Lamentaciones 3
3
Ay ta scuenta Dios smahliyel te aq'uel ta libre
1Ho'on te mach'a yiloj wocol
te tal ta scuenta te xul yu'un te yilimba te Diose.
2Ha la stenon bahelta yihc'al q'uinal,
ma ha'uc ta sacal q'uinal;
3ha la yac' tal sc'ab ta jtojol
bayel buelta, sjunal c'ahc'al.
4La yac' mamalubuc te jbaq'uetal soc te jnuhculel,
soc la swac'ticlambon jbaquel;
5la schahpan busambil lum ta jtojol
soc la sjoytayon ta bin ch'a soc wocol.
6La yihquitayon hilel ta yihc'al q'uinal,
hich te bin ut'il mach'atic namey chamic.
7La smacon ta jujujehch,
ma xhu' ya xloc'on bahel;
la yac' tal cadenahetic ta jtojol.
8Aunque ya x'awonon ta sc'anel coltayel,
ma ba ya ya'iybon te jc'ope.
9La smacbon jbe ta latsbil tonetic,
la yac' te chuhcul c'oht te be cu'une.
10Hich c'oht ta jtojol te bin ut'il oso
te yac smaclibel swe'el,
hich te bin ut'il choj te snac'oj sba.
11La showiyteson ta be, la sbutsticlanon;
jimbilon hilel yu'un.
12La snit te st'ihmalte',
la stojlinon ta ya'tejibalul t'ihmalte'.
13La slowbon jch'uht
ta ya'tejibalul t'ihmalte' te ay ta yawil yu'une.
14La jquich' tse'layel yu'un spisil te jlumale,
spisil ora ya stahonic ta labanel.
15La snojeson ta bin paj,
la syacubteson ta ch'ahco'.
16La swac'bon sbaquel que ta sjach'el hi',
la smucon ta stanul c'ahc'.
17Namal baht ta jtojol te lamal q'uinal,
ch'ayix ta co'tan te bin lec ta a'iyele.
18Hich la jcal: Lajix quip
soc laj te smuc'ul co'tan ta stojol Jehová.
19Na'bon te jwocol soc te jmel-o'tan,
te ch'ahco' soc te sch'ahe.
20Spisil ora ay ta co'tan,
ayon ta mel-o'tan yu'un.
21Pero ya cac' taluc ta co'tan ini,
ha yu'un ay smuc'ul co'tan:
22Ha ta scuenta sc'uxul yo'tan Jehová
te ma ba lajemotic,
como mayuc bin ora ya xlaj te sc'uxul yo'tane;
23yach'il ay ta jujun sab.
¡Mero stalel jun awo'tan!
24Hich ya cal ta co'tan:
Te bin ay cu'un, ha te Jehová;
ha yu'un ha smuc'ulinej co'tan stuquel, xchihon.
25Te Jehová lec bin ya spasbe
te mach'a ha ya smuc'ulin yo'tan,
te mach'a ya xlehot yu'une.
26Ha lec ch'abuc ta smahliyel
te coltayel yu'un te Jehová.
27Ha lec te ta squeremil to
ya yich' te yugo te winique.
28Ac'a shuhcan sba ta stuquel soc ac'a ch'abuc,
como ha te Dios te a'bot yu'une;
29ac'a yac' ta ts'ubilum te ye,
ya to wan sta smuc'ul yo'tan;
30ac'a yac' scho ta stojol
te mach'a ya x'ehchentesot yu'une,
soc ac'a ac'otuc ta q'uexlal.
31Te Jehová ma ba spisil ora
ya xp'ajawan.
32Aunque ya yac' wocol,
ha nix hich ya me sna'be yo'bolil sba,
hich te bin ut'il bayel te sc'uxul yo'tane.
33Como ma hichuc yo'tan te ya yac' wocol
soc te ya ya'be mel-o'tan te ants-winiquetique.
