Ezequiel 3
3
1Hich la yalbon: Snich'anat winic, we'an te bin ay ta atojol, we'an te balbil hun ini, patil bahan, c'opona te sna Israel, xchi.
2Hich la jam que, la ya'bon jwe' te balbil hune. 3Hich la yalbon: Snich'anat winic, we'a te balbil hun te ya ca'bat, nojesa ach'uht a, xchi. Hich la jwe', mero chi', pajal soc chab.
4Hich la yalbon: Snich'anat winic, bahan ta stojol te sna Israel, halbeya te jc'ope. 5Como ma ba ticombilat ta stojol jun pueblo te chuhcul sc'op o te wocol ta a'iyele, pero ta stojol te sna Israel; 6ma ha'uc ta stojol bayel pueblohetic te ma na'biluc bin ya yalic o te wocol ta a'iyel, te ma xhu' awu'un sna'beyel scuentahile. Te yacuc jticonat bahel ta stojolic, ya ya'iybat ac'op te hichuque. 7Pero te sna Israel ma ba ya sc'an ya ya'iybat ac'op, como ma sc'an ya ya'iybonic te jc'ope; como spisil te sna Israel tulan sit yelawic soc macal yo'tanic. 8Ilawil, la jcac' te tulan ya xc'oht asit awelaw ta stojol te sit yelawique. 9Hich stulanil la jca'bat asit awelaw te bin ut'il stulanil te diamante-ton, te c'ax hich stulanil a te bin ut'il yantic tonetic. Ma xaxi', ma xiwat ta stojolic, como ha jun toyba pueblo, xchi.
10Hich la yalbon: Snich'anat winic, ac'a ta awo'tan spisil te bin ya calbat, a'iya me awa'iy ta lec. 11Patil bahan ta stojol alumal te ic'otic bahel ta chuquel, c'opona; hich me xawalbe: Hich yaloj te Jehová, te Ajwalil, xchihat, teme ya ya'iyic o teme ma ba ya ya'iyique.
12Te espíritu la slicon hahchel, ta jpat la jca'iy c'op te mero tulan, te hich la yal: ¡Ac'a yich' halbeyel sc'oblal te yutsilal Jehová c'alal ta banti ay te yawile! xchi. 13Soc la jca'iy te sc'op te xiq'uic te bintic cuxajtic te ya stahticlan sbahic, soc sc'opic te yoc carretahetic te ayic ta stojolic, hich sc'opic te bin ut'il chahwuc. 14Te espíritu la slicon hahchel, la yic'on bahel; pich'il co'tan soc ilin co'tan bahel, tulan stsacojon a te sc'ab Jehová. 15C'ohon ta stojol te jchuqueletic te ayic ta Tel-abib, te nahinemic ta sti'il te muc'ul-ha' Quebar, la juhcan jba ta yohlilic. Tey hilon huqueb c'ahc'al a, ma ba la jna' bin ya jpas.
Te j'il-q'uinal yu'un Israel
16C'alal ts'acay te huqueb c'ahc'al, tal ta jtojol te sc'op Jehová, hich la yalbon: 17Snich'anat winic, ho'on la jcac'atix ta j'il-q'uinal yu'un te pueblo Israel; ha yu'un a'iybon awa'iy te jc'op soc tsitsa te pueblo ta jcuenta. 18Teme ya calbe te mach'a chopol yo'tan: Ya me xlajat, teme xchihone, teme ma ba yac awalbe te ya yihquitay hilel te schopol a'tel, yu'un hich ya xhu' ya xcuxaj a, te mach'a chopol yo'tan ya me xlaj ta scaj te smule, pero ya ca'bat ta acuenta te sch'ich'ele. 19Pero teme yac atsits te mach'a chopol yo'tan, pero ma ba ya sc'an ya yihquitay hilel te schopolil soc te chopol be yu'une, ya me xlaj ta scaj te smule, pero ha'at ya xcolat ta libre. 20Soc te mach'a toj yo'tan, teme ya yihquitay hilel te tojil-o'tanil yu'un, teme ya spas te bin chopole, teme ya cac' te bin ya sc'ohchin yoc a, ya me xlaj, como ma ba la atsits. Ya me xlaj ta scaj te smule, te bintic toj la spasticlan ma ba ya x'ich'otic ta cuenta; pero ya ca'bat ta acuenta te sch'ich'ele. 21Pero teme yac atsits te mach'a toj yo'tan scuenta yu'un ma ba ya sle smul, teme ma ba ya sle smule, ya me xcuxaj, como la yich' tsitsel, soc te ha'ate ya xcolat la libre, xchi.
Uma'ub Ezequiel
22Tal sc'ab Jehová ta jtojol tey a, hich la yalbon: Hahchan, loc'an bahel ta spamlej, tey me ya jc'oponat a, xchi. 23Hich hahchon bahel, loc'on bahel ta spamlej. Tey ay a te yutsilal te Jehová, hich te bin ut'il te yutsilal la jquil ta sti'il te muc'ul-ha' Quebar; la jpahcan jba c'alal ta lum, la jca'be sta lum te jti'bahe. 24Hich te espíritu och ta co'tan, la yac' tehc'ajucon, la sc'oponon, hich la yalbon: Bahan, maca aba ta ana. 25Ha'at, snich'anat winic, ya me schucat ta lazo, ya me awich' chuquel yu'unic scuenta yu'un ma xhu' ya xloc'at bahel ta yohlilic. 26Ya cac' te ya slap' sba awac' ta apajaj, hich uma' ya xc'ohat, ma ba ya xhu' yac atsitsticlan, como ha jun pueblo te stoyoj sbahe. 27Pero teme ay bin ya calbat, ya jambat awe soc hich me xawalbe: Hich yaloj te Jehová, te Ajwalile. Te mach'a ya sc'an ya ya'iy, ac'a ya'iy; te mach'a ma sc'an ya ya'iy, manchuc, como ha jun pueblo te stoyoj sba, xchi te Jehová.
Currently Selected:
Ezequiel 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.