Éxodo 28
28
Te sc'u' sacerdotehetic
1Ac'a taluc ta atojol te abanquil Aarón soc snich'nab scuenta yu'un ha sacerdotehetic ya xc'ohtic cu'un ta yohlil te snich'nab Israel; te Aarón soc snich'nab, ha te Nadab, Abiú, Eleazar soc Itamar. 2Ya me apasbe ch'ul c'u'uletic yu'un te abanquil Aarón scuenta yutsil soc yich'el ta muc'. 3Halbeya spisil te mach'atic ay sp'ijil yo'tanic, ha te mach'atic la jca'beyix sp'ijil yo'tanic, te ya me spasbeyic c'u'uletic yu'un Aarón te hich parte ya x'ac'ot scuenta sacerdote cu'un ya xc'oht. 4Te c'u'uletic ya spasic, ha te bolsa pac' ya xc'oht ta stahn, te efod, nahtil-c'u'ul, muc'ul c'u'ul te ch'albil ta ts'isel, spixjol pac', soc te schuhquil sch'uhte. Ya me spasic te ch'ul c'u'uletic yu'un te abanquil Aarón soc te snich'nab scuenta yu'un ha me sacerdotehetic ya xc'ohtic cu'un. 5Ya me stuhunic oro, soc yax, chi'in-yax soc tsajal estambre, soc ts'otbil lino.
6Ya me spasic te efod#28.6 Ilawil te nota ta 25.7 ta oro, yax, chi'in-yax soc tsajal estambre, soc lequil ts'otbil lino, buen ch'albil ta ts'isel. 7Ay cheb snehquel te ya stsac sba soc schebal sti'il, hich ya stsac sba a. 8Te schuhquil sch'uht te t'ujbil jalbil te ya xchuc a te efod, junax ya yich' pasel soc; ya yich' pasel ta oro, ta yax, chi'in-yax soc tsajal estambre, soc ts'otbil lino.
9Ich'a cheb sacliplip tonetic soc ts'ihbabeya ochel tey a te sbihilic te snich'nab Israel; 10waqueb bihilil ta jujup'ij ton, xmelmon ya yich' ts'ihbayel hich bin ut'il ayinic. 11Ya me ats'ihbabe ochel sbihilic te snich'nab Israel ta schebal tonetic hich te bin ut'il ya spas te mach'a ya'telinej spasel sello; pasbeya yawil te tonetic ta oro. 12Ya me awac' te cheb tonetic ta snehquelic te efod scuenta sna'ojibal tonetic yu'un te snich'nab Israel. Te Aarón ya yich'be sbihilic ta schebal snehquel ta stojol Jehová scuenta sna'ojibal. 13Pasbeya yawil te tonetic ta oro, 14soc cheb ts'otbil cadena ta puro oro. Ya me achuc te cadenahetic ta yawil tonetic.
15Ya me apas te bolsa pac' ya xc'oht ta stahn scuenta schahpanel c'op, buen ch'albil ta ts'isel; hich nix xapas te bin ut'il te efod: ha ta oro, soc ta yax, chi'in-yax soc tsajal estambre, soc ts'otbil lino. 16Pajal ta schanxuhcul schiquin soc puxbil ta ohlil, jtahn c'abal#28.16 22 centímetros snahtil soc jtahn c'abal sjamalil. 17Ya me awac'ticlan chanchohl t'ujbil tonetic tey a; ta sba cholol: rubí, c'anch'abch'ab ta tsaj, soc granate; 18ta scha'chohlol: yaxal-ton, yaxts'ajts'aj, soc diamante; 19ta yoxchohlol: c'anch'abch'ab ta tsaj, xlup'lon ta c'an, soc xlup'lon ta sac; 20ta schanchohlol: yaxcancan, sacliplip, soc sts'aylajan-ton.#28.20 Ma na'biluc teme hich yilel te tonetique. Spisilic ipajemic ta yawil pasbil ta oro. 21Ay lahchayp'ij tonetic hich te bin ut'il ay sbihilic te snich'nab Israel; ya yich' ts'ihbayel ochel tey a hich te bin ut'il sellohetic te sbihil te lahchaychahp, ha jchahp sbihil ta jujup'ij.
