Zacarías 14
14
Te Jerusalén soc te nacionetic
1Ya xtal sc'ahc'alel yu'un Jehová
te ya yich' puhquel ta awohlil
te bintic pojticlambil awu'une.
2Como ya jtsob tal spisil te nacionetic
yu'un ya ya'beyic guerra te Jerusalén.
Ya yich' ochintayel te muc'ul pueblo,
ya yich'ic pojticlambeyel sbiluc ta snahic
soc ya x'uts'inotic te antsetique.
J'ohlil te muc'ul pueblo ya xbaht ta chuquel,
pero te mach'atic hilemic
ma ba ya yich'ic loq'uesel.
3Ta patil ya xloc' tal te Jehová,
ya ya'be guerra te nacionetic,
hich te bin ut'il tsalawan ta sc'ahc'alel guerra.
4Ta hich ora ya stehc'an sba
ta Wits yu'un Olivohetic,
te snuhp'usitayej sba soc Jerusalén
ta stojol banti ya xloc' tal c'ahc'al.
Ya xtop' ta ohlil te Wits yu'un Olivohetic, ta stojol banti ya xloc' tal c'ahc'al c'alal ta stojol smahlib c'ahc'al, ha muc'ul spamlej ya xc'oht a. Te j'ohlil wits ya xbaht ta stojol norte, te j'ohlil xan ya xbaht ta stojol sur. 5Ya me x'ahnex bahel ta spamlej yu'un te witsiltique, como te spamlej yu'un te witsiltic ya xc'oht c'alal ta Azal.
Hich ya x'ahnex bahel te bin ut'il ahnex bahel
ta scaj te nihquel ta yorahil Uzías, ajwalil yu'un Judá.
Soc ya xtal te Jehová te Dios cu'un,
sjoquinejix tal spisil te mach'atic ch'ultesbilique.
6Ta hich ora mayuc sacal q'uinal,
mayuc sic soc mayuc me'sic.
7Mayuc yan c'ahc'al te pajal soc,
ha nax na'bot sba yu'un Jehová,
mayuc c'ahc'al soc mayuc ahc'abal,
pero ta xtibiltay ay sacal q'uinal.
8Ta hich ora ya xloc' cuxul-ha' ta Jerusalén,
j'ohlil ya x'oquin bahel ta mar ta stojol sloq'uib c'ahc'al,
j'ohlil ya x'oquin bahel ta mar ta stojol smahlib c'ahc'al,
hich ya spas ta yorahil snahtil c'ahc'al
soc ta yorahil scomil c'ahc'al.
9Ha ajwalil ya xc'oht te Jehová
ta swohlol bahlumilal.
Ta hich ora stuquel ay te Jehová,
soc stuquel ay te sbihile.
10Spisil te q'uinal ya xc'atp'uj ta muc'ul spamlej
c'alal Geba ha to ta Rimón,
te ay ta stojol sur yu'un Jerusalén.
Toyol sc'oblal ya xc'oht te Jerusalén
soc ya xnahinic tey a,
c'alal te Puerta yu'un Benjamín
c'alal ta yawil te nahil ochibal,
ta ochibal yu'un te Angulo,
soc c'alal ta toyol bahlal ts'ahc yu'un Hananeel
c'alal ta yawil pits'el aceite yu'un te ajwalile.
11Ya xnahinic tey a,
mayuquix bin ora ya yich' xan jinel,
jun yo'tan ya xnahinic ta Jerusalén.
12Ha ini te milawal-chamel te Jehová ya slajin a spisil te nacionetic te la ya'beyic guerra te Jerusalén: ha te ya xc'a' sbaq'uetalic te c'alal teq'uilic a, ya xc'a' sitic ta yawil, soc ya xc'a' yaq'uic ta yutil te yehique.
13Ta hich ora ya xchicnaj ta yohlilic
bayel xiwel te ticombil yu'un Jehová;
jujutuhl ya stsacbe sc'ab te smohlol,
soc talel c'axel ya shach sc'abic
ta scontrahinel sbahic.
14Ha nix hich te Judá
ya yaq'uic guerra ta scoltayel Jerusalén.
Ya yich' tsobel te c'ulejaliletic
yu'un spisil te nacionetic ta sjoyobal:
ha te oro, plata, soc bayel c'u'ul pac'aletic.
15Ha nix hich ay te jmilawal-chamel ta stojol te cawuhetic, mulahetic, camellohetic, burrohetic soc spisil te chambahlametic te ayic ta campamento yu'unic tey a.
16Spisil te mach'atic cuxul hilemic
yu'un te nacionetic
te la ya'beyic guerra te Jerusalén,
ya xmohic bahel jujun ha'bil ta sch'uhuntayel te Ajwalil,
ha te Jehová te scuentahinej spisil,
soc ta spasel te q'uin scuenta Yax Nahetic.
17Teme ay pueblohetic ta bahlumilal te ma ba ya xmohic bahel ta Jerusalén ta sch'uhuntayel te Ajwalil, te Jehová te scuentahinej spisil, ma ba ya xtal ha'al ta stojolic. 18Teme ma ba ya xmohic bahel te mach'atic yu'un Egipto, ma ba ya xtal ha'al ta stojolic, ha ya xtal jmilawal-chamel te ya x'ehchentesotic yu'un Jehová te nacionetic te ma ba ya xmohic bahel ta spasel te q'uin scuenta Yax Nahetic. 19Ha me te castigo yu'un Egipto soc spisil te nacionetic te ma ba ya xmohic bahel ta spasel te q'uin scuenta Yax Nahetic.
20Ta hich ora hich ya yich' ts'ihbayel ochel ta campanahetic yu'un te cawuhetic: Ch'ultesbil ta stojol Jehová, xchi. Soc te oxometic yu'un te sna Jehová hich ya xc'ohtic te bin ut'il te muc'ul tazahetic yu'un te scajtajib ta chiq'uel mahtanil. 21Spisil te oxometic ta Jerusalén soc ta Judá ch'ultesbil ya xc'ohtic ta stojol Jehová te scuentahinej spisil; spisil te mach'atic ya yaq'uic milbil mahtanil, ha ya yich'ic yu'un ya spayic tey a. Ta hich ora mayuquix jmambajel jchombajel ta sna te Jehová te scuentahinej spisil.
Currently Selected:
Zacarías 14: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.