1. Timotej 3
3
Save valjani te oven e khanđirjakere vođe
1Akavai lafi čačipe: te neko mangela te ovel nadgledniko, šukar služba mangela. 2O nadgledniko valjani te ovel bizi mana, te ovel rom jekha romnjakoro, te ovel trezveno, razumno, poštujime, gostoljubivo, hem sposobno te sikaj, 3te na ovel pijanica, ni nasilniko, nego te ovel nežno, ni kavgađija, ni halano parenđe. 4Valjani te upravini šukar ple čhereja, hem te oven le čhave kola šunena le hem but poštujinena le. 5Ali, te na džanđa te upravini ple čhereja, sar ka upravini e Devlesere khanđirjaja? 6O nadgledniko na tromal te ovel manuš kova samo so obratinđa pe, sar te na ovel barikano hem te na perel ani isto osuda sar o beng. 7I valjani te ovel poštujime hem avere manušendar kola nane ani khanđiri, te na lađari pe hem te na perel ani zamka e bengesiri.
Save valjani te oven o đakonja
8Ađahar hem o đakonja valjani te oven cenime, te na oven dujemujengere, te na pijen but mol hem te na džan palo nepošteno barvalipe. 9Valjani te ićeren pe ko hor čačipe e verakoro, ani čisto savest. 10E đakonen najangle valjani te proverini pe, i tei bizi mana, šaj te oven ani služba. 11Ađahar hem lengere romnja valjani te oven cenime, te na ogovorinen, te oven trezvena hem ko sa te oven verna.
12O đakoni valjani te ovel rom jekha romnjakoro, hem šukar te upravini ple čhavencar hem ple čhereja. 13Adalese so, okola kola šukar ćerena i služba, ovena poštujime maškaro narodo hem troman bizi dar te vaćeren oti pumari vera ano Hrist Isus.
O čačipe amara verakoro
14Iako isi man nada da pana hari i ka avav tute, pisinava će akava 15sar te šaj, te zadržinđum man, džane sar valjani te ponašini pe o manuš e Devlese ano čher, savoi i khanđiri e dživde Devlesiri, stubo hem temelji e čačipnasoro.
16Bizi sumnja, bari i tajna oti pobožnost:
Ov inele mothovdo ano telo,
inele opravdime e Duhostar,
inele dikhlo e anđelendar,
inele propovedime maškaro avera nacije,
ano leste o manuša verujinde
hem legardilo upre ani slava.
Currently Selected:
1. Timotej 3: RAB
Highlight
Copy
Compare
Share
Want to have your highlights saved across all your devices? Sign up or sign in
