1. Mojsije 44
44
Srebrno tahtaj ani trasta
1Tegani o Josif zapovedisada e upraviteljese tare po ćher: “Pher e traste kale manušenđe xamasa kobor šaj inđaren, a dži jekhese iri odupral ki trasta lese pare. 2Pale gova čhuv ani trasta e emternesi mingro srebrno tahtaj katane lese parencar savesa poćinda o điv.”
Vov ćerda sar so zapovedisada lese o Josif.
3Kana đivesajlo, bičhalde e phralen thaj lenđe heren ko drom.
4Thaj samo so iklile andaro foro thaj ni đele dur, o Josif phenda e upraviteljese tare po ćher: “Sigate dža pale kola manuša! Kana ka rese len, puč len: ‘Sose irin bilačhe bašo šukaripe? Sose čorden o srebrno tahtaj me gospodareso? 5Gova si tahtaj andare savo mo gospodari pijol thaj andare leste dikhljarol. Ćerden baro bilačhipe!’”
6Kana reslja len o upravitelji, vaćarda lenđe sa kala lafura. 7Al von pe gova pučlje: “Sose gospodarona gija phene? Dur golestar, amen, ćire sluge, te ćera gijate khanči! 8Dikhljan kaj e pare so arakhljam ane amare traste, andam tuće palal andari phuv i Hanaansko. Sose bi tegani čorasa srebro il zlato andaro ćher ćire gospodareso? 9Te arakhlja pe gova ke jekh ćiro sluga, mudaren le, a amen avera ka ava robura će gospodarese.”
10O upravitelji phenda: “Šukar vaćaren, al nek avol gijate: ‘Kaste araćhol pe o srebrno tahtaj, ka avol mingro robo, a tumen avera ka aven slobodna.’”
11Tegani dži jekh lendar mukhlja pi trasta ki phuv thaj putarda la. 12O upravitelji lija te rodol ane traste, taro emphureder dži ko emterno. O tahtaj arakhlja pe ani trasta e Venijaminesi. 13Tegani von pharade pe fostanura thaj savore čhute pe traste pe hera thaj irisajle ano foro.
14Kana avilo o Juda pe phralencar ane Josifeso ćher, o Josif vadži sasa gothe. Tegani e phrala pele ke koča angle leste, 15a o Josif phenda lenđe: “So gova ćerden? Ni li džanen kaj manuš sar me dikhljarol?”
16Tegani phenda o Juda: “So te phena tuće, gospodarona? So te vaćara? Sar te opravdi amen kaj naj sam banđe? O Dol sikada o bilačhipe amaro, ćire slugengo. Akh, amen savore sam akana će robura, gospodarona, amen thaj kova kaste arakhlja pe ćiro srebrno tahtaj.”
17O Josif phenda lenđe: “Dur te avol mandar te ćerav gija khanči! Kaste arakhlja pe o tahtaj, vov ka avol mo robo, a tumen savore šaj džan ano mir tumare dadese.”
18O Juda avilo ke leste thaj phenda lese: “Moliv tu, gospodarona, mukh će slugase te phenol tuće khanči thaj ma av holjavo pe mande, pe ćo sluga, golese kaj tu san sar o faraon. 19Tu gospodarona mingreja pučljan će slugen: ‘Isi li tumen dad il phral?’ 20A amen phendam amare gospodarese: ‘Isi amen purano dad thaj emterno phral, savo bijandilo lese ano puranipe. Leso phral mulo thaj samo vov ačhilo tare čhave pe daće, thaj mo dad but manđol le.’ 21Tegani tu phendan amenđe, ćire slugenđe: ‘Anen le te dikhav le.’ 22Thaj amen phendam amare gospodarese: ‘Našti o čhavo te ačhavol pe dade, golese kaj te ačhada le, tegani bi o dad merola.’ 23Al tu phendan amenđe, će slugenđe: ‘Te ni avilo tumencar tumaro emterno phral, ma ikljen manđe angle jakha!’ 24Kana irisaljam ke ćo sluga, ke amaro dad, phendam lese so tu gospodarona vaćardan. 25Tegani amaro dad phenda te iri amen palem te ćinen amenđe vadži zala xamase. 26Al amen phendam: ‘Našti dža, sem te ni avilo amencar amaro emterno phral. Našti iklja angle jakha kole manušese bizo amaro emterno phral.’ 27Ćiro sluga, amaro dad, vaćarda amenđe: ‘Tumen džanen kaj mi romni bijanda manđe samo duje muršen. 28Jekh đelo mandar thaj me phendem: “Sigurno si čhindo ke kotora,” thaj nikad vadži ni dikhljem le. 29Te lijen mandar i kale čhave, thaj ako avol lese khanči bilačhe, i žal savi bi ćerena manđe bi mudarola man, golese so me sem purano manuš.’
30Te irisaljem akana me dadese, ćire slugase, thaj mo dad kaso džuvdipe si zurale phanglo e čhavoresa, 31dićhol kaj o čhavoro naj amencar, ka merol. Gija amen, ćire sluge, ka trada amare dade, tumare sluga, purane thaj bibaxtale ano limori. 32Me, ćiro sluga, garantujisadem me dadese bašo čhavoro. Vaćardem: ‘Te ni irisadem le tuće saste, ane sa e đivesa mingre džuvdimase ka avav bango angle tute!’ 33Golese, gospodarona, moliv tut, mukh te ačhav kate umesto o čhavoro me sar ćiro robo, a tu mukh e čhavore te iril pe pe phralencar. 34Golese, sar te iriv man me dadese, te o čhavoro naj mancar? Našti dikhav e dukha save bi araćhena me dade.”
Currently Selected:
1. Mojsije 44: GSP
Highlight
Share
Copy
Want to have your highlights saved across all your devices? Sign up or sign in
