Proverbios 30
30
Tsahbil c'opetic yu'un Agur
1Te tsahbil c'opetic yu'un Agur snich'an Jaqué. Te sc'op-jalwanej#30.1 O: snich'an Jaqué te ay ta Masa. Hich la yalbe te la yalbe te Itiel soc Ucal:
2Ho'on te c'ax mayuc bin ya jna' ta spisil winiquetic;
mayuc bin jna'oj scuenta ants-winic.
3Mayuc quich'oj p'ijil-o'tanil,
ma jna'be sba te Ch'ul Dios.
4¿Mach'a mohem bahel soc cohem tal ta ch'ulchan?
¿Mach'a la snop' ta sc'ab te iq'ue?
¿Mach'a la spots ta snahtil-c'u' te ha'etic?
¿Mach'a la schahpan spisil sti'il te bahlumilale?
¿Bin sbihil, soc bin sbihil te snich'ane?
Halbon ca'iy teme yac ana'e.
5Ha melel spisil te sc'op te Diose;
ha mahquilal yu'un
te mach'atic ya snac' sbahic ta stojol.
6Ma me xawa'be sobra te bin ya yal,
scuenta yu'un ma ba ya yutat,
te ya xchicnaj te la awa'iy lot.
7Ay cheb te bintic ya jc'ambat, Dios cu'un,
ma me xamuc ta awo'tan te c'alal ma to xchamon a:
8Loq'uesa ta jtojol te lot soc te lo'loywanej;
soc ma me xawac'on ta pobre o ta jc'ulej,
ha nax me xawa'bon te we'elil te ya xtuhun cu'une,
9yu'un teme ya xnoj jch'uht
ya wan jmucat ta co'tan,
soc hich wan ya cal:
¿Mach'a a te Jehová? xchihon;
o teme pobrehon ya wan ca'iy elec',
hich ya jbohlc'optaybe sbihil te Dios cu'une.
10Ma me xalehbe smul te a'bat ta stojol te yajwal,
ya wan yalbat chopol ac'oblal
soc yac awich' castigo yu'un.
11Ay mach'atic ya sbohlc'optay static
soc ma xyalbeyic lec sc'oblal te snanique.
12Ay mach'atic ya scuy sbahic te mayuc smulic,
pero ma ba lecubtesbil yu'un te bin bohlobenic yu'une.
13Ay mach'atic scuyoj sbahic ta muc' sc'oblalic,
soc toyol yac'oj sbahic ta sitic ta yilel te yantique.
14Ay mach'atic te ha espada c'ohem te yehic
soc te scha'am hich c'ohem te bin ut'il cuchillo
yu'un ya slajin a te pobrehetic
soc te mach'atic mayuc bin ay yu'unic.
15Ay cheb yantsil-nich'an te nap'ac te hich ya yalic:
A'bon, a'bon, xchihic.
Ay oxeb te bin ma xnoj sch'uhtic,
chaneb te mayuc bin ora ya yal:
Tic'onix a, ma xchihuquic:
16ha te yawil mach'atic chamenic,
te yawil alal te ma xhahch alal tey a,
te q'uinal te ma tic'uc ya ya'iy a te ha'e,
soc te c'ahc' te mayuc bin ora te ya yal:
Tic' a, te xchihe.
17Te sit te ma lecuc ya yil te stat
soc te ma sc'an ya sch'uhumbe smandar te snan,
ya xloq'uesot yu'un te jojetic yu'un sjuclej
soc ya xti'ot yu'un hosetic.
18Ay oxeb te bintic xcham co'tan yu'un,
chaneb te ma jna'be scuentahil:
19ha te sbe jxic ta toyol,
te sbe chan ta tontiquil,
te sbe barco ta yohlil mar,
soc te sbe querem ta stojol ach'ix.
20Hich ay te bin ya spas te j'antsinel-ants:
ya xwe' soc ya scus ye,
soc ya yal: Mayuc bin chopol jpasoj, xchi.
21Ay oxchahp te ya xnihc q'uinal yu'un,
chanchahp te ma xcuhch yu'un:
22ha te a'bat te ya x'och ta ajwalil,
te sonso te noj sch'uht,
23te ihlaybil ants te c'alal ya sta smamalal,
soc te criada te ha sjelol ya xc'oht te yajwale.
24Ay chaneb bintic tutic te ayic ta q'uinal,
pero c'ax hich sp'ijilic a te mach'atic p'ijique:
25te ts'isimetic ha pueblo te mayuc yip,
pero ya stsob swe'elic ta yorahil snahtil c'ahc'alel;
26te cohtometic#30.26 Yan yilel cohtom te ay li'i. ha pueblo te mayuc yip,
pero ya spas snahic ta tontiquil;
27te c'ulubetic te mayuc ajwalil yu'unic,
pero pajal xyomet ya xloq'uic bahel spisilic;
28te jt'ohloc te ya xhu' ta tsaquel ta c'abal,
pero ay ta sna ajwaliletic.
29Ay oxeb te t'ujbil ya xbehenic,
chaneb te mero t'ujbil ya xbehenic:
30ha te choj ay yip ta yohlil spisil te chambahlametic,
te mayuc bin ora ya suht ta spat;
31te toyba tatmut, te stat tentsun,
soc te ajwalil te ya yic' ta behel
te soldadohetic yu'une.
32Teme ta scaj asonsohil la atoy aba,
soc teme chopol anopoj te bin yac apase,
ac'a ac'ab ta awe.
33Teme ya yich' juyel te leche,
ya xloc' mantequilla tey a,
te mach'a tulan ya smaj sni',
ya xloc' sch'ich'el yu'un,
soc te mach'a ya shach ilimba,
ya xhahch c'op yu'un.
Currently Selected:
Proverbios 30: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.