Oseas 2
2
Te sc'uxul yo'tan Jehová ta stojol te pueblo yu'un te ma junuc yo'tan
1Halbeyahic te awermanotac winiquetic:
Pueblo cu'un,#2.1 Pueblo cu'un: Ammi, xchi ta hebreo. xchihex,
soc halbeyic te awermanatac antsetic:
Na'bil yo'bolil sba,#2.1 Na'bil yo'bolil sba: Ruhama, xchi ta hebreo. xchihex.
2¡Halbeyahic smul ananic,
halbeyahic smul,
como ma quihnamuc,
soc ma smamalalucon!
Ac'a yihquitay hilel ta stojol te antsinel yu'un,
te yajmul ta banti stahn.
3Teme ma'uque, ya jwahtan,
hich watal ya xhil cu'un te bin ut'il te c'alal ayine;
hich ya cac' te bin ut'il jochol taquin q'uinal,
ya jc'atp'un ta taquin q'uinal,
soc ya jmil ta taquinti'il.
4Ma ba ya jna'be yo'bolil sba te yalatac,
como ha alaletic yu'un antsinel.
5Como la yac' sba ta antsinel te snanic,
q'uexlaltic sba te mach'a la yalatay.
Como hich la yal:
ya jt'un bahel te mach'atic ya smulanon,
te ya ya'bonic jwe'el soc ha',
stsotsel tuminchij soc lino,
aceite soc te bin ya cuch', xchi.
6Ha yu'un ya joybe ta ch'ix te be yu'une,
ya ca'be ts'ahc ta sjoyobal
scuenta yu'un ma ba ya sta te behetic yu'une.
7Ya st'un te mach'atic ya xmulanot yu'un,
pero ma ba ya sta;
ya sle, pero ma ba ya sta ta lehel.
Hich me ya yal:
Ya suhton bahel ta stojol te jmamalal ta nahilal,
como ha lec xan ayon a te bin ut'il ta ora ini, xchi.
8Ma ba la sna'
te ho'on la jca'be te trigo, vino soc te aceite;
te la jp'ohltes te plata soc te oro
te la smahtantesic a te Baal.
9Ha yu'un ya jcha'ich' te trigo ta yorahil
soc te vino cu'un te c'alal ya yich' pasel;
ya jloq'uesbe te stsotsel tuminchij soc te lino cu'un
te la jca'be yu'un ya smuc sba a.
10Yo'tic ya cac' chicnajuc te sq'uexlal
ta stojol te mach'atic mulanot yu'une,
mayuc mach'a ya xcoltayot loq'uel ta jc'ab yu'un.
11Ya jch'aybe spisil te stse'elil yo'tan,
te q'uinetic yu'un, te yach'il u, c'ahc'aletic yu'un cux-o'tanil,
soc spisil te muc'ul q'uinetic ya spas.
12Ya jlajimbe te ts'usubiletic soc te higuerahetic yu'un,
te hich la yalbe sc'oblal:
Ha jtojol te la ya'bonic
te mach'atic ya smulanon, te xchihe.
Ya jc'atp'un ta spimil q'uinal,
ya xwe'otic yu'un te ha'mal chambahlametique.
13Ya ca'be castigo yu'un te jayeb c'ahc'al
te la schic'be pom te baaletic,
te c'alal la sch'ahl sba ta ch'ocowiletic soc uhaletic
soc la st'un bahel te mach'atic mulanot yu'un,
te la sch'ayon ta yo'tan, xchi te Jehová.
14Ha scuentahil te ya jmon talel;
ya quic' bahel ta jochol taquin q'uinal
soc ya cutsil-c'opon.
15Tey ya jsutbe a te ts'usubiletic yu'un,
soc ya cac' te ha yochibal smuc'ul-o'tanil
ya xc'oht te spamlej Acor.#2.15 Acor: Jinel o pehc'anel, xchi.
Tey ya xc'ayojin a hich te bin ut'il c'alal ach'ix to a,
hich te bin ut'il te bin c'ahc'alil loc' tal ta Egipto.
16Ta hich ora, xchi te Jehová,
ya ya'bon jbihilin Ishi, #2.16 Ishi: Jmamalal, xchi.
ma ba ya ya'bonix jbihilin Baali.#2.16 Baali: Baal cu'un, o cajwal, xchi.
17Como ya jloq'uesbe ta ye te sbihilic te baaletic,
mayuquix bin ora ya yalbe te sbihilique.
18Ta hich ora ya jchap c'op ta scuenta
soc te ha'mal chambahlametic,
te mutetic ya xwihlic ta toyol,
soc te chanetic ta q'uinal.
Ya jloq'ues ta q'uinal te t'ihmalte',
te espada soc te guerra,
soc ya cac' te jun awo'tan ya xwayat.
19Ya quihnaminat sbahtel q'uinal,
ya quic'at ta scuenta bin stojil ta pasel,
stojil chahpanel, cux-o'tanil soc sna'beyel yo'bolil aba.
20Ya quihnaminat ta scuenta jun co'tan ta atojol,
ya me ana'be sba te Jehová.
21Ta hich ora ya jac'be sc'opic, xchi te Jehová;
ya jac'be sc'op te ch'ulchan,
te ch'ulchan ya sjac'be sc'op te lumq'uinal,#2.21 Ha te ya yac' tal ha'al.
22te lumq'uinal ya sjac'be sc'op#2.22 Ya yac' sitinuc. te trigo, vino soc aceite,
ha'ic ya sjac'beyic sc'op te Jezreel.#2.22 Ya yaq'uic te ay bintic ay ta Jezreel.
23Ya jts'un ta q'uinal yu'un cu'un ya xc'oht;
ya jna'be yo'bolil sba te Lo-ruhama,#2.23 Ilawil 1.6.
hich ya calbe te Lo-ami:#2.23 Ilawil 1.9.
Ha'at pueblohat cu'un, xchihon,
soc hich ya yalbon:
Ha'at Diosat cu'un, xchi.
Biblia Tzeltal Bachajon © Sociedad Bíblica de México, A.C., 2006.