Mark 9

1Iesu ne hai ange hogi gi dangada, “Ni muna abodonu aagu e hai adu nei gi goodou, hanu dangada e tuu nei i kinei e dee maakau naa donu ga dae ai gi delaadeu gidee de nohoanga hodooligi o de Maadua e humai i de mmahi.”

De hagadagodo gee o Iesu

(Mat 17.1-13; Luke 9.28-36)

2Dua e ono laangi, gai Iesu ne hagahi Peter ma James aama John, ga hulo ai gilaadeu gi dahi mounga maolunga e deai dangada iai. Gai ia gu hagadagodo gee i olaadeu madamada;#2 Pe 1.17-18 3ono malo gu malamalama ma de tea mmao, tigi ai se dangada i henua i lalo ne maua i de hai gi tea hanu malo, bei dagodo de tea o ono malo. 4Gai Elijah ma Moses gu hagassula mai ga pasa ange gi Iesu.

5Gai Peter ne hai ange gi Iesu, “Tangada agoago, e danuaa taadeu nnoho i kinei! Gidaadeu ga hagatuu e dolu baasi hale; e dahi oou, e dahi o Moses, gai e dahi o Elijah.” 6(Gai ia tee iloo donu ana muna ne tala, go hiidinga gilaadeu gu maatagu mmao.)

7Gai dahi giliiga gu hano iho ga haoli gilaadeu, gai dahi leo mai i lo te giliiga laa ga hagadaba, “Deenei dagu Dama Daane hagamogomogo; goodou hagalaangona ana muna!” #Mat 3.17; Mark 1.11; Luke 3.22

8De masavaa laa donu huu, gai gilaadeu ga kalo age gu dee gidee ange e gilaadeu hanu dangada, go Iesu donu huu.

9Gai de masavaa huu olaadeu ne iho mai ai i honga de mounga, gai Iesu ga hai ange gilaadeu gi dee daalaa ange gi dangada mee alaadeu gu gidee laa, ga dae ai gi de mouli age o Tama a Tangada mai i de magau. 10Gai ana dangada agoago ne daohi mee laa i olaadeu lodo, ma de hagadau ssili be dee hee de hagadoonunga o de mouli age mai i de magau.

11Gai gilaadeu ne ssili ange hogi gi Iesu, “Gu aha gu hagataba ai laa de gau sisi bolo Elijah e humai naa i mua?” #Mal 4.5; Mat 11.14

12Ia ne hai ange gi gilaadeu, “Elijah e humai naa donu i mua, ga hagadabena mee alodahi. Gai gu aha gu sisi ai laa, bolo Tama a Tangada e kona naa donu dono hagaduasala ina, ma dono hagangadi mee ina? 13Aagai au e hai adu gi goodou, bolo Elijah gu humai donu, gai dangada gu hai ange gi de ia mee alodahi alaadeu e llodo e hai ange gi de ia, bei de hai gu sisi ai.”

De hagaieiangi o tama iai de hagasaalunga baubau

(Mat 17.14-21; Luke 9.37-43a)

14Gai de masavaa huu olaadeu ne aahe mai ai gi daho denga dangada agoago ange laa, gai gilaadeu gu gidee dangada soa gu hagabuni mai gi kilaa. Gai de gau sisi e hagadaumee ange gi denga dangada agoago. 15Aagai ga gidee huu e dangada Iesu, gai gilaadeu gu llele mouli, gai gilaadeu ga saavini ga hedae ange gi de ia.

16Gai Iesu ga ssili ange gi gilaadeu, “Ni aha oodou e hagadaumee ai naa?”

17Gai dahi daane i magavaa o dangada ga hai ange gi Iesu, “Tangada Agoago, au ne gaamai dagu dama daane gi de goe, i hiidinga dahi hagasaalunga baubau gu noho i ono daha, gai gu hai ia gi dee maua i de basa. 18Gai de masavaa naa huu a de hagasaalunga e hagaduasala ai ia, gai ia ga hagabaguu gi honga de gelegele, ga hagasali dono saavale ma de kadi ono gauvae, aama de hagamakaga dono angaanga. Gai au ne dangidangi ange gi au dangada agoago, gilaadeu gi haia gi hano gee de hagasaalunga laa, gai gilaadeu tee maua.”

