Malaquías 1
1
Sc'uxul yo'tan Jehová ta stojol Jacob
1Ha sc'op-jalwanej ini. Ha te sc'op Jehová ta stojol Israel ta scuenta Malaquías.
2C'uxex ta co'tan,
xchi te Jehová.
Pero yac ajoc'oyic:
¿Bin ut'il c'uxotcotic ta awo'tan? xchihex.
Te Esaú ¿ma bal ha'uc sbanquil Jacob? xchi te Jehová;
pero c'ux ta co'tan te Jacob
3soc la jp'aj te Esaú;
la jc'atp'un ta jochol q'uinal te witsiltic yu'un,
soc la jquihquitay hilel te bintic a'bot yich' hilel
ta stojol te ts'i'etic ta jochol taquin q'uinal.
4Teme hich ya yal te Esaú:
Aunque pobre c'ohemotic,
ya jcha'pastic xan te bintic jimbilic, teme xchihe,
hich yaloj te Jehová te scuentahinej spisil:
Ya spasic, pero ho'on ya jimbe.
Ha chopol q'uinal ya xc'oht te sbihile,
soc ha pueblo te stalel ilintayot yu'un Jehová, xchi sc'oblal.
5Ya me awilic ta asitic, soc hich yac awalic:
Mero muc' te Jehová,
ha nix hich muc' ta fuera yu'un Israel, xchihex.
Jehová ya stij ta c'op sacerdotehetic
6Te nich'anil ya yich' ta muc' te state,
soc te a'bat ya yich' ta muc' te yajwale;
teme ho'on tatilon,
¿bin yu'un ma ba yac awich'onic ta muc'?
teme ho'on ajwalilon,
¿bin yu'un ma ba yac axi'onic,
ha'ex sacerdotehex te yac ap'ajic te jbihile?
xchi te Jehová te scuentahinej spisil.
Pero yac awalic:
¿Bin ut'il jp'ajojcotic te abihile? xchihex.
7Ha te yac awaq'uic ta scajtajib jmahtan
te we'elil te bohloben sc'oblale.
Pero ya to awalic:
¿Bin a te ma ba quich'ojatcotic ta muc' yu'un? xchihex.
Ha te yac awalic
te p'ajbil te mesa cu'une.
8Te c'alal yac awaq'uic ts'o'sit chambahlametic
scuenta chic'bil mahtanil,
¿ma bal chopoluc?
Ha nix hich te c'alal yac awaq'uic coxo',
o te ay ta chamel, ¿ma bal chopoluc?
A'beya te príncipe awu'un,
¿lec bal yo'tan yu'un ta atojol,
ya bal ya'bat bendición?
xchi te Jehová te scuentahinej spisil.
9C'ambeyahic Dios te lecuc yo'tan ta atojolic,
scuenta yu'un yacuc sna' yo'bolil jbahtic.
Pero ¿bin ut'il lec yo'tan ya xc'oht ta atojolic
teme hich yac apasique?
xchi te Jehová te scuentahinej spisil.
10Te ayuc mach'a ta awohlilic
te ya smacbe te ochibaletic yu'un te templo
scuenta yu'un ma tojoluc yac atsunic c'ahc'
ta scajtajib ta chiq'uel mahtanil cu'un,
xchi te Jehová te scuentahinej spisil.
11Como c'alal banti ya xloc' tal c'ahc'al
c'alal banti ya xmahl c'ahc'al
muc' te jbihil ta yohlil te nacionetique,
ta bayuc ya yich' chiq'uel pom ta scuenta jbihil
soc ya yich' aq'uel mahtaniletic
te mayuc yabacul.
Muc' te jbihil ta yohlil te nacionetic,
xchi te Jehová te scuentahinej spisil.
12Pero ha'ex yac abohlobtesbe sc'oblal
te c'alal hich yac awalic:
Bohloben sc'oblal te mesa yu'un te Jehová, te xchihex,
soc te c'alal yac awalic te p'ajbil te we'elil yu'une.
13Soc hich awalojic:
C'axix co'tan yu'un ini, xchihex,
soc yac ap'ajonic, xchi te Jehová te scuentahinej spisil.
La awich'ic talel te bin elc'ambil,
te coxo', o te ay ta chamel,
ha yac awa'bonic jmahtanin.
¿Ya bal jtsacbeyex ta ac'abic?
xchi te Jehová te scuentahinej spisil.
14Chopol sc'oblal te mach'a ya xlo'loywan,
te ay stat tuminchijetic ta jtsohb yu'un
te yaloj te ya yaq'ue,
pero ha ya ya'be smahtanin Jehová
te bin ma lecuque.
Como ho'on Muc'ul Ajwalilon,
xchi te Jehová te scuentahinej spisil,
soc xi'bil te jbihil
ta yohlil te nacionetique.
Currently Selected:
Malaquías 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.