लूका 5
5
ईशु चो पहिल चेला
1जिदलदाय भीड़ माहापुरू चो बचन सुनतो काजे हुनचो उपरे घसरुन पड़ते रवत, आउर हुन गनेसरत चो झील चो कटा उबा रलो, तेबे असन होली, 2कि हुन झील चो कटा दुय ठान ड़ोंगा रलोर दकलो, आउर मछरी धरूमन हुन थानले उतरून भाती जाल धोते रवत। 3हुन डोंगामन थानले गोटक थाने, जोन शिमोन चो रये, चेगुन भाती हुनमन ले हुन गुहार करलो कि कटा ले खिन्डिक गुचाव। तेबे हुन बसुन भाती लोगमन के ड़ोंगा थानले अच्छा गोठ सांगुक मुरयालो। 4जिदलदाय हुन गोठयाऊन सारलो तेबे शिमोन ले बल्लो, “गड़ीयां बाटे ने, आउर मछरी धरतो काजे आपलो जाल के डाला।” 5शिमोन हुनके जबाप दिलो, “हे मालिक, आमी गुलाय राती मसागत करलु आउर काई नी धरलु; तेबले बले तुचो बल्लोने जाल डालें दें।” 6जिदलदाय हुनमन असन करला, तेबे खुबे मछरीमन धरून आनला, आउर हुनमन चो जाल फाटुक मुरयाली। 7ऐ थाने हुनमन आपलो संगवारीमन के जोनमन दुसर ड़ोंगा थाने रवत, ईसारा करला कि ऐऊन भाती आमचो सायता करा, आउर हुनमन ऐऊन भाती दुनो डोंगामन ऐथा तक भरला कि हुन बुडूक मुरयाली। 8ऐ दकुन शिमोन पतरस ईशु चो पाँय ने घसरलो आउर बल्लो, “हे परबु, मोचो लगले जा, कसनबल्लोने मय पापी मनुक आय!” 9कसनबल्लोने ईतलो मछरीमन चो धराय जातो के हुनके आउर हुनचो संगवारीमन के खुबे भकवा लागली, 10आउर असने ची जबदी चो बेटा याकूब आउर यूहन्ना के बले, जोन शिमोन चो सायता करतो बिता रवत, अचरित होली। तेबे ईशु शिमोन ले बल्लो, “नी डर; अदायं ले तुय मानेमन के जीवता-जीवता धर से।” 11आउर हुनमन ड़ोंगामन के कटा ने धरून आनला आउर सपाय काई छांडुन भाती हुनचो पाटे होऊन गेला।
कोढ़ी के शुद्ध कराय जातोर
12जिदलदाय हुन कोनी नंगर ने रलो, तेबे हुता कोढ़ ले भरलो गोटक मनुक ईलो; आउर हुन ईशु के दकुन भाती पाटा पडुन घसरलो आउर बिनती करलो, “हे परबु, अगर तुय चाह लो ने तो मोके शुद्ध करूक सकीस।” 13हुन हाथ बड़ाऊन भाती हुनके छिंवलो आउर बल्लो, “मय चाहायें सें, तुय शुद्ध होऊन जा।” आउर हुनचो कोढ़ तुरते छांडली। 14तेबे हुन हुनके बल्लो, “काचीई ले नी बोल, मान्तर जाऊन भाती आपन खुद के याजकमन के दकाव, आउर आपलो शुद्ध होलोर बारे ने जोन काई मूसा चढ़ावा ठेबालो से हुनके चेगाव कि हुनमन थाने गोहई होओ।” 15मान्तर हुनचो बड़ाई आउर बले फयलते गेली, आउर भीड़ चो भीड़ हुनचो सुनतो काजे आउर आपलो बेमारमन ले चेंगा होतो काजे रूंड़ा होला। 16मान्तर हुन रानमन ने अलगे जाऊन भाती पारथना करते रलो।
ईशु लकवा चो बेमारी के चेंगा करतोर
17गोटक दिन असन होली कि हुन अच्छा गोठ सांगते रये, आउर फरीसी नियमकारी हुता बसुन रवत जोन गलील आउर यहूदिया चो सपाय गाँव ले आउर यरूशलेम ले ऐऊ रओत, आउर चेंगा करतो चो काजे परबु चो सामरत हुनचो संगे रली। 18हुन समया कितलो लोग गोटक माने के जोन लकवा चो रोगी रलो, खटिया ने आनला, आउर हुनमन हुनके भितरे नेतोर आउर ईशु चो पुरे संगातोर उपाय डगराते रवत। 19मान्तर जिदलदाय भीड़ चो लागुन हुनके भीतरे नी नेऊक सकला तेबे हुनमन छानी उपरे चेगुन भाती आउर खपरा गुचाऊन भाती हुनके खटिया संगे मंजी ने ईशु चो पुरे उतराऊन दिला। 