Isaías 65
65
Te castigo yu'un jtoybahetic
1Hich ya yal te Jehová: La jcac' jba ta lehel
yu'un te mach'atic ma ba yac sjoc'obelonic,
ha la stahonic te mach'atic ma ba la slehonic.
Hich la jcalbe te nación
te ma ba la sc'opononic ta jbihil:
Li' ayoni, li' ayoni, xchihon.
2Sjunal c'ahc'al la jach jc'ab
ta yiq'uel tal jun toyba pueblo
te yac ta behel ta be te ma lecuc,
te ya st'unic bahel te snopojibal yu'unique;
3jun pueblo te ta mero jsit
ya yac' ilinucon spisil ora,
ya yac' milbil mahtaniletic ta ts'umbil nichimetic
soc ya schic' pom ta sba ladrillohetic;
4ya shuhcan sbahic ta yohlil te muquenaletic
soc ya xc'ax ahc'abal yu'unic ta banti muquen ay;
ya sti'ic chitam,
soc ay ta oxom yu'unic
ya'lel te bin bohloben sc'oblal;
5hich ya yalic: Hilan tey a, ma me xnohpojat tal,
como c'ax hich ch'ultesbilon a
te bin ut'il te ha'ate, xchihic.
Te ants-winiquetic ini ha ch'ahil ta jni',
ha c'ahc' te ya xtihl sjunal c'ahc'al.
6Ilawil, ha ts'ihbabil ta jtojol,
ma ba ya xch'abon,
ya me ca'be stojic hich te bin ut'il ya sc'an,
ya ca'be stojic tey nix ta stojolic,
7ta scaj amulic
soc smul te ame'atatic, xchi te Jehová,
Yu'un la schiq'uic pom ta witsiltic
soc la sbohlc'optayonic ta tsehletic;
ha yu'un ya cac' ta stojolic
te stojol bintic la spasic ta nahil, xchi.
8Hich ya yal te Jehová:
C'alal ay mach'a ya sta ya'lel ta jchej sit ts'usub,
hich ya yal:
Ma me xawixtalan,
como ay bendición tey a, xchi,
hich nix ya jpas ho'on ta stojol te a'batetic cu'un,
ma ba ya jin spisilic.
9Ya cac' ya xloc' sts'umbal Jacob,
soc te ayuc mach'atic ta Judá
te ya yich'beyic te witsiltic cu'une;
te mach'atic tsahbilic cu'un
ya me yu'untayic te q'uinale,
tey ya xnahinic a te a'batetic cu'une.
10Te Sarón ha yawil tuminchijetic ya xc'oht,
soc te sjuclej yu'un Acor
ha yawil wacaxetic ya xc'oht
yu'un te pueblo cu'un te ya slehonique.
11Yan te ha'ex te yac awihquitayic te Jehová
soc te ya xch'ay ta awo'tanic te ch'ul wits cu'un,
te yac awa'beyic we'elil te dios Fortuna
soc te yac achahpambe capbil vino te dios Destino,
12ho'on ya cac' te ya xlajex ta espada,
soc apisilic yac aquejan abahic ta stojol te lajele.
Como la jquiq'uex, pero ma ba la ajac'bonic,
c'opojon, pero ma ba la awa'iybonic;
ha la apasic te bin chopol ta jtojol
soc la atsahic te bin ma jmulan, xchi te Jehová.
13Ha yu'un hich ya yal te Cajwaltic Jehová:
Te a'batetic cu'un ya me xwe'ic,
yan te ha'exe ay awocolic ta wi'nal;
te a'batetic cu'un ya me x'uch'ic,
yan te ha'exe ayex ta taquinti'il;
te a'batetic cu'un tse'el yo'tanic,
yan te ha'exe ya xhilex ta q'uexlal;
14te a'batetic cu'un
ya xc'ayojinic soc yutsil yo'tanic,
yan te ha'exe ya x'awonex
yu'un sc'uxul swocol te awo'tanic
soc ya x'ahcanajex yu'un pich'il-o'tanil.
15Te mach'atic tsahbilic cu'un
ya me stuhumbeyex abihilic
ta scuenta sc'anel castigo.
Te Cajwaltic Jehová ya me smilex,
yan te a'batetic yu'un
ya yac'ticlambe yan sbihilic.
16Mach'ahuc a te ya yac' bendición,
ha ya spas ta scuenta te Dios yu'un te bin smelelil;
soc mach'ahuc a te ay bin ya yal ta jamal,
ha ya spas ta scuenta te Dios yu'un te bin smelelil;
como te wocoletic te c'axemiquix
ya xch'ay ta o'tanil
soc ma ba chicanix ta ilel cu'un.
Yach'il ch'ulchan soc bahlumilal
17Ilawil, ya jpas yach'il ch'ulchan
soc yach'il bahlumilal.
Te bin ay ta nahil mayuquix ta na'el,
jc'axel ma xna'otix.
18Ay me yutsil awo'tanic
soc stse'elil awo'tanic spisil ora
yu'un te bintic ya jpasticlan,
yu'un ya cac' te ha yutsil-o'tanil
ya xc'oht te Jerusalén
soc te ha yutsil q'uinal ya xc'oht
te ants-winiquetic yu'une.
19Bayel me yutsil co'tan ya ca'iy yu'un te Jerusalén
soc tse'el me co'tan yu'un te pueblo cu'une;
mayuquix bin ora
ya x'a'iyot oq'uel o aw tey a.
20Ma me ayuquix alal
te jun cheb nax c'ahc'al ya xcuxaj,
soc ma me ayuquix mamal
te ma ba ya sts'acay yorahil;
como ya xcuyot ta alal to
teme ya xcham ta ho'winic (100) ya'bilal,
soc te mach'a ma sta ho'winic (100) ya'bilal
ya xcuyot ta ma lecuc sc'oblal.
21Ya spasic nahetic soc ya xnahinic tey a,
ya sts'unic ts'usubiltic soc ya slo'beyic sit.
22Ma ba ya spasic nahetic
te yan mach'atic ya xnahinic tey a,
soc ma ba ya ya'iy ts'umbajel
te yan mach'a ya swe'.
Como te yorahil te pueblo cu'un
hich ya xc'oht te bin ut'il jtehc' te',
te mach'atic tsahbilic cu'un
ya me ya'iybe yutsilal te ya'tel sc'abique.
23Ma ba tojol nax ya x'a'tejic,
soc ma ba ya yalatay alaletic
te ma lecuc sc'oblal ya xc'ohtic;
como ha sts'umbalic
te mach'atic yich'ojic bendición yu'un Jehová,
ha'ic nix soc te sts'umbalique.
24Ma to x'awonic a te ya jac'be sc'opic;
c'alal yaquic ta c'op a ya ca'iybe te sc'opique.
25Te ha'mal-ts'i' soc te alal-tuminchij
ya me sjoquin sbahic ta we'el,
te choj ya me swe' ac
hich te bin ut'il j'a'tel-wacax,
yan te chane ya me swe'elin ts'u'lum.
Ma ba ya yuts'inic soc ma ba ya sjinic
ta spisil te ch'ul wits cu'un, xchi te Jehová.
Currently Selected:
Isaías 65: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.