19Aagai Iesu ne basa ange ga hai ange gi gilaadeu, “Goodou se atangada e dee hagadonusia! Dee hee maa taulooloa dogu noho i oodou daha? Dee hee maa taulooloa de golomagi ogu lodo i goodou? Gaamai ia gi ogu daha!”

20Gai gilaadeu ga dagi mai tama daane laa gi ono daha. Gai de masavaa huu a de hagasaalunga baubau laa ne gidee ai Iesu, gai ia ga hai gu lele age tama laa i de masavaa laa donu huu, ma de hagabaguu ia gi honga de gelegele, ga hai ia gi dige saele ma de hagasali dono saavale.

21Gai Iesu ga ssili ange gi tamana o tama daane laa, “Dee hee maa taulooloa dono dagodo bee nei?”

Gai tamana ga hai ange, “Mai loo i dono gauligi. 22Gai gu dee modu dana hagabaguu ange dagu dama gi lo te ahi ma lo te vai e daa ai ia gi magau. Gai noo koe e maua, gai koe lodo aloha mai gi gimaau!”

23Iesu ne hai ange gi de ia, “ ‘Noo koe e maua,’ — mee alodahi e maua donu i de hai ange gi tangada e hagadonusia.”

24De masavaa laa gai tamana o tama daane laa ga hagaleo laumalie, ga hai ange, “Au e hagadonusia, gai balea mai au i tee dohu dogu gai!”

25Gai ga gidee huu e Iesu dangada soa gu saavini mai gi kilaa, aagai ia ga hagasee de hagasaalunga baubau laa, ga hai ange gi de ia, “De hagasaalunga e noodia laa dono alelo ma de pono luoono dalinga, au e hai adu gi de goe, sao mai i ono daha, gai koe aude ahe ange donu gi ulu gi ono lodo!”

26Aagai de hagasaalunga laa ga oo ma de hai gi lele age tama daane laa, gai ia ga sao ga hano gee mai i ono daha. Gai tama daane laa gu bei dagodo o tangada magau, gai dangada ga hagataba, “Ia gu magau!” 27Aagai Iesu ga poo dono lima ga hagahidi age ia, gai ia gu hidi ga duu gi lunga.

28Gai de masavaa huu o Iesu ne ulu ai gi lo te hale, gai ana dangada agoago ga ssili ange gi de ia, “Gu aha tee maua ai laa e gimaadeu i de hai gi hano gee de hagasaalunga baubau laa?”

29Ia ne hai ange gi gilaadeu, “Mee bee nei e maua donu huu i de hai gi hulo gee i talodalo.” #9.29 Hanu beebaa Greek ange laa e hagapuni ange ma de hagahiikai.

De ahe ange a Iesu ga tala dono magau

(Mat 17.22-23; Luke 9.43-45)

30Gai Iesu ma ana dangada agoago ne loomai i kilaa ga hulo ga hagadaga i Galilee. Gai ia tee hai gi iloo e dangada delaadeu mommee iai, 31go hiidinga ia e agoago ange ana dangada agoago i de masavaa laa. Gai ia ne hai ange gi gilaadeu: “Tama a Tangada gu dai gaavange naa gi ssauaa o dangada, gai gilaadeu e daa naa ia gi magau. Aagai dua naa huu e dolu laangi gai ia gu mouli age.” 32Aagai gilaadeu tee tonu ange gi ana muna, gai ne maatagu i de ssili ange gi de ia.

Goai e maolunga?

(Mat 18.1-5; Luke 9.46-48)

33Gai gilaadeu gu tae gi Capernaum. Gai de masavaa o Iesu gu noho ai i lo te hale, gai ia ga ssili ange gi gilaadeu, “Ni aha oodou e hagadaumee ai laa i honga de haiava?” 34Gai gilaadeu gu dee mmuu, go hiidinga de masavaa olaadeu ne seesee mai ai i honga de haiava, gai gilaadeu ne hagadaumee i olaadeu magavaa, be goai e maolunga.#Luke 22.24

