Éxodo 12
12
Te Pascua
1Te Jehová la sc'opon te Moisés soc Aarón ta Egipto, hich la yalbe: 2Te u ini ha bayel sc'oblal ya xc'oht awu'unic; ha shahchibal u ya xc'oht yu'un te ha'bile. 3C'opona spisil te pueblo Israel, hich me xawalbe: Ta slajunebal c'ahc'al yu'un te u ini, jujutuhl ya stsac jcoht jcolel tuminchij,#12.3 O: tentsun: ha nix ta vs. 4 soc 21. ha chican jaytuhl te mach'atic ay yu'un ta sna, jujucoht ta jujun na. 4Pero teme mayuc tsobol yajwal te jchahp na te ma xlaj sti'belic te jcolel tuminchij, ya me sjoquinic te spat-xuhc, chican te jaytuhlic ayic ta nahinel tey a. Yac apucticlanic te tuminchij chican te hich yipal ya xlaj sti'belic ta jujutuhl. 5Te chambahlam ma me ayuc bin jihnem yu'un soc ha me stat te ay jun ya'bilal. Ya xhu' yac atsaquic tuminchij o tentsun. 6Ya me acanantayic ha to c'alal ta schanlajunebal (14) c'ahc'al te u ini, ha yorahil a te spisil te pueblo Israel ya smilic te chambahlam ta stibiltayel q'uinal. 7Ya me yich'beyic te sch'ich'el, ya sbonic a te ste'el soc smarcohil te ti'nahil yu'un te na te banti ya sti'ique. 8Ha nix yorahil ta ahc'abal a, ya me swe'ic te ti'bal wohbil ta c'ahc' soc ya swe'ic pan te ma ba yich'oj levadura, soc ch'ahal itaj. 9Ma me stseheluc o paybiluc yac ati'ic, ha nax wohbil ta c'ahc'; ya me awe'ic scohtol soc sjol, yoc soc bintic ay ta yutil sch'uht. 10Ma me ayuc xuht'uc ya xhil awu'unic yu'un pajel. Te bin ya xhil yu'un pajel ya me achiq'uic. 11Hich yac awe'ic: achucojix ach'uhtic soc alapojix atepic soc atsacojix anahbate'ic a; ora nax me xawe'ic. Ha te Pascua#12.11 Pascua: c'ax ta sba, xchi. yu'un Jehová. 12Ha nix ta ahc'abal a ya xc'axon ta sq'uinal Egipto soc ya jmil spisil ba-alaletic soc sba-al chambahlametic ta sq'uinal Egipto; soc ya ca'be castigo spisil te diosetic yu'un Egipto. Ho'on Jehovahon.
13Te ch'ich' ha seña awu'unic ya xc'oht ta anahic te banti ayexe; te c'alal ya quil te ch'ich' ya xc'axon bahel te banti ayex, ma ba ya stahat te castigo scuenta lajel te c'alal ya quehchentes te sq'uinal Egipto. 14Te c'ahc'al ini ha sna'ojibal awu'unic ya xc'oht, ya me apasic scuenta q'uin ta stojol Jehová ta cajalcaj ats'umbalic bahel; ha mandaril te ma xlaj sc'oblal. 15Huqueb c'ahc'al yac awe'ic pan te ma ba yich'oj levadura. Ta sba c'ahc'alil ya me aloq'uesic spisil levadura ta anahic, yu'un mach'ayuc a te ya swe' te bin yich'oj levadura ta sba c'ahc'alil ha to ta shuquebal c'ahc'al ya me yich' loq'uesel ta Israel. 16Ta sba c'ahc'alil ay me ch'ul tsoblej awu'unic a, soc ha nix hich ta shuquebal c'ahc'al ay me ch'ul tsoblej awu'unic a. Mayuc a'tel ya yich' pasel a, ha nax spasel te we'elil te yac awe'ique. 17Ya me apasulanic te Q'uin yu'un Pan te ma ba yich'oj levadura, como ha nix sc'ahc'alel a te la jloq'uesex tal apisilic ta Egipto; ha yu'un ta cajalcaj bahel ats'umbalic ya me awich'ic ta muc' te c'ahc'al ini scuenta mandaril te ma xlaj sc'oblal. 18Ta shahchibal u ya me awe'ic pan te ma ba yich'oj levadura, c'alal ta schanlajunebal (14) c'ahc'al ta stibiltayel q'uinjal ha to ta jun scha'winic (21) c'ahc'al ta stibiltayel q'uinal. 19Huqueb c'ahc'al ma me ayuc levadura ta anahic. Mach'ayuc a te ya swe' te bin yich'oj levadura, teme jyanlum o teme alumal, ya me yich' loq'uesel ta pueblo yu'un Israel. 20Ma me xawe'ic te bin yich'oj levadura; ta bayuc banti ya xnahinex ya me awe'ic pan te ma ba yich'oj levadura, xchi te Jehová.
21Te Moisés la stsob tal spisil te mamaletic yu'un Israel, hich la yalbe: Bahan, tsahahic jcolel tuminchij#12.21 O: tentsun ta jujun anahic, milahic te tuminchij scuenta pascua. 22Ich'ahic jtohm hisopo, mulahic ta ch'ich' te ay ta yawil, bonahic a te sjol soc smarcohil te ti'nahil yu'un te anahique. Ma me ayuc mach'a ya xloc' ta anahic ha to c'alal ta sab. 23Yu'un ya me xc'ax te Jehová ta yehchentesel te egipciohetic. Te c'alal ya yil te ch'ich' ta sjol soc ta smarcohil te ti'nahil ya me sohl bahel ta yahc'olal te ti'nahil, ma ba ya yac' ochel te j'ehchenteswanej ta anahic yu'un ya smilex. 24Ya me apasulanic soc te cajalcaj bahel ats'umbalic scuenta mandaril te ma xlaj sc'oblal. 25Te c'alal ya x'ochex ta q'uinal te yalojix ta jamal te Jehová te ya ya'beyex, ya me apasulanic te q'uine. 26Teme ya sjoc'obeyex te awal-anich'anic: ¿Bin scuentahil awu'unic te q'uin ini? teme xchihique, 27ya me ajaq'uic: Ha te milbil mahtanil yu'un te Pascua yu'un Jehová te sohl bahel ta sba te nahetic yu'un te snich'nab Israel ta Egipto te c'alal la yehchentes te egipciohetic, pero hil yu'un te jnatique, xchi.
