Isaías 66
66
Castigohetic yu'un Jehová soc ya xcha' yich yip Sión
1Hich ya yal te Jehová:
Ha huctajibal cu'un te ch'ulchan,
soc ha scajtajib coc te bahlumilal.
¿Banti ay te na te yac apasbonique?
¿Banti ay te awilal yu'un ya jcux co'tan a?
2Ha pasticlambil ta jc'ab spisil ini,
hich chicnaj spisil, xchi te Jehová.
Pero ha ya quil te mach'a pobre
soc te ya xnihc yu'un te jc'ope.
3Te mach'a ya yac' toro scuenta milbil mahtanil
hich c'ohem te bin ut'il mach'a ya smil jtuhl winic;
te mach'a ya yac' tuminchij scuenta milbil mahtanil
hich c'ohem te bin ut'il
mach'a ya swac'be snuc' ts'i';
te mach'a ya yac' harina scuenta mahtanil
hich c'ohem te bin ut'il
mach'a ya yac' mahtanil sch'ich'el chitam;
te mach'a ya schic' pom
hich c'ohem te bin ut'il
mach'a ya sch'uhuntay loc'omba.
Ha nix la stsahic te behetic yu'unic,
soc la smulanic te bintic ihlaybilic,
4ha nix hich ya jtsahbe wocoletic yu'unic,
soc ya jticon ta stojolic te bin ya xi'ique;
como te c'alal la jquic', mayuc mach'a la sjac',
c'opojon, mayuc mach'a la ya'iybon jc'op;
ha la spasic te bin chopol ta jtojol
soc la stsahic te bintic ma jmulan, xchi.
5A'iybeya awa'iyic te sc'op Jehová,
ha'ex te ya xnihquex ta stojol te sc'ope:
Te awermanotac te ya sp'ajex
soc te parte ya yaq'uex ta scaj te jbihile,
hich la yalic:
Ac'a yich' halbeyel yutsil sc'oblal te Jehová,
yu'un hich ya quiltic a te stse'elil awo'tanic, xchihic.
Pero ya me stahic q'uexlal.
6¡Xjuyet ya xchicnaj c'op ta pueblo,
ya xchicnaj c'op ta Templo,
ha sc'op te Jehová
te ya ya'be stoj te scontratac!
7¡Ma to xhahch sc'uxul a, ayin yal;
ma to xhahch sc'uxul a la yayintes querem!
8¿Mach'a hich ya'iyej?
¿Mach'a hich yiloj?
¿Ya bal x'ayin jun pueblo ta junax c'ahc'al?
¿Ya bal xchicnaj jun nación ta jts'ihn nax?
Pero c'alal hahchel to sc'uxul yu'un alajel te Sión,
la yayintes yalatac.
9Ho'on te ya cac' te ya x'alaj,
¿ma bal yacuc cac' te ya x'ayin? xchi te Jehová.
Ho'on te ya cac' te ya x'ayin,
¿ya bal jcom yu'un ma x'ayin? xchi te Dios awu'une.
10Bayeluc me yutsil awo'tanic soc Jerusalén,
tse'eluc me awo'tanic yu'un,
apisilic te c'ux yac awa'iy ta awo'tanic;
nojeluc me yutsil awo'tanic,
apisilic te yac amel awo'tanic ta scuenta,
11yu'un ya xchu'unex soc ya xnoj ach'uhtic
yu'un te ch'u'ul te ya yac' muc'ul-o'tanil;
yac awuch'ic soc yac amulambeyic
te yutsilal te c'ax bayele.
12Como hich ya yal te Jehová:
Ho'on ya ca'be lamal q'uinal ta stojol
hich te bin ut'il muc'ul-ha',
soc te sc'ulejal te nacionetic
ya cac' te ya xtal ta stojol
hich te bin ut'il snojel ha' te ya xmahl loq'uel;
ya me xchu'unex, ya xpetotex bahel ta sc'ab,
soc ya xhuhcanotex ta sjol yacan.
13Hich te bin ut'il nanil
te ya smuc'ubtesbe q'uinal ya'iy te yale,
hich ya jmuc'ubtesbeyex q'uinal awa'iyic te ha'exe,
soc ta Jerusalén
ya xmuc'ubtesot q'uinal yac awa'iyic, xchi.
14Te c'alal yac awilic ini, tse'el awo'tanic yu'un,
soc te abaq'uetalic hich ya x'ach'ub te bin ut'il te ha'male.
Ya x'a'bot yilic te sc'ab Jehová te a'batetic yu'une,
soc ya x'a'bot yilic te yilimba te scontrataque.
15Como ilawil, te Jehová ya xtal soc c'ahc',
te carretahetic yu'un hich ayic te bin ut'il sutu-ic',
yu'un ya yac' tal sc'ahc'al te yilimba,
soc ya xtal soc yat c'ahc' te utel yu'une.
16Como te Jehová ya schahpan
soc c'ahc' soc espada spisil ants-winiquetic;
bayel mach'atic ya xlajinotic yu'un te Jehová.
17Te mach'atic ya sch'ultes sbahic
soc te ya slecubtes sbahic
yu'un ya x'ochic ta nichimaltic,
te ya st'unic ochel te mach'a ay ta yohlil,
soc te mach'atic ya sti'ic chitam,
ch'o soc bintic ilobtic sba,
pajal ya xlajic, xchi te Jehová.
18Como jna'oj bin yilel te ya'telic soc te bin snopojic; ya sta yorahil te ya yich' tsobel spisil te nacionetic soc c'opiletic: ya xtalic soc ya me yilbonic te cutsilale. 19Ya cac' jun seña ta yohlilic, soc te mach'atic cuxul hilic ya jticon bahel ta stojol te nacionetic: ha ta Tarsis, ta Put soc te Lud (te ya sna'ic yaq'uel t'ihmalte'), ta Tubal, ta Javán,#66.19 O: Grecia soc ta ti'ti'mar te namal ayic te ma ba ya'iybeyejonic jc'oblal soc ma ba yilojic te cutsilale. Ya me spuquic ta halel te cutsilal ta stojol te nacionetique.
20Ya me yiq'uic tal spisil te awermanotac ta bayuc ta nacionetic scuenta mahtanil ta stojol Jehová ta ch'ul wits cu'un; ya xtalic ta cawuhetic, carretahetic, sillahetic te q'uechbilic, ta mula soc camellohetic, xchi te Jehová. Ya me yiq'uic tal hich te bin ut'il te israeletic ya yich'ic tal mahtaniletic yu'un harina ta pocticlambil yawiletic ta sna te Jehová. 21Soc ya jtsa ta yohlilic mach'atic ha sacerdotehetic soc levitahetic ya xc'ohtic, xchi te Jehová.
22Hich te bin ut'il stalel ya xhil ta jtojol
te yach'il ch'ulchan soc bahlumilal te ya jpas,
hich stalel ya xhil te ats'umbalic
soc te abihilique, xchi te Jehová.
23Ta yach'il u c'alal ta yan yach'il u,
soc ta sc'ahc'alel cux-o'tan
c'alal ta yan sc'ahc'alel cux-o'tan,
spisilic ya me xtal squejan sbahic
ta jtojol, xchi te Jehová.
24Ya me xloq'uic bahel
soc ya me yilbeyic te chamen sbaq'uetalic
te ants-winiquetic te la stoy sbahic ta jtojol;
como ma ba ya xcham te shahalic,
soc ma ba ya xtup' te sc'ahc'alique.
Ihlaybil ya xc'ohtic
yu'un spisil ants-winiquetic, xchi te Jehová.
Currently Selected:
Isaías 66: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.