22Ta bolsa pac' ya xc'oht ta stahn ya me apasbe schuhquil ta puro oro te ts'otbil. 23Soc pasbeya cheb sch'ocowil ta oro, ya me awac' ta jujun xuhc te bolsa pac' ya xc'oht ta stahn. 24Te cha'lihc schuhquil pasbil ta oro ya me awac' ta schebal sch'ocowil ta jujun xuhc, 25soc te sni'il te jujun schuhquil ya me awac' ta jujun yawil ton ay ta snehquel, ya me achuc ta jujun snehquel te efod ta stojol stahn. 26Ya me apas cheb ch'ocowil ta oro te yac awac' ta scha'bunjehchel xuhc ta ahlan yu'un te bolsa pac' ya xc'oht ta stahn, ta sti'il yutil te slac'oj sba soc te efod. 27Soc pasa cheb ch'ocowil ta oro te yac awac' ta ye'tal te cheb snehquel te efod ta stojol te stahn, nopol ta sts'isbenal, ta ahc'ol mohel jtebuc yu'un te schuhquil sch'uht te efod. 28Te ch'ocowiletic yu'un te bolsa pac' ya xc'oht ta stahn ya yich' chuquel ta yaxal schuhquil soc te ch'ocowiletic yu'un te efod, scuenta yu'un te bolsa pac' ya xc'oht ta stahn ya xhil ta sba te schuhquil sch'uht te efod, soc hich ma ba ya yihquitay sba soc. 29Hich te Aarón ya me yich'be ta stahn ta stojol yo'tan te sbihilic te snich'nab Israel ta bolsa pac' ya xc'oht ta stahn yu'un schahpanel c'op te c'alal ya x'och bahel ta ch'ul awilal, scuenta sna'ojibalic ta stojol Jehová spisil ora. 30Ya me awac' te Urim soc Tumim#28.30 Ha te bintic la stuhun te sacerdote ta sna'el bin ya sc'an te Diose. Ma jna'tic bin yilel soc bin la spasic soc. ta yutil te bolsa pac' ya xc'oht ta stahn yu'un schahpanel c'op scuenta yu'un ay ta yo'tan a te Aarón te c'alal ya x'och bahel ta stojol te Jehová. Hich te Aarón spisil ora ay ta yo'tan a te schahpanel c'op yu'un te snich'nab Israel ta stojol Jehová.
31Ya me apas te snahtil-c'u' ta ye'tal te efod ta yaxal pac'. 32Ta yohlil, ta yahc'olal, hotbil ya xhil, soc pacbil ta ts'isel te sti'il hich bin ut'il spretinahul snuc', scuenta yu'un ma ba ya xch'i. 33Ta sjoyobal sti'il te c'u'ul pasa sloc'omba granadahetic te pasbilic ta yax, chi'in-yax soc tsajal estambre; soc ta yohlilic ta sjoyobal te sti'il ya me awac' tut campanahetic pasbilic ta oro; 34jun tut campana pasbil ta oro soc jun granada, yan tut campana pasbil ta oro soc yan granada, ta spisil sjoyobal te sti'ile. 35Ha ya slap te Aarón c'alal ya spas ya'tel. Ya xchicnaj sc'op te c'alal ya x'och bahel ta ch'ul awilal ta stojol Jehová soc te c'alal ya xloc' tal, hich ma ba ya xcham a.
36Soc ya me apas jun jayal pehchel ta puro oro, ts'ihbaya ochel tey a hich te bin ut'il ya yich' ts'ihbayel ochel sellohetic: CH'ULTESBIL TA STOJOL JEHOVÁ. 37Ya me achuc soc yaxal schuhquil ta spixjol pac'; ha ya xc'oht ta stojol yelaw te spixjol paq'ue. 38Hich ay ta sti'ba te Aarón, ha ya scuch te mulil ya xchicnaj ta scuenta spisil te bintic ch'uhltesbilic te ya yaq'uic te snich'nab Israel ta scuenta ch'ul mahtaniletic yu'unic. Spisil me ora ay ta sti'ba scuenta yu'un lecuc me sc'oblalic ta stojol te Jehová.
39Ya me ajal muc'ul c'u'ul ta lino, soc pasa pixjolal pac' ta lino soc schuhquil ch'uhtul ch'albil ta ts'isel. 40Te snich'nab Aarón ya me apasbe smuc'ul-c'u'ic, schuhquil sch'uhtic, soc spixjol paq'uetic scuenta yutsilic soc yich'elic ta muc'.
41Ha me yac awa'be sc'u'inic te abanquil Aarón soc te snich'nabe. Ya me amalticlambe aceite ta sjolic, ya me awa'be yich' ya'telic, ya me ach'ultes, scuenta yu'un ha sacerdotehetic ya xc'ohtic cu'un. 42Pasbeya scomil wexic ta lino scuenta smahquil sbaq'uetalic; ya xhahch ta sch'uyomba c'alal ta ya'. 43Ha ya slapic te Aarón soc te snich'nab te c'alal ya x'ochic bahel ta Nahilpac' Templo yu'un tahojibal, o te c'alal ya xnohpojic tal ta scajtajib ta chiq'uel mahtanil yu'un ya spas ya'tel ta ch'ul awilal, scuenta yu'un ma ba ya sta smulic te ya xchamic yu'une. Ha mandaril te stalel ya xhil ta stojol soc ta stojol te sts'umbal ta patil bahele.
Currently Selected:
Éxodo 28: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
