Filipljanenđe 2

I poniznost e hrišćanengiri te ovel sar e Hristesiri

1Adalese, te isi tumen nesavo ohrabrenje ano Hrist, nesavi uteha lesere mangipnastar, nesavo zajedništvo ano Duho, nesavi nežnost hem saosećanje, 2onda ćeren mli radost te ovel pherdi: oven jekh ano misliba, nek ovel tumen jekh mangipe, oven jekh ano duho hem roden jekh svrha. 3Ništa ma ćeren tari sebičnost ni zaki beskorisno slava, nego ani poniznost jekh avere dikhen sar po bare tumendar. 4Ma dikhen samo tumari korist, nego svako te dikhel hem i korist averengiri.

5Razmislinen maškara tumende isto sar hem o Hrist Isus:

6Ov, kova palo plo obličje inele isto sar o Devel,

na zahtevinđa plo pravo te ovel jednako e Devleja,

7nego odrekninđa pe oto sa. Lelja o obličje e slugasoro

hem bijandilo ano manušikano obličje.

I kad mothovđa pe sar manuš,

8ponizinđa korkoro pes hem inele poslušno sa đi ko meriba,

čak đi ko meriba ko krsto.

9Adalese o Devel vazdinđa le upreder sa

hem dinđa le anav savoi upreder sa o anava,

10te šaj anglo e Isusesoro anav perel svako koč

ko nebo, ki phuv, hem tali phuv,

11hem svako čhib te priznajini dai o Isus Hrist Gospod,

ki slava e Devlese e Dadese.

O hrišćanja valjani te oven svetlost ano sveto

12Adalese, mle manglalen, sar so uvek injenle poslušna, na samo kad me injumle adathe, nego po više hem akana kad na injum adathe, daraja hem tresibnaja napredujinen ano tumaro spasenje. 13Adalese so, o Develi adava kova ana tumende ćerela te mangen hem te ćeren okova soi pali olesiri volja.

14Sa ćeren bizo gunđiba hem raspraviba, 15te oven bizi mana hem čista, savršena čhave e Devlesere maškari bišukar hem rumime generacija, ani savi svetlinena sar o čerenja ano svemir, 16zorale ićerindoj o Lafi e dživdipnasoro, te šaj ponosinav man ko Dive e Hristesoro, da na prastandiljum džabe, ni da trudinđum man džabe. 17Ali, hem te mlo dživdipe mora te čhorđol sar žrtva zaki tumari vera, radosno injum hem radujinav man tumencar sarijencar. 18Ađahar hem tumen oven radosna hem radujinen tumen mancar.

O Timotej hem o Epafrodit

19Ali nadinav man ano Gospod Isus da sigate ka bičhalav tumenđe e Timoteje, te šaj hem me te ohrabrinav man kad ka dodžanav sar tumen injen. 20Adalese so niko nane maje edobor paše sar ov, kova ka mothoj da čače brinini pe zako tumaro šukaripe. 21Adalese so, sare rodena pumaro, a na okova soi e Isuse Hristesoro. 22Ali tumen džanen da o Timotej dokažinđa pe, adalese so mancar, sar o čhavo e dadeja, služinđa ano širiba o evanđelje. 23Adalese, nadinav man da ka bičhalav le tumende kad ka dikhav so ka ovel mancar. 24A uverime injum ano Gospod da sigate hem me lično ka avav.

25Palem, mislinava dai potrebno te bičhalav tumenđe palal e Epafrodite, mle phrale, e saradniko hem e saborco, kovai tumendar bičhaldo te pomožini maje ano mle potrebe. 26Adalese so, ov but manglja te dikhel tumen hem inele uznemirime so šunđen da inele namborme. 27A čače inele edobor namborme đi o meriba, ali o Devel smilujinđa pe lese, hem na samo lese, nego hem maje, te na ovel maje po phare. 28Adalese mangava po sig te bičhalav le hem te šaj palem radujinen tumen kad ka dikhen le, a onda hem me naka brininav edobor. 29Adalese, priminen le ano Gospod ani sa i radost hem poštujinen esavken sar oleste. 30Adalese so, ov samo so na mulo zaki buti e Hristesiri – plo dživdipe rizikujinđa sar te pomožini okoleja so tumen našti ine te pomožinen maje.

Currently Selected:

Filipljanenđe 2: RAB

Highlight

Copy

Compare