Filipljanenđe 1
1
E Pavlesoro pozdrav
1Me o Pavle hem o Timotej, o sluge e Hriste Isusesere, pisinaja sa e Devlesere manušenđe ano Hrist Isus kolai ani diz Filipi, sa tumare starešinenđe hem e đakonenđe:
2Milost tumenđe hem mir e Devlestar, amare Dadestar, hem e Gospodestar e Isuse Hristestar.
E Pavlesiri molitva zako Filipljanja
3Zahvalinava mle Devlese kad god setinav man tumenđe. 4Ani svako mli molitva zako sarijenđe tumenđe, uvek molinava radosno 5zbog tumaro učestvujiba ano širiba o evanđelje taro prvo dive đi akana. 6Uverime injum da o Devel, kova započinđa te ćerel ana tumende okova soi šukar, ka dovršini adava đi ko Dive kad o Hrist Isus ka avel.
7Ispravnoi ađahar te mislinav sarijendar tumendar, adalese so akharava tumen ano mlo vilo, sarijen tumen kola učestvujinena mancar ani milost e Devlesiri, sar ano mle okovija, ađahar hem ano braniba hem ano potvrdiba o evanđelje. 8O Develi maje svedoko kobor, e Hriste Isusesere mangipnaja, but volinava tumen. 9Hem akavai mli molitva:
tumaro mangipe sa više te barjol ano čačikano džandipe hem ani šukar procena, 10te šaj prosudinen soi šukar, sar te šaj oven čista hem bizi mana zako Dive e Hristesoro, 11pherde plod oti pravednost savo avela prekalo Isus Hrist, ki slava hem ki hvala e Devlese.
E Pavlesoro phandlipe ohrabrini averen te širinen o evanđelje
12Phraljalen, mangava te džanen da akava so ovela mancar, ćerđa te širini pe o evanđelje. 13Ađahar sa e carikana stražaće hem sarijenđe averenđe ulo jasno da akharava o okovija zbog o Hrist. 14I većina e phraljendar, ohrabrime ano Gospod mle okovencar, sa više bizi dar lena te vaćeren o lafi e Devlesoro.
15Čače, nesave propovedinena e Hriste tari zavist hem sar te takmičinen pe, a avera adava ćerena taro šukar namere. 16Adala avera ćerena taro mangipe, adalese so džanena so akari ano phandlipe injum zbog o braniba o evanđelje, 17a okola o prva na vaćerena e Hristestar čačikane, nego tari sebičnost, mislindoj da ađahar ka ćeren te ovel maje po phare ano phandlipe. 18Ali so akana? Ko bilo savo način, oto šukar namere ili na, vaćeri pe e Hristestar, hem adalese radujinav man.
I ka radujinav man, 19adalese so džanav da akava so mancar ovela, zbog tumari molitva hem zbog i pomoć e Isuse Hristesere Duhosiri, ka preirini pe ko mlo oslobođenje. 20Čačikane adžićerava hem nadinav man da ano nisoste naka lađarav man, nego da uvek, sar hem akana, ka ovav bizi dar zako Hrist hem da ov ano mlo telo ka proslavini pe, bilo te živinav ili te merav. 21Adalese soi maje o Hrist dživdipe, a o meriba dobitak. 22Ali, te nastavinđum te živinav ano telo, adava ka značini maje plodno buti. A so ka izabirinav, na džanav. 23Pritiskime injum taro duj strane: mangava te džav hem te ovav e Hristeja, soi maje but po šukar, 24ali zbog tumendei po bitno te ačhovav ano telo. 25Uverime injum ko adava. Ka ačhovav tumencar te barjoven hem te radujinen tumen ani vera. 26Ađahar, kad palem ka avav kora tumende, ka ovel tumen više soja te hvalinen tumen mancar ano Hrist Isus.
27Samo živinen dostojno palo e Hristesoro evanđelje. Ađahar, bilo te avav hem te dikhav tumen, ili samo te šunav tumendar, ka džanav da zorale terđovena ano jekh duho hem sar jekh marena tumen zaki vera oto evanđelje, 28bizo ano nisoste te daran e protivnikonendar. Olenđei adava znako zaki propast, a tumenđe zako spasenje, hem adava e Devlestar. 29Adalese so, tumenđei dindi i milost na samo te verujinen ano Hrist, nego hem te patinen zbog olese. 30Hem tumen injen ani isto borba zaki savi dikhljen da man isi, a hem akana šunena da isi man.
Currently Selected:
Filipljanenđe 1: RAB
Highlight
Copy
Compare
Share
Want to have your highlights saved across all your devices? Sign up or sign in
