Romans 10
10
1Denga daina, dogu lodo donu ma dagu dalodalo ange gi de Maadua, i hiidinga o dangada o Israel, deenei: gilaadeu gi hagamouli. 2Go hiidinga au e tala donu bolo gilaadeu e kona mmao de kana ange i hegau a de Maadua, aagai gilaadeu tigi tonu ange donu. 3Go hiidinga gilaadeu tigi tonu ange gi de hai a de Maadua e hagaheohi ai dangada, gai e ssala donu huu delaadeu hai e hagaheohi ai, gilaadeu e dee llodo e dugu ange gilaadeu gi de hagaheohi a de Maadua. 4Go hiidinga Klisdo go de ngado mai o de hainga, gi maua ai e dangada alodahi e hagadonusia gi heohi i daho de Maadua.
De hagamouli se mee ange gi dangada alodahi
5 Moses ne sisi dagodo de hagaheohi o tangada i dono daudali i de hainga: “Tangada e hai hegau i de hainga e mouli ai donu.” #Lev 18.5 6Aagai de hagaheohi mai i de gai e hai ange, “Aude hagadaba i oo lodo, goai e hanage gi de langi?” (e hanage e gave iho ai Klisdo)#Deut 30.12-14 7aabe, “Goai e hano iho gi de mommee o de gau maakau?” (e hagaahe age ai Klisdo i de mommee o de gau maakau). 8Aagai aahee muna gu tala laa? “De muna e baa adu donu gi goodou, gai gu dagodo donu i lodo oodou ngudu aama oodou lodo,” go muna e tala ai dagodo o de gai amaadeu e agoago ai laa. 9Go hiidinga noo koe e tala i doo ngudu bolo Iesu go Tagi Maolunga ma de hagadonusia i oo lodo bolo de Maadua gu hagamouli age ia i de magau, gai koe e hagamouli. 10I hiidinga tangada e hagadonusia i ono lodo e hai hogi ga heohi, gai tangada e daalaa hagadonu mee nei i dono ngudu e hagamouli. 11Gai e hagadaba de Beebaa Dabu, “Tangada e hagadonusia ia e dee hagadogaa ina naa donu.” #Isa 28.16 12Gai e dee dagodo geegee donu tangada Ssuu ma tangada Gentile; e dahi donu huu olaadeu Dagi Maolunga, ia e hagamanuuia gilaadeu alodahi e hagahia ange ia. 13Gai e hagadaba de Beebaa Dabu, “Be goai e hagahia de ingoo o Tagi Maolunga e hagamouli donu.” #Joel 2.32
14Dee hee de hai a dangada e hagahi ange ai de ia alaadeu tigi hagadonusia laa? Gai dee hee de hai a dangada e hagadonusia ai de ia, alaadeu tigi langona ono dagodo? Gai dee hee de hai a dangada e langona ai noo tigi ai se dangada ne agoagona ange gilaadeu? 15Gai dee hee de hai a dangada e agoago ai, noo teai ne hagasauaa ina gilaadeu gi hulo? Gai gu sisi e hai ange, “Ga dae laa de mahamaha vae o dangada e agoago ina de longo danuaa!” #Isa 52.7
16Aagai e dee go de gau Israel alodahi ne daohia muna o de longo danuaa; go hiidinga Isaiah ne hagadaba, “Tagi Maolunga, goai ne hagadonusia amaadeu agoago?” #Isa 53.1 17Deenei ai, de gai e daamada mai i taadeu langona de muna, go de agoago o de longo danuaa o Klisdo.
18Aagai au e ssili adu: E aha, gilaadeu tigi langona laa donu? Uaa, gilaadeu gu langona donu, go hiidinga gu sisi e hai ange,
“Olaadeu leo gu hulo ma gu tae gi henua i lalo alodahi,
gai alaadeu muna gu tae gi luu bido o henua i lalo.” #Psa 19.4
19Aagai au e ssili adu: E aha, de gau Israel tee tonu ange laa donu? Taamada gai Moses ne hagadaba,
“Au e hai naa goodou gi llodo gaiaa i gilaadeu tigi hai gi se huaahenua;
ma de llili i dahi huaahenua llodo ssenga.” #Deut 32.21
20Gai Isaiah ne lo taane donu i de hagadaba,
“Gilaadeu e dee saalaa ngau gu gidee au;
au gu hagaago ange au gi gilaadeu e dee siilia ogu dagodo.” #Isa 65.1
21Aagai ia ne hagadaba i dagodo o Israel,
“Mai i taiao ga boo ai gai au ne haalo ange luoogu lima
gi dahi huaadangada dee hagallongo i muna ma de llodo e hai baasi.” #Isa 65.2
Currently Selected:
Romans 10: DBD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
