Zacarías 13
13
1Ta hich ora ya yich' jamel sloq'uib-ha' yu'un te sna David soc te mach'atic nahinemic ta Jerusalén scuenta spoquel mulil soc te bin bohloben sc'oblale. 2Ta hich ora, xchi te Jehová te scuentahinej spisil, ya jloq'ues ta q'uinal te sbihilic te loc'ombahetic, ma ba ya xna'otix; soc ya jloq'ueslan ta q'uinal te jalwanejetic soc te snopel bintic chopol.
3Teme ay to mach'atic ya yalic sc'op-jalwanej, hich ya xhalbotic yu'un te sme'stat: Ma ba ya xcuxajatix, como la awa'iy lot ta scuenta sbihil te Jehová, xchihic. Hich te sme'stat ya me slowic te c'alal ya yal sc'op-jalwanej. 4Ta hich ora ya xq'uexawic spisil te jalwanejetic yu'un te snahalsitic c'alal ya yalic sc'op-jalwanej; ma ba ya slapiquix te nuhcul te ay stsotsel yu'un ya ya'iyic lot. 5Tuhlutuhl hich ya yalic: Ma jalwanejucon, ya x'a'tejon ta q'uinal, ta jqueremil to a'tejon ta q'uinal, xchihic. 6Teme hich ya xjoc'obot: ¿Bin yu'un ehchenajem ac'ab? teme xchihe, hich ya sjac': Ha te la jquich' ehchentesel ta sna te camigotac, xchihic.
Ehchentesbil te jcanan yu'un Jehová
7¡Hahchan, espada, ta scontrahinel te jcanan cu'un,
ta scontrahinel te winic te ha jmohlol!
xchi te Jehová te scuentahinej spisil.
Mila te jcanan,
hich ya xpuhquic bahel te tuminchijetique,
ya cac' jc'ab ta scontrahinel
te tut tuminchijetique.
8Ta spisil te q'uinal, xchi te Jehová,
cha'tsal ta yoxtsalal ya yich'ic lajinel
soc ya xch'ayic bahel,
pero te jtsal xan ya xhil tey a stuquel.
9Te jtsal xan ini ya cotses ta c'ahc',
ya jlecubtes hich te bin ut'il ya yich' lecubtesel te plata,
ya jtsaj hich te bin ut'il ya yich' tsajel te oro.
Ya sc'oponon ta jbihil,
soc ho'on ya ca'iybe sc'opic.
Hich ya cal: Ha pueblo cu'un, xchihon;
hich me ya yal: Ha Dios cu'un te Jehová, xchi.
Currently Selected:
Zacarías 13: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