34Te ts'o'el ta teq'uel
spisil te jchuqueletic ta q'uinal,
35te sjinel te bin toj ta pasel ta stojol ants-winiquetic
ta stojol te Mach'a ay ta Toyol,
36te sjinel te bin toj ta chahpanel,
ma lecuc yo'tan yu'un te Jehová.
37¿Mach'a ya xhu' ya yal te ay bin ya xc'oht ta pasel
teme ma hichuc yaloj ta mandar te Jehová?
38¿Ma bal ha'uc ya xloc' ta ye te Mach'a mero toyol
te bintic lec soc te bintic ma lecuc ya xc'oht ta pasel?
39Te mach'a cuxul ¿bin yu'un ya x'och wulwonel
yu'un te castigo yu'un te smule?
40Ac'a jtsahtaytic ta lec te behetic cu'untic,
ac'a suhtucotic xan ta stojol Jehová.
41Ac'a jtoytic mohel co'tantic soc jc'abtic
ta stojol Dios ta ch'ulchan.
42La jle jmulcotic soc jtoyoj jbahcotic ta atojol,
ma ba la apasbotcotic perdón.
43La ajoytayotic ta sc'ahc'al awo'tan, la anutsotcotic;
la awa'iy milaw, ma ba la ana'botic yo'bolil jbahcotic.
44La apots aba ta tocal
scuenta yu'un ma ba ya xc'oht ta atojol te ya jc'oponatcotic.
45La awac'otic ta p'ajel soc ihlayel
ta yohlil te pueblohetique.
46Spisil te jcontracotic
la sjam yehic ta scontrahimbelotcotic;
47xiwel soc yaquil, jinel soc lajinel
c'ohemic ta jtojolcotic.
48Yac ta loq'uel ya'lel jsit hich te bin ut'il muc'ul ha',
yu'un te la yich' jinel te jlumale.
49Ma xquehchaj ta oc te ya'lel jsit,
mayuc banti ya scux yo'tan,
50ha to c'alal ya yil te Jehová
c'alal ta ch'ulchan.
51Ya ya'bon jmel co'tan te bin ya quil,
ta scaj te bin c'oht ta pasel ta stojol te yantsilel te jlumale.
52Mayuc scuentahil a la snutsonic te jcontratac
hich te bin ut'il ha'mal mut;
53cuxulon to a la yotsesonic ta hotbil ch'en,
la smaquic hilel ta ton te sti'ile;
54la smucbon jol te ha'etic,
hich la jcal: Ch'ayemon ya ca'iy, xchihon.
55La jc'oponat ta abihil, Jehová,
c'alal ta sc'ubulil te hotbil ch'en;
56la awa'iybon jc'op:
¡Ma xamac achiquin yu'un te wocol ya calbate!
57Nohpojat tal te bin ora la jc'oponat,
hich la awal: Ma xiwat, xchihat.
58Cajwal, c'opojat yu'un te jwocole,
la acoltaybon te jcuxlejale.
59Awiloj, Jehová, te bin ma stojiluc te bin la spasbone,
¡c'opojan ta jcuenta!
60Awiloj spisil te spacol la yaq'uic,
spisil te bin schapojic ta jcontra.
61Awa'iybeyej te labanel yu'unic,
spisil te bin schapojic ta jcontra;
62te bintic ya yalic yu'un scontrahimbelon,
te hich ya spasic sjunal c'ahc'al.
63Ilawil c'alal huculic soc c'alal teq'uelic,
ho'on c'ayojilon yu'unic.
64¡A'beyahic stoj, Jehová,
ha chican bintic spasojic!
65¡Ac'a tulanubuc yo'tanic,
ac'a taluc ta stojolic te chopol c'oblalil awu'une!
66¡Nutsa ta sc'ahc'al awo'tan, Jehová,
lajinlana ta ye'tal ch'ulchan!
Currently Selected:
Lamentaciones 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.