1. Samuilo 27
27
O David palem ke Filistejcura
1O David dija gođi ane peste: “Nesavo đive ipak ka mudardivav tare Sauleso va. Emšukar si te našav ani filistejsko phuv. Gija o Saul ni ka rodol man vadži ane sa o Izrael thaj me ka crdav man tare lese vasta.”
2Gija vov thaj kola šovšel (600) manuša đele ko Ahiš, o čhavo e Maoheso, savo sasa caro ano Gat. 3O David thaj lese manuša đele te bešen ko Ahiš ano Gat, pe familijencar, a o David pe duje romnjencar, e Ahinoamasa andaro Jizreel thaj e Avigajilasa andaro Karmel, e Navalese udovicasa. 4Kana šunda o Saul so o David našlo ano Gat, ni rodija le vadži.
5O David vaćarda e Ahišese: “Te arakhljem milost ane ćire jakha, de man jekh than ane nesavo foro ani phuv, te šaj odori te bešav. Sose me, ćiro sluga, te bešav tusa ano carsko foro?”
6Gija gova đive o Ahiš dija le o Ciklag, savo dži avđive preperol e carurenđe tari Juda. 7O David bešlo ani filistejsko phuv jekh berš thaj štar čhon.
8O David thaj lese manuša džana te čoren tare Gešurcura, e Gizrijcura thaj e Amalečanura, e manušen save but berša bešena ani phuv savi džal dži o Šur, pa sa dži o Egipat. 9Kana bi o David čalavola pe nesavo than, ne bi ačhavola ano džuvdipe ni murše ni džuvlja, a lola bi e bakren thaj e guruven, e heren thaj e kamilen thaj e šeja. A pale gova bi irila pe ko Ahiš.
10Kana bi pučola le o Ahiš: “Kaj sana avđive te čore?”, o David bi vaćarola: “Ane Judaso Negev”, il “Ani Jerahmeeleso Negev”, il “Ano kenejsko Negev.”
11O David ni ačhavola ano džuvdipe ni murše ni džuvlja te ma bi khoni lendar avola ano Gat thaj te vaćarol e Ahišese so vov thaj lese manuša čače ćeren. Gija ćerda sa o vreme dži kaj bešlo ane filistejsko phuv.
12O Ahiš pačaja e Davidese thaj phenda ane peste: “Gaći mrzil le o narodo ano Izrael kaj ka služil manđe ane sa e đivesa.”
Currently Selected:
1. Samuilo 27: GSP
Highlight
Copy
Compare
Share
Want to have your highlights saved across all your devices? Sign up or sign in
