Rimljanenđe 3

E Devlesiri vernost

1Savi, onda, prednost isi e Jevrejen? Ili isi li nesavi korist oto obreziba? 2Bari korist ano sa! Najanglei e Jevrejenđe poverime e Devlesere lafija. 3A so te nesave olendar inele neverna? O Devel li zbog adava naka ovel više verno? 4Na, nisar! Iakoi svako manuš hovavno, o Develi adava kovai verno ano ple obećanja, sar soi pisime ano Sveto lil:

“Ka mothove tut pravedno ano sa so ka vaćere,

hem ka pobedine kad ka ove sudime.”

5A te amari nepravednost mothoj e Devlesiri pravednost, so ka phena ko adava? Dai o Devel nepravedno kad ikali pli holi upra amende? Manušikane akava pučava. 6Na, nisar! Sar onda o Devel ka sudini ine pravedno e svetose? 7Ali, te mlo hovajba služini te mothoj pe o izobilje oto e Devlesoro čačipe zaki olesiri slava, sose onda pana sudini pe maje sar grešnikose? 8Hem sose te na phena: “Hajde te ćera bišukaripe sar te šaj avel o šukaripe?” Sar so nesave vaćerena bišukar hem tvrdinena da amen ađahar vaćeraja. Adalese ka oven pravedno osudime!

9So, onda? Isi li amen e Jevrejen nesavi prednost upreder avera? Na, nisar! Adalese so, već phenđam dai sare, hem o Jevreja hem okola kola nane Jevreja, tali vlast e grehesiri.

Nijekh nane pravedno

10Sar soi pisime ano Sveto lil:

“Nane nijekh pravedno, nijekh;

11nijekh nane kova razumini,

nane nijekh kova rodela e Devle.

12Sare cidinde pe e Devlestar,

sare zajedno ule beskorisna.

Nane nijekh kova ćerela šukaripe,

nane nijekh.

13Lengoroi grlo sar o phravdo grobo,

lengiri čhib hovaj.

E sapesoroi otrov lenđe ko vošta.

14Lengerei muja pherde armanja hem gorčina.

15Lengere pre siđarena te mudaren,

16kaj god džana, anena uništenje hem beda,

17a o drom oto mir na pendžarena.

18Nane len nisavi dar oto Devel.”

19Džanaja da sa so o Zakoni vaćeri, vaćeri okolenđe kolai talo Zakoni, te šaj svako muj te phandljol hem te šaj sa o sveto te terđol anglo sudo e Devlesoro. 20Adalese anglo leste nijekh naka opravdini pe palo ićeriba o Zakoni, adalese so o Zakoni anela e manuše đi ko pendžariba dai grešno.

I pravednost avela prekali vera

21Ali akana mothovđa pe e Devlesiri pravednost bizo Zakoni, savatar svedočinena o Zakoni hem o Proroci. 22Opravdime injam anglo Devel prekali vera ano Isus Hrist. Adava odnosini pe upro sarijende kola verujinena adalese so nane razlika maškaro manuša. 23Adalese so, sare grešinde hem našalde i slava e Devlesiri, 24ali opravdimei pali lesiri milost prekalo otkupljenje savoi ano Hrist Isus. Adavai e Devlesoro daro. 25O Devel odredinđa e Hriste ple rateja te ovel žrtva zako pomirenje savo primini pe veraja. Adava ćerđa te mothoj pli pravednost. Adalese so, ov ani pli strpljivost na kazninđa o grehija savei ćerde angleder, 26a adava ćerđa sar te mothoj pli pravednost ano akava vreme, te šaj mothoj dai ov korkoro pravedno hem te opravdini okole kova verujini ano Isus.

27Šaj li onda, korkore amencar te hvalina amen? Našti! Palo savo zakoni? Palo zakoni savo rodela delja? Na, nego palo zakoni savo rodela vera. 28Adalese amen smatrinaja dai o manuš opravdime pali vera, a na palo ićeriba o Zakoni. 29O Devel li samo e Jevrejenđe Devel? Nane li ov Devel hem avere narodenđe? Oja, hem avere narodenđe isto. 30I adalese soi samo jekh Devel, kova prekali vera ka opravdini e obrezimen, ov prekali adaja isto vera ka opravdini hem okolen kola nane obrezime. 31Amen li veraja čhinavaja o Zakoni? Na, nisar! Nego, amen veraja podržinaja o Zakoni.

Currently Selected:

Rimljanenđe 3: RAB

Highlight

Copy