Zacarías 3
3
Nahalsitil sc'oblal muc'ul sacerdote Josué
1Patil la ya'bon quil te muc'ul sacerdote Josué teq'uel ta stojol te ch'ul a'bat yu'un Jehová, soc te Satanás teq'uel ta swa'el-c'ab yu'un ya slehbe smul. 2Te Jehová#3.2 Te Jehová, hich ya yal ta hebreo; ay yan antiguo libro te ya yal: Te ch'ul a'bat yu'un Jehová hich la yalbe te Satanás: ¡Jehová ya stijat ta c'op, Satanás! ¡Te Jehová te stsahoj Jerusalén, ya stijat ta c'op! Te winic ini ¿ma bal ha'uc jun xutumte' yac ta tihlel te la yich' loq'uesel ta c'ahc'? xchi.
3Te Josué teq'uel ta stojol te ch'ul a'bat yu'un Jehová, slapoj c'u'ul te bayel yabacul. 4Te ch'ul a'bat hich la yalbe ta mandar te mach'atic ayic ta stojol: Cholbeyahic loq'uel te sc'u' te ay yabacul, xchi.
Soc hich la yalbe te Josué: Ilawil, la jloq'uesbat amul, ya ca'batix alap buen t'ujbil c'u'ul, xchi.
5Patil hich la yal:#3.5 la yal: hich ya yal ta griego (LXX), ta hebreo ya yal: la jcal: A'beyahic spohtsil sjol te mayuc yabacul, xchi. Hich la ya'beyic spohtsil sjol te mayuc yabacul soc la ya'beyic slap buen t'ujbil c'u'ul; tey teq'uel a te ch'ul a'bat.
6Te ch'ul a'bat yu'un Jehová la stsits te Josué, hich la yalbe: 7Hich yaloj te Jehová te scuentahinej spisil:
Teme yac at'umbon te behetic cu'un,
soc teme yac ach'uhumbon spasel
te halbil mandariletic cu'une,
ya me acuentahimbon te jna
soc ya me acanantaybon te amaq'uetic cu'un,
soc ya ca'bat awawil
ta yohlil te mach'atic teq'uelic li'i.
8Muc'ul sacerdote Josué,
ha'at soc te amohloltac te ya xhuhcajic ta atojol,
te ha señahex yu'un te bin ya xc'oht ta pasel ta patil,
a'iya me awa'iy:
Ya quic' tal te ca'bat, ha te Spuhl.
9Ilawil te ton te la jcac' ta stojol Josué,
junax ay soc ay huqueb sit.
Ho'on nix ay bin ya jts'ihbay ochel tey a,
xchi te Jehová te scuentahinej spisil,
soc ta junax c'ahc'al
ya jloq'uesbe smul te q'uinal ini.
10Ta hich ora, xchi te Jehová te scuentahinej spisil,
talel c'axel yac awic' abahic ta huclej
ta ye'tal ats'usubilic soc ta ye'tal higuerahetic awu'unic, xchi.
Currently Selected:
Zacarías 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.