Zacarías 2
2
Iq'uel mach'atic bahemic ta chuquel
1Patil la jquil mohel, la jquil jtuhl winic te yich'oj ta sc'ab p'is yu'un ya sp'is. 2La joc'obe: ¿Banti ya xbahat? xchihon.
Hich la sjac'bon: Ya xbohon ta sp'isel te Jerusalén, ta sna'el jayeb te sjamalil soc jayeb te snahtile, xchi.
3Te c'alal yac ta bahel a te ch'ul a'bat te yac sc'opombelon, tal ta tahel yu'un yan ch'ul a'bat, 4hich halbot yu'un: Ahnimajan, halbeya te querem ini:
Mayuc sts'ahcul te Jerusalén
ta scaj te c'ax tsobol ants-winiquetic
soc chambahlametic te ya x'ayinic tey a.
5Ho'on sts'ahcul c'ahc' ya xc'ohon
ta sjoyobal, xchi te Jehová,
soc ya cac' ta ilel cutsilal ta yohlil, xchi.
6¡Bahanic! loc'anic ta ahnel ta q'uinal
te ay ta stojol norte, xchi te Jehová,
como ho'on la jpuquex bahel
ta schanebal ic' ta ch'ulchan, xchi te Jehová.
7¡Bahan, Sión, ha'at te nahinemat soc
te yantsil-nich'an Babilonia,
loc'an ta ahnel!
8Hich yaloj te Jehová te scuentahinej spisil, te la sticonon bahel ta stojol te nacionetic te la spojbeyex abiluquic:
Te mach'a ya spiquex,
hich c'ohem te ya spicbe sch'uhlel jsit.
9Ya jtoy jc'ab ta stojolic,
ya xpojbot sbiluquic
yu'un te a'batetic yu'unique, xchi.
Hich yac ana'ic a te ticombilon
yu'un te Jehová te scuentahinej spisil.
10C'ayojinan, tse'eluc awo'tan, yantsil-nich'anat Sión,
como ya xtalon ta nahinel ta awohlilic, xchi te Jehová.
11Ta hich ora bayel nacionetic
jun ya xc'ohtic soc te Jehová,
ha pueblo cu'un ya xc'ohtic,
soc ya xnahinon ta awohlil, xchi.
Hich yac ana'ic a te ticombilon
yu'un te Jehová te scuentahinej spisil.
12Te Jehová ya me yu'untay te Judá,
ha te bin ya yich' hilel ta ch'ul q'uinal,
soc yan buelta ya stsa xan te Jerusalén.
13¡Ac'a ch'abuc ta stojol Jehová
spisil mach'atic ayic ta bahlumilal,
como hahchemix ta ch'ul awilal banti nahinem!
Currently Selected:
Zacarías 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.