Otkrivenje 19
19
I pobedničko đilib ano nebo
1Palo adava šunđum nešto sar zoralo glaso bute dženengoro ko nebo sar vičinena:
“Haleluja!
O spasenje, i slava hem o zoralipe pripadinena amare Devlese,
2adalese soi lesere presude čačikane hem pravedna.
Ov osudinđa e Bara bludnica,
koja rumini ine i phuv ple bludeja,
hem ov osvetinđa pe laće zako rat ple slugengoro.”
3Hem palo dujto puti vičinde:
“Haleluja!
O čuro oto lakoro uništenje ka vazdel pe zauvek!”
4Tegani o bišu štar starešine hem o štar dživde bićija pele ko kočija hem pokloninde pe e Devlese, kova bešela ko prestolje, hem phende: “Amen, Haleluja!”
5A taro prestolje šundilo glaso savo phenđa:
“Hvalinen amare Devle,
sare tumen kola injen lesere sluge,
kola darana olestar, o bare hem o tikore!”
6Tegani šunđum nešto sar glaso bute dženengoro hem sar zvuk e zorale panjengoro hem sar zvuk e zorale gromengoro, sar phenena:
“Haleluja!
Adalese so, vladini o Gospod, amaro Devel, kova sa šaj!
7Te radujina amen hem te veselina amen hem te da lese slava.
Adalese so, alo o vreme zako bijav e Bakroresoro
hem lesiri nevesta spreminđa pe.
8Dindo laće sjajno hem čisto lan
te urjel pe ano leste.”
(A o lan, adavai o pravedna delja e Devlesere manušengere.)
9Tegani o anđeo phenđa maje: “Pisin: Blago okolenđe kolai vičime ko bijav e Bakroresoro!”
Hem phenđa maje: “Akalai čačikane lafija e Devlesere.”
10Peljum ko kočija anglo lesere pre te pokloninav man lese, a ov phenđa maje: “Ma ćer adava! Me injum sluga, isto sar so hem tu hem te phralja kola svedočinena pla veratar ano Isus. E Devlese poklonin tut. Adalese so, okola kola svedočinena e Isusestar, olen isi Duho oto proroštvo.”
O jahači ko parno gras
11Tegani dikhljum phravdo nebo, a adari, parno gras. O anavi okolesoro kova ine upro gras Verno hem Čačikano, hem ov pali pravda sudini hem džala ko mariba. 12Lesere jaćhai sar o plamen e jagakoro, a ko šeroi lese but krune. Ole isi pisime anav savo niko na džanel sem leste. 13Urjavdoi ano ogrtači savoi natopime rateja hem vičini pe: Lafi e Devlesoro. 14Palo leste džana e nebosere vojske upro parne grasta, urjavde ano sjajno hem čisto lan.
15Taro lesoro muj ikljola oštro mači saveja ka khuvel e nacijen. Ka vladini upreder lende sastrenale palicaja hem ka gazini i drakh ani presa oti bari holi e Devlesiri, kova sa šaj. 16Ko lesoro ogrtači, ko bedro, pisimei lesoro anav:
CARO UPREDER O CARIJA HEM GOSPODARI UPREDER O GOSPODARIJA
17Tegani dikhljum jekhe anđeo kova terđola ko kham hem taro sa o glaso vičini sa e čirikljen kola letinena ano maškar e nebosoro: “Aven! Čeden tumen zaki bari gozba e Devlesiri! 18Aven te han o mas e caronengoro, e narednikonengoro hem e bare manušengoro, hem o mas e grastengoro hem okolengoro kola jašinena len, hem o mas sa avere manušengoro kolai slobodna hem kolai robija, hem e tikorengoro hem e barengoro!”
19Tegani dikhljum i Zver hem e phuvjakere caronen pumare vojskencar sar čedinde pe te maren pe protiv Okova kovai upro gras hem protiv olesiri vojska. 20I Zver inele dolime, a olaja hem o Hovavno proroko, kova ano lakoro anav ćerđa čudesija savencar hovavđa okolen kola priminde o žig oti Zver hem kola pokloninde pe lakere kipese. Soduj dživde inele frdime ano jagalo jezero savo thabjolja sumporeja. 21A okole averen mačeja mudarđa Okova kova bešela upro gras, taro kasoro muj ikljola o mači. Sa o čiriklja čalile oto lengoro mas.
Currently Selected:
Otkrivenje 19: RAB
Highlight
Copy
Compare
Share
Want to have your highlights saved across all your devices? Sign up or sign in
