Malaquías 2
2
Tijel ta c'op yu'un ma junuc yo'tan Israel
1Yo'tic, sacerdotehetic,
ha awu'unic te mandaril ini.
2Teme ma ba yac awa'iyic
soc teme ma ba yac anop ta awo'tanic
te yac awalbe yutsil sc'oblal te jbihil,
xchi te Jehová te scuentahinej spisil,
ya jticombeyex chopol c'oblalil ta atojolic,
ya calbe ma lecuc sc'oblalic
te bendicionetic awu'unique;
calbeyejix te ma lecuc sc'oblalic
como ma ba anopojic ta lec ta awo'tanic.
3Ya jtij ta c'op ats'umbal,
ya jch'ojbeyex tsa' ta asit awelawic,
ha te stsa' chambahlametic
te yac awaq'uic scuenta milbil mahtaniletic,
soc pajal ya xch'ojotex loq'uel soc.
4Hich yac ana'ic a
te la jticombeyex te mandaril ini,
scuenta yu'un stalel ya x'ayin
te chapbil-c'op cu'un soc Leví,
xchi te Jehová te scuentahinej spisil.
5Te chapbil-c'op cu'un soc Leví
ha cuxlejal soc lamal q'uinal.
La jca'be yu'un ya xi'on a,
la xi'on soc peq'uel la yac' sba ta stojol te jbihile.
6Ay ta ye te smelelil ley,
mayuc bin chopol tahbot ta ye.
Behen ta jtojol ta scuenta lamal q'uinal
soc ta scuenta bin toj ta pasel,
ay tsobol mach'atic
la ya'be yihquitayic hilel te bin chopole.
7Como te ye te sacerdotehetic
ya sc'an ya scanantay te p'ijil-o'tanil,
soc tey ya sle a te Ley te pueblohe;
como te sacerdote ha jal-c'op
yu'un Jehová te scuentahinej spisil.
8Yan te ha'exe, la awihquitayic hilel te be,
la awaq'uic sc'ohchin sbahic tsobolic ta banti te Ley,
la ajinic te chapbil-c'op te la yich' chahpanel soc Leví,
xchi te Jehová te scuentahinej spisil.
9Ha yu'un te la jcac' te p'ajbil soc peq'uel c'ohemex
ta stojol spisil ants-winiquetic,
como ma ba la acanantaybon te behetic cu'un,
soc ma pajaluc yac achahpanic ta scuenta te Ley.
Judá ma junuc yo'tan ta stojol Dios
10¿Yu'un bal ma junuc nax Jtatic ta jpisiltic?
¿Ma bal junuc nax te Dios te la spasotique?
¿Bin yu'un nix a hiche
te talel c'axel ya jlo'loy jbahtic,
te hich ya jbohlobtesbe sc'oblal
te chapbil-c'op la spas Dios soc te jme'jtatique?
11Judá ma junuc yo'tan ta stojol Dios,
la spas te bin ilobtic sba ta Israel soc ta Jerusalén,
como te Judá la sbohlobtesbe sc'oblal
te ch'ul awilal yu'un Jehová te c'ux ta yo'tan,
te bin ut'il nuhpun soc yantsil-nich'an
jun dios yu'un jyanlumetic.
12Te Jehová ac'a sloq'ues ta snahilpac' Jacob
te winic te hich ya spas,
te mach'a yiloj o te mach'a ya sjac',
aunque ya yich'be tal
smahtan Jehová te scuentahinej spisil.
13Pero ay to yantic te bintic yac apasic:
yac awahts'es ta ya'lel asitic
te scajtajib ta chiq'uel mahtanil yu'un Jehová,
ya x'oq'uex soc ya x'ahcanajex,
yu'un ma ba ya quilix te mahtanil,
ma ba tse'el co'tan ya jtsacbeyex ta ac'abic.
14Pero hich yac ajoc'oyic:
¿Bin yu'un? xchihex.
Como te Jehová ha testigo ta atojol
soc ta stojol te ants nuhpunat soc
te c'alal queremat to a,
te ma ba junix awo'tan ta stojol,
aunque ha amohlol soc ha achapoj ac'op soque.
15¿Ma bal junuc nax pasbil yu'un Dios,
te ha sbaq'uetal soc sch'uhlel?
¿Soc bin ya sle?
Ha ya sle ts'umbalil te jun yo'tanic ta stojol Dios.
Canantaya awo'tanic,
ma me xch'ay te jun awo'tan ta stojol awihnam
te la ata c'alal queremat to ahe.
16Como ya jp'aj te ya yihquitay sbahic,
xchi te Jehová te Dios yu'un Israel,
soc te ya sbohlobtes sba ta spasel bin chopol,
xchi te Jehová te scuentahin spisil.
Ha yu'un canantaya awo'tanic,
ma me xch'ay te jun awo'tan ta stojol.
Ya xnohpoj tal sc'ahc'alel ich'el ta c'op
17La awaq'uic luhbuc te Jehová
ta scaj te c'opetic awu'unique.
Hich yac ajoc'oyic:
¿Bin la jluhbtesatcotic a? xchihex.
Yu'un hich yac awalic:
Mach'ayuc a te ya spas bin chopol,
lec ta stojol Jehová,
lec yo'tan ta stojol, xchihex,
o te hich yac awalic:
¿Banti ay te Dios te toj ya xchahpanwan? xchihex.
Currently Selected:
Malaquías 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.