35Gai ia ne hano ga noho gi lalo ga hagahi tinoangahulu ma dogolua, ga hai ange gi gilaadeu, “Be goai e lodo go ia i mua, gai ia gi haia go ia e hagaodia mai, ma de hai gi se dangada hai hegau niio dangada alodahi.” #Mat 20.26-27; 23.11; Mark 10.43-44; Luke 22.26

36Gai Iesu ga gaamai dahi gauligi ga hagaduu i olaadeu magavaa, ga buuludi ange ia, gai ia ga hai ange gi gilaadeu, 37“Be goai e abodonu ange gi dahi gauligi bei tamaa gauligi nei i hiidinga o dogu ingoo, gai ia e abodonu mai donu gi de au. Gai be goai e abodonu mai gi de au, gai ia e abodonu ange donu gi de ia ne haia nei au gi humai.” #Mat 10.40; Luke 10.16; John 13.20

Tangada e dee hai baasi mai se soa donu niiodaadeu

(Luke 9.49-50)

38John ne hai ange gi de ia, “Tangada Agoago, gimaadeu ne gidee dahi daane e hai gi hulo denga hagasaalunga baubau i doo ingoo, gai gimaadeu ga hai ia gi dee haia, go hiidinga ia e dee hano saele madali gidaadeu.”

39Aagai Iesu ne hai ange, “Goodou aude buibuia ia; go hiidinga e deai donu se dangada e haia dahi sauaa i dogu ingoo, gai muli mai ga tala hanu muna e hai baasi mai ai gi de au. 40Be goai e dee hai baasi mai gi gidaadeu, gai ia se soa donu niiodaadeu.#Mat 12.30; Luke 11.23 41Ni muna abodonu aagu e hai adu nei gi goodou, be goai e gaavadu gi goodou dahi ubu vai i dogu ingoo, i hiidinga goodou nii de Klisdo, gai ia e dee tili donu dono hagaoanga.#Mat 10.42

Denga hagatale e haia ga haisala dangada

(Mat 18.6-9; Luke 17.1-2)

42“Gai be goai e haia ga haisala dahi dangada maolalo bee nei gu hagadonusia au, gai e danuaa ange donu de nnoa ange dahi hadu mmili laumalie gi dono ua, ga tili ai ia gi lo te moana gelo. 43Noo doo lima e hai ga haisala goe, gai koe duudia dilia. E danuaa ange doo ulu i de mouli ma doo angaanga e dee odi ange, i doo hano gi lo te ahi#9.43 ahi: de beebaa Greek e hai ange go Gehenna. ma luoo lima ngaadahi, go de mommee e deai se magau ai de ahi.#Mat 5.30 [44Go de mommee e dee maakau ai denga ilo, gai de ahi e dee magau donu.]#9.44 Hanu beebaa Greek ange laa e dee dagodo ai de gubu nei. 45Gai noo doo vae gu hagahaisala goe, gai koe duudia dilia. E danuaa ange doo ulu i de mouli ma dahi vae, i doo tili ange gi lo te ahi#9.45 ahi: de beebaa Greek e hai ange go Gehenna. ma luoo vae ngaadahi. [46Go de mommee e dee maakau ai denga ilo, gai de ahi e dee magau donu.]#9.46 Hanu beebaa Greek ange laa e dee dagodo ai de gubu nei. 47Gai noo doo ganomada e hagahaisala goe, gai koe laoa mai dilia. E danuaa ange doo ulu i de nohoanga hodooligi o de Maadua ma dahi ganomada, i doo tili ange gi lo te ahi#9.47 ahi: de beebaa Greek e hai ange go Gehenna. ma luoo ganomada ngaadahi,#Mat 5.29 48go de mommee e dee maakau ai denga ilo, gai de ahi e dee magau donu.#Isa 66.24

49Dangada alodahi e hagagilimalali naa i de ahi.#9.49 Hanu beebaa Greek ange laa e hagapuni ange Gai denga sigidaumaha alodahi e hagadanuaa i soolo.

50Soolo se mee danuaa; aagai noo gu dee mami soolo, gai dee hee ai de hai e hagaahe ange ai e hai gi mami soolo? Haia gi dagodo soolo i oodou lodo, gi maua ai e goodou i de nnoho hagabuni i de baba.” #Mat 5.13; Luke 14.34-35

Currently Selected:

Mark 9: DBD

Highlight

Copy

Compare