Lamentaciones 2
2
Te Cajwal la sjin Israel
1¡Ilawil bin ut'il te Cajwaltic la smuc ta yaxinal yilimba
te yantsil-nich'an Sión!
La sjin cohel ta ch'ulchan c'alal ta bahlumilal
te yutsilal Israel;
ma ba la sna'ix te scajtajib yoc
ta yorahil yilimba.
2Te Cajwaltic la sjin,
ma ba la sna'be yo'bolil sba;
soc sc'ahc'al yo'tan la sjinticlan
spisil te nahilpaq'uetic yu'un Jacob;
la sjin cohel ta lum
te ahnibal ts'ahquetic yu'un te Judá;
la spehc'an te ban c'alal scuentahinej
soc te príncipaletic yu'une.
3Ta sc'ahc'al yilimba
la slajimbe spisil yip te Israel.
Ta stojol te scontra
la sloq'ues te swa'el sc'ab ta stojol Israel,
la stsac c'ahc' ta Jacob
hich te bin ut'il nup'bil c'ahc'
te ya slajin spisil ta sjoyobal.
4La snit te st'ihmalte' hich te bin ut'il contra,
chapalix te swa'el sc'ab hich te bin ut'il contra,
la sjinticlan spisil te bintic t'ujbil ta ilel.
Ta snahilpac' yu'un te yantsil-nich'an Sión
la smal cohel yilimba hich te bin ut'il c'ahc'.
5Te Cajwaltic hich c'oht te bin ut'il contra,
jc'axel la sjin te Israel;
la sjinticlan cohel spisil te nahetic yu'un ajwalil,
la sjimbe cohel te ahnibal ts'ahquetic yu'un,
soc la yac' p'ohluc te mel-o'tan soc oq'uel
ta stojol te yantsil-nich'an Judá.
6La sjin te snahilpac'
hich te bin ut'il yaxna ta ts'umbil nichimetic,
la sjin te yawil banti ya stsob sbahique.
Te Jehová la yac' ch'ayuc ta o'tanil ta Sión
te q'uinetic soc te sc'ahc'alel cux-o'tan;
soc ta scuenta sc'ahc'al yilimba
la sp'aj te ajwalil soc te sacerdote.
7Te Cajwaltic la sp'aj
te scajtajib ta chiq'uel mahtanil yu'un
soc mayuc sc'oblal c'oht ta yo'tan
te ch'ul awilal yu'une;
la ya'be ta sc'ab scontra
te spahc'ul te nahetic yu'un ajwalil;
awonic ta sna Jehová
hich te bin ut'il ta sc'ahc'alel q'uin.
8Te Jehová la snop te ya sjin cohel
te ts'ahquetic yu'un te yantsil-nich'an Sión.
La st'im bahel te sp'isojibal,
ma ba la scom sc'ab ta sjinel.
La ya'be smel yo'tan te busambil lum soc te ts'ahc,
ta junax ch'ayic bahel.
9Jihnic cohel c'alal lum te ochibaletic yu'un;
la swac'ticlan soc la sjinticlan
te sc'atal-te'eletic yu'un.
Te ajwalil soc te príncipaletic yu'un
ayic ta yohlil te mach'atic ma ba yich'ojic te ley,
soc te jalwanejetic yu'un
mayuc bin ya x'a'bot yilic ta snahal sitil yu'un Jehová.
10Te mamaletic yu'un te yantsil-nich'an Sión
ya shuhcan sbahic ta lum soc ma ba ya xc'opojic;
ya yaq'uic tan ta sjolic
soc ya slapic pac' yu'un mel-o'tan.
Te ach'ixetic yu'un Jerusalén
ya snijan sbahic c'alal ta lum.
11Ya xlaj yip jsit yu'un te oq'uele,
ya syuc' sba ya ca'iy te jch'uhte;
ya xmal cohel jch'a ta lum
ta scaj te la yich'ix jinel te pueblo cu'une;
te alaletic soc te chu'alaletic
yaquic ta lajel ta callehetic yu'un te pueblo.
12Hich ya yalbeyic te snanic:
¿Banti ay te pan soc te vino? xchihic
c'alal ya xyahlic ta callehetic yu'un te pueblo
hich te bin ut'il mach'atic ehchentesbilique.
13¿Bin ya calbat ac'oblal?
¿Mach'a ya jpajat soc,
yantsil-nich'anat Jerusalén?
¿Mach'a ya jpajat soc
yu'un ya jmuc'ubtesbat awo'tan,
yantsil-nich'anat Sión?
Te ehchen awu'un hich smuc'ul te bin ut'il te mar,
¿mach'a ya xhu' ya slecubtesat?
14Te jalwanejetic awu'un la yilbat
te bin ma meleluc soc te asonsohil,
ma ba la yaq'uic chicnajuc te amul
yu'un hich ma ba ya xbahat ta chuquel a,
ha la yalbat awa'iy
lotil sc'op-jalwanej soc howil c'op.
15Spisil te mach'atic ya xc'axic ta be,
ya smaj sc'abic ta atojol,
ya xuxubajic soc ya sjimulan sjolic
ta stojol te yantsil-nich'an Jerusalén:
¿Ha bal te pueblo ini te ya yalic te c'ax t'ujbil,
te ha tse'el-o'tanil yu'un spisil te q'uinale? xchihic.
16Spisil te acontratac ya sjam yehic ta atojol,
ya slabanex soc ya sc'uxuxan yehic,
hich ya yalic: ¡La jlajintic!
Ha te sc'ahc'alel te la jmahliytic;
la jtahtiquix, la jquiltiquix, xchihic.
17Te Jehová la spas
te bin snopoj ta yo'tan,
la sc'ohtes ta pasel te sc'op
te nameyix la schahpambe sc'oblale.
La sjin, ma ba la sna' yo'bolil sbahic,
la yac' te tse'el yo'tan ta atojol te acontra
soc la stoybe yip te acontrataque.
18Te yo'tanic te ants-winiquetic
ya x'awonic ta stojol te Cajwaltique.
¡Yantsil-nich'anat Sión,
maluc ya'lel asit c'ahc'al ahc'abal
hich te bin ut'il be-ha'!
¡Ma me xacux awo'tan,
ma xawa'be scux yo'tan te asite!
19¡Hahchan, awonan ta ahc'abal,
c'alal ya xhahch jcanan!
Mala cohel ta stojol Cajwaltic
te bintic ay ta awo'tan,
toya mohel ac'ab ta yalbeyel wocol
yu'un te scuxlejal te alaletic awu'un,
te ya xch'ay q'uinal ya ya'iy yu'un wi'nal
ta yochibal spisil te callehetique.
20¡Ilawil, Jehová, nopa awa'iy
mach'a hich apasbeyej!
¿Lec bal te ya sti'ic yalatac te antsetic,
te tut alaletic te cuentahimbilic yu'unique?
¿Lec bal te ya yich'ic milel ta ch'ul awilal awu'un
te sacerdote soc te jalwanej?
21Limilic ta callehetic te alaletic soc mamaletic;
lajic ta espada te queremetic soc ach'ixetic cu'un.
La amajticlan ta yorahil awilimba;
la alajinlan, ma ba la ana'be yo'bolil sbahic.
22La awic'ticlan tal ta bayuc te jcontratac,
hich te bin ut'il ta sc'ahc'alel q'uin.
Ta sc'ahc'alel yilimba Jehová
mayuc mach'a col, mayuc mach'a cuxul hil.
Te mach'atic la jcoltes soc te la jcanantay,
¡lajinot yu'un te jcontrahe!
Currently Selected:
Lamentaciones 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.