20हुन हुनमन चो बिश्वास दकुन भाती हुनचो ले बल्लो, “हे माने, तुचो पाप छमा होली।” 21तेबे शास्तरी आउर फरीसी बहस करूक मुरयाला, “ऐ कोन आय जोन माहापुरू चो निन्दा करे से? माहापुरू के छांडुन आउर कोन पापमन के छमा करूक सके?” 22ईशु हुनमन चो मन चो गोठमन जानुन भाती, हुनमन ले बल्लो, “तुमी आपलो मनमन ने काय बिचार करेसास? 23सरल काय आय? काय ऐ बोलतोर कि ‘तुचो पाप छमा होली,’ नाहले ऐ बोलतोर कि ‘उठ आउर हिन्ड़ा बुला हो’? 24मान्तर ऐईकाजे कि तुमी जाना कि माने चो बेटा के धरतनी थाने पाप छमा करतोर बले हक आसे।” हुन-हुन लकवा चो रोगी ले बल्लो, “मय तुचो ले बलें सें, उठ आउर आपलो खटिया उठाऊन भाती आपलो घरे जा।” 25हुन तुरते हुनमन चो पुरे उठलो, आउर जोन थाने हुन पडुन रलो हुनके उठाऊन भाती माहापुरू चो बड़ाई करते-करते आपलो घरे गेलो। 26तेबे सपाय भक्याला आउर माहापुरू चो बड़ाई करूक मुरयाला आउर खुबे डरून भाती बोलुक मुरयाला, “आजी आमी भयंकर गोठमन दकलु से!”
मत्ती चो हाग दिआय जातोर
27ऐचो पाचे हुन बाहरे गेलो आउर लेवी नाव चो गोटक कर धरू बिता के कर धरतोर चवकी थाने बसलोर दकलो, आउर हुनचो ले बल्लो, “मोचो पाट-पाट आव।” 28तेबे हुन सपाय काई छांडुन भाती उठलो, आउर हुनचो पाटे होलो।
पापीमन संगे खातोर
29तेबे लेवी आपलो घरे हुनचो काजे गोटक बड़े भोज दिलो; आउर कर धरू बितामन चो आउर दुसर लोगमन चो जोन हुनचो संगे भात खाऊक बसु रवत, गोटक बड़े भीड़ रली। 30ऐ थाने फरीसी आउर हुनमन चो शास्तरी, हुनचो चेलामन ले ऐ बोलुन भाती घुरमुरूक मुरयाला, “तुमी कर धरू बितामन आउर पापीमन चो संगे केंव खाऊ पिऊ आहास?” 31ईशु हुनमन के जबाप दिलो, “बईद अच्छा चेंगामन काजे नाई, मान्तर बेमारमन काजे जरूरी आय। 32मय धरमीमन के नाई, मान्तर पापीमन के मन फिरातो काजे हाग देऊक ईले से।”
उपास उपरे ईशु चो राय
33हुनमन हुनचो ले बल्ला, “यूहन्ना चो चेलामन तो बराबर उपास संगाय सोत आउर पारथना करू आत, आउर असने ची फरीसीमन चो चेलामन बले, मान्तर तुचो चेलामन तो खाऊ आत पिऊ आत।” 34ईशु हुनमन ले बल्लो, “काय तुमी बरातीमन ले, जिदलदाय दुला हुनमन चो संगे रये दे, उपास कराऊक लाय सका से? 35मान्तर हुन दिन ऐये दे, जोन थाने दुला हुनमन ले अलग कराय जाये दे, तेबे हुनमन हुन दिनमन ने उपास कर दे।” 36हुन गोटक आउर कहनी बले हुनमन ले बल्लो: “कोनी माने नवा फटीईमन ले चीरुन भाती जुना फटीईमन ने काप नी लगाये, नाहले नवा फाटून जाये दे आउर हुन काप जुना ने मेल बले नी खाये। 37आउर कोनी नवा दाखरस जुना चामड़ा चो थयलामन ने नी भरोत, नाहले नवा दाखरस थयलामन के फटाऊन भाती बहडून जाय दे, आउर थयलामन बले नष्ट होये दे। 38मान्तर नवा दाखरस नवा चामड़ा चो थयलामन ने भरतोर आय। 39कोनी माने जुना दाखरस पीऊन भाती नवा नी मन करे कसनबल्लोने हुन बोलु आय, कि जुना ची अच्छा आसे।”
Currently Selected:
लूका 5: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.