Hich te pueblo la snijan sbahic soc la yich'ic ta muc' te Diose. 28Patil te snich'nab Israel baht spasic ta ora hich te bin ut'il halbotic ta mandar yu'un Jehová te Moisés soc Aarón.
Lajic ba-alaletic
29Ta ohlil ahc'abal te Jehová la yehchentes scuenta lajel spisil te ba-alaletic ta sq'uinal Egipto, te ba-alal yu'un faraón te hucul ta shuctajib c'alal ta ba-alal yu'un te mach'a ay ta cárcel, soc spisil sba-al chambahlametic. 30Te faraón soc spisil te a'batetic yu'un soc spisil te egipciohetic hahchic ta ahc'abal; chicnaj tulan oq'uel ta Egipto, como ta jujun na ay mach'a cham tey a.
31Te faraón la sticon ta iq'uel tal te Moisés soc Aarón ta ahc'abal, hich la yalbe: Loc'anic bahel ta yohlil te jlumal ha'ex soc te snich'nab Israel; bahan ch'uhuntayahic te Jehová, hich te bin ut'il la awalique. 32Soc ic'ahic bahel te atuminchijic soc awacaxic, hich te bin ut'il la awalique, bahanic ta ora; soc a'bon hilel bendición, xchi.
33Te egipciohetic la sujic loq'uel te pueblo Israel te yacuc xloq'uic bahel ta ora ta sq'uinalic, yu'un hich la yalic: Ya xchamotcotic ta jpisilcotic, xchihic. 34Te israeletic la yich'ic bahel te wots'bil harina te ma to ba yich'oj levadura, la spotsic ta pac' soc swots'ojibal, la sq'uechic bahel. 35Te snich'nab Israel hich la spasic te bin ut'il pasotic ta mandar yu'un Moisés, la sc'ambeyic bahel te egipciohetic te bintic pasbilic ta oro soc plata, soc c'u'uletic. 36Te Jehová la yac' te lecuc c'ohtic ta stojol te egipciohetic, hich la ya'beyic te bin c'ambotic bahele. Hich te israeletic la spojbeyic loq'uel te biluquetic yu'un te egipciohetique.
Snich'nab Israel ya xloq'uic ta Egipto
37Te snich'nab Israel loq'uic bahel ta Ramsés, bahtic ta Sucot. Ay lajunwinic scha'bahc' ta mil (600,000) winiquetic te ya xbehenic ta yoquic, ma ba ahtaybilic stuquel te alaletique. 38Soc ay bayel ta chahp yantic ants-winiquetic te la sjoquinic bahel, soc bayel tuminchijetic, tentsunetic soc wacaxetic. 39Te wots'bil harina te la yich'ic loq'uel tal ta Egipto la spasic ta pan te ma ba yich'oj levadura. Ma ba yich'oj levadura como te c'alal tenotic loq'uel yu'un te egipciohetic mayuc tiempo yu'unic ta schahpanel te swe'elique.
40Te snich'nab Israel ayinic ta Egipto jbahc' soc lajuneb scha'winic (430) ha'bil. 41Ta mero sc'ahc'alel te ts'acay te jbahc' soc lajuneb scha'winic (430) ha'bil spisil te pueblo yu'un Jehová loq'uic bahel ta sq'uinal Egipto. 42Ha te ahc'abal te q'uelel sit te Jehová yu'un ya sloq'ues tal ta sq'uinal Egipto. Ha te ahc'abal te q'uelel me sitic scuenta yich'el ta muc' Jehová spisil te snich'nab Israel ta cajalcaj te yal-snich'nabique.
Mandariletic yu'un Pascua
43Te Jehová hich la yalbe te Moisés soc te Aarón: Ha te ley ini scuenta te Pascua: Mayuc jtuhluc jyanlum te ya swe'. 44Pero spisil te a'batetic te mambilic ya xhu' ya swe'ic stuquelic, teme nahil la awa'be circuncisión. 45Te jyanlum o te jle-a'tel ma xhu' ya swe'ic. 46Ta junax na ya yich' we'el, ma me xawich'ic loq'uel ta fuera te ti'bal, soc ma me xawac'beyic junuc sbaquel. 47Spisil te pueblo Israel ya me spas. 48Teme ay jyanlum te sjoquinejex te ya sc'an ya spas te Q'uin Pascua yu'un Jehová, ya me yich' circuncisión spisil te winiquetic, hich ya xhu' ya spas te Q'uin Pascua, como hich ya xc'oht te bin ut'il alumal. Pero te mach'a ma ba yich'oj circuncisión ma xhu' ya swe' stuquel. 49Junax mandaril awu'unic soc te jyanlum te nahinem ta awohlilic, xchi.
50Hich la spasic spisil te snich'nab Israel te bin ut'il pasotic ta mandar yu'un Jehová te Moisés soc Aarón. 51Ha nix sc'ahc'alel a te Jehová la sloq'ues tal ta sq'uinal Egipto ta jujuchahp te snich'nab Israel.
Currently Selected:
Éxodo 12: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
