाय सोत, भयरामन सुन सोत, मुरदा जीव पड़ सोत, आउर कंगालमन के नगतखबर सुनाया जाये से। 23धन्य आत हुन जोन मोचो लागुन ठोकर नी खाओत।”
24जिदलदाय यूहन्ना चो पठालो लोग गेला तेबे ईशु यूहन्ना चो बारे ने लोगमन के सांगुक मुरयालो, “तुमी रान ने काय दकुक जाऊ रलास? काय लेहरा ले हालतोर सरकंडामन के? 25तेबे फेर तुमी काय दकुक जाऊ रलास? काय गुलगुला फटीई पिन्दलो मनुक के? दका, जोन चमकतो बिती फटीई पिन्दु आत आउर सुक शान्ति ने रऊ आत, हुनमन राज माहालमन ने रऊ आत। 26तेबे फेर काय दकुक जाऊ रलास? काय कोनी अगम गिआनी के? हव, मय तुमचो ले बलें सें, मान्तर अगम गिआनी ले बले बड़े के। 27ऐ हुनी आय, जेचो बारे ने लिकलोर आसे:
‘दक, मय आपलो दूत के तुचो पुरे-पुरे पटायें से, जोन तुचो पुरे तुचो बाट सीदा करे दे।’
28“मय तुमचो ले बलें सें कि जोन बायले लेकीमन ले जनमला सोत, हुनमन ले यूहन्ना ले बड़े कोनी निआत मान्तर जोन माहापुरू चो राज ने नानी ले नानी आय, हुन हुनचो ले बले बड़े आय।” 29आउर सपाय सादा लोगमन सुनुन भाती आउर कर धरू बितामन बले यूहन्ना चो डूबन धरून माहापुरू के सत मानला। 30मान्तर फरीसीमन आउर नियमकारीमन हुनचो ले डूबन नी धरून भाती माहापुरू चो इच्छा के आपलो बारे ने टालुन दिला।
31“आउर मय ऐ जुग चो लोगमन चो उदाहरन काचो ले देयें दें? कि हुनमन काचो असन आत? 32हुनमन हुन लेकामन चो असन आत जोन हाट ने बोसुन भाती गोटक दुसर ले चिचयाऊन भाती बोलु आत, ‘आमी तुमचो काजे बांवसी बजालु, आउर तुमी नी नाचलास; आमी तड़पलु आउर तुमी नी गागलास!’ 33कसनबल्लोने यूहन्ना डूबन देतो बिता ना रोटी खाते ईलो, ना दाखरस पिव ते ईलो, आउर तुमी बलेसास, ‘हुनचो भीतरे दुष्टआत्मा आसे।’ 34माने चो बेटा खाते पीते ईलो से, आउर तुमी बलेसास, ‘दका, पेटू आउर मतवार माने, कर धरू बितामन चो आउर पापीमन चो मीत।’ 35मान्तर गिआन आपलो सपाय पिलामन ले सत ठेबाया गेली से।”
शिमोन फरीसी चो घरे पापीन बायले लेकी के छमा
36फेर कोनी फरीसी हुनचो ले गुहार करलो कि हुन हुनचो संगे भात खाओ, आउर हुन-हुन फरीसी चो घरे जाऊन भात खाऊक बसलो। 37हुन नंगर चो गोटक पापीन बायले लेकी ऐ जानुन भाती कि हुन फरीसी चो घरे भात खाऊक बसलो से, संगमरमर पकना चो बनलो कोंड़ी ने इतर आनली, 38आउर हुनचो पाँयमन चो लगे, पाटे उबा होऊन, गागते-गागते हुनचो पाँयमन के आँसुमन ले भिजाते आउर आपलो मुण्ड चो केश ले फोचुक मुरयाली, आउर हुनचो पाँय घन-घन चुमुन भाती हुनमन थाने इतर लगाली। 39ऐ दकुन हुन फरीसी जोन हुनके हाग देऊन रलो, आपलो मन ने बिचारूक मुरयालो, “अगर ऐ अगम गिआनी होतो तेबे तो जानतो कि ऐ जोन हुनके छिंयें से, हुन कोन आउर कसन बायले लेकी आय, कसनबल्लोने हुन तो पापीन आय।” 40ऐ सुनुन ईशु हुनचो जबाप ने बल्लो, “हे शिमोन, मोके तुचो ले काई बोलतोर आसे।” हुन बल्लो, “हे गुरू, बोल।” 41“कोनी महाजन चो दुय झान लागा लागु रओत, गोटक पांच सव आउर दुसर पचास दीनार चो देतो बिता रये। 42जिदलदाय हुनमन चो लगे पटातो काजे काई नी रये, तेबे हुन दुनो के छमा करून दिलो। ऐईकाजे हुनमन ले कोन हुनचो ले खुबे मया संगा दे?” 43शिमोन जबाप दिलो, “मोचो समज ने हुन, जेचो हुन खुबे छांडलो” हुन हुनचो ले बल्लो, “तुय नुकु बिचार करली सीस।” 44आउर हुन बायले लेकी चो बाटे पलटून भाती हुन शिमोन ले बल्लो, “काय तुय ऐ बायले लेकी के दके सीस? मय तुचो घरे ईले मान्तर तुय मोचो पाँय धोहतो काजे पानी नी दिलीस, मान्तर ऐ तो मोचो पाँय आँसुमन ले भिजाली आउर आपलो केश ले पोछली। 45तुय मोके चुमा नी दिलीस, मान्तर जिदलदाय ले मय ईले से तेबे ले ऐ मोचो पाँयमन के चुमतोर नी छांडली। 46तुय मोचो मुण्ड थाने तेल नी घसलीस, मान्तर ऐ मोचो पाँय ने इतर लगाली से। 47ऐईकाजे मय तुमचो ले बलें सें कि ऐचो पाप जोन खुबे रये, छमा होली, कसनबल्लोने ऐ खुबे मया करली; मान्तर जेचो खिन्डिक छमा होली से। हुन खिन्डिक मया करू आय।” 48आउर हुन बायले लेकी ले बल्लो “तुचो पाप छमा होली।” 49तेबे जोन लोग हुनचो संगे भात खाऊक बसु रवत, हुनमन आपलो-आपलो मन ने बिचारूक मुरयाला “ऐ कोन आय जोन पापमन के बले छमा करू आय?” 50मान्तर हुन बायले लेकी ले बल्लो, “तुचो बिश्वास तुके बचाली से, हरिक ले जा।”
Currently Selected:
लूका 7: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.