1. Timotej 2
2
Uputstvija zaki molitva
1Angleder sa, mangava te ovel rodiba, molitve, molbe hem zahvaliba zako sa o manuša, 2zako carija hem zako sa kolai ki vlast, te šaj živina mirno hem tiho dživdipe ani sa i pobožnost hem ano poštenje. 3Adavai šukar hem ugodno e Devlese, amare Spasiteljese, 4kova mangela sa o manuša te oven spasime hem te pendžaren o čačipe. 5Adalese so jekhi o Devel hem jekhi kova terđola maškaro Devel hem o manuša – o manuš o Hrist Isus. 6Ov dinđa plo dživdipe sar otkup zako sa o manuša. Adavai svedočanstvo savo o Devel dinđa ko pravo vreme. 7I adalese o Devel čhivđa man te ovav propovedniko hem apostoli, te ovav učitelji avere nacijengoro ani vera hem ano čačipe. Na hovavava, vaćerava tumenđe o čačipe.
8Adalese, mangava o murša te molinen pe ko svako than, vazdindoj pumare sveta vasta bizi holi hem bizi rasprava.
9Ađahar da, o đuvlja te urjen pe pristojno, skromno hem sar so džala ano redo, te na kitinen pe frizurencar, ni zlatoja ili biserencar ili skupone šejencar. 10Umesto adava, nek ćeren šukaripe, sar so dolikujini e đuvljenđe kola mothovena pe sar pobožna.
11O đuvlja nek sikljoven ani tišina hem ani sa i pokornost. 12E đuvljaće na mukava te sikaj ili te ovel upreder o murš, nego nek traini. 13Adalese so, najangle inele ćerdo o Adam, i tegani i Eva. 14Hem na ine o Adam adava kova inele prevarime, nego i đuvli inele prevarime hem peli ano greh. 15Ali i đuvli ka ovel spasime adaleja so ka bijani čhaven, te ačhile ani vera, ano mangipe hem ani svetost anglo Devel, sar so džala ano redo.
Currently Selected:
1. Timotej 2: RAB
Highlight
Copy
Compare
Share
Want to have your highlights saved across all your devices? Sign up or sign in
