Mark 1

De agoago o John taane Babudaisi

(Mat 3.1-12; Luke 3.1-18; John 1.19-28)

1Deenei taamada de longo danuaa o Iesu Klisdo, Tama Daane a de Maadua.

2Gu sisi i de beebaa a de pelaabisi go Isaiah, e hai ange:

“Tilo, au e hai gi hano dogu dangada hagailoo i oo mada i mua,

gi hagadabena ina ai doo haiava.” #Mal 3.1

3“De leo o dahi e oo i de vao ma e hagadaba,

‘Hagadabena ina de haiava o Tagi Maolunga;

hagassoea ono haiava!’ ” #Isa 40.3

4Gai a John ne humai ga babudaisi i de vao ma de agoago dagodo o de babudaisi, ma de dahuli o de lodo gi maatala ai denga haisala. 5Gai dangada alodahi i de henua go Judea ma Jerusalem, ne hulo ga babudaisi i ono daha i ssaalingaa vai go Jordan, ma de tala olaadeu haisala. 6Gai malo o John e hai i huluhulu o de gamelo, dono beele ni gili kaau, gai ia e gai itebuubuu ma hooni lodo henua.#2 Ki 1.8 7Gai ia ne agoago, ga hai ange, “Dahi dangada e maolunga ange i de au e humai naa i ogu dua, gai au e dee bau ange gi de ino iho e tala mee e noonooa ai ono mee vae. 8Au e babudaisi goodou i de vai, aagai ia e babudaisi naa goodou i de Hagasaalunga Dabu.”

De babudaisi o Iesu ma dono hagatale

(Mat 3.13—4.11; Luke 3.21-22; 4.1-13)

9Laangi laa gai Iesu ne humai i Nazareth i Galilee ga babudaisi i daho John i lo te saalingaa vai go Jordan. 10Gai de masavaa huu o Iesu ne ea age ai i lo te vai, gai ia gu gidee de langi gu mahuge, gai de Hagasaalunga ⌊Dabu⌋ gu hano iho gi ono elunga bei hoolinga o de manu kono. 11Gai dahi leo gu basa mai i de langi ga hagadaba, “Go koe dagu Dama Daane hagamogomogo, au e malangilangi i de goe.” #Gen 22.2; Psa 2.7; Isa 42.1; Mat 12.18; Mark 9.7

12De masavaa laa donu huu gai de Hagasaalunga ⌊Dabu⌋ ga kave ia gi de vao. 13Gai ia ne noho i de vao i e madahaa laangi, ga hagatale ai i daho Satan, ma de noho madali denga manu aada; gai denga dangada de langi ne loomai ga bale ange ia.

De daamada hegau a Iesu

(Mat 4.12-22; Luke 4.14-15; 5.1-11)

14Gai dua huu de boogia o John ga hhao gi lo te hale pono, gai Iesu ga ahe gi Galilee ga agoago ai de longo danuaa a de Maadua, 15ga hai ange, “De nohoanga hodooligi o de Maadua gu baa mai donu. Goodou daahuli oodou lodo ma gi hagadonusia de longo danuaa!” #Mat 3.2

De hagahi a Iesu denga dangada agoago i taamada

16Iesu ne hano ga seesee i gaogao de Vai o Galilee, gai ia gu gidee Simon ma dono daina daane go Andrew e maga delaau galauna i lo te vai, go hiidinga gilaau ni daane haangoda. 17Gai Iesu ga hai ange gi gilaau, “Gooluu daudali mai i de au, gai au ga hai gooluu gi ni daane e haangoda ina dangada.” 18De masavaa laa donu huu, gai gilaau ga dugu alaau galauna ga daudali ange i de ia.

19Gai Iesu ne damaa hanadu ange, gai ia gu gidee hogi a James tama daane a Zebedee, ma dono daina go John, gilaau e nnoho i lo te boose ma e bonobono ange ai alaau galauna. 20Gai de masavaa laa donu huu gai ia ga hagahi gilaau, gai gilaau ga dugu delaau damana go Zebedee i lo te boose madali de gau hai hegau hagao, gai gilaau ga daudali ange i de ia.

De hai a Iesu gi hano gee dahi hagasaalunga baubau

(Luke 4.31-37)

21Gai gilaadeu ne hulo ga nnoho i Capernaum. Gai ga dae mai huu de laangi o Sabbath, gai Iesu ga hano gi lo te synagogue ga agoago ange ai dangada. 22Gai dangada gu llele mouli i ana agoago, go hiidinga ia e agoago bei tangada e dahi ono sauaa, ia e dee agoago bei de gau sisi.#Mat 7.28-29 23De masavaa laa donu huu gai dahi daane i lo te synagogue iai laa dahi hagasaalunga baubau ga oo ga hai ange, 24“Ni aha oou e lodo ai i omaadeu daha, Iesu tangada Nazareth? Koe e humai naa e daa gimaadeu gi maakau? Au e iloo be go koe goai: koe go de Ia Dabu a de Maadua!”

25Aagai Iesu ga hagasee ia, ga hai ange, “Aude basa, gai sao mai i ono daha!” 26Gai de hagasaalunga baubau laa ga hai gu lele age taane laa ma de oo i de leo laumalie, gai ia ga sao mai i daho taane laa.

27Gai dangada alodahi gu llele mouli, ga hagadau pasa i olaadeu magavaa, ga hagataba, “Se aha deenei? Ni agoago hoou? Ia ne basa ange gi denga hagasaalunga baubau i ssauaa, gai gilaadeu ne hagallongo ange gi de ia.” 28Gai ne moolau de dele ono longo i de ungaamee alodahi o Galilee.

De hagaieiangi a Iesu dangada soa

(Mat 8.14-17; Luke 4.38-41)

29Gai ia ne hagamoolau ga hano gee mai i synagogue, ga hano gi de hale o Simon ma Andrew, madali James ma John. 30Gai ssaulaba o Simon gu vvela dono angaanga ma e dagodo ai. Gai gilaadeu ga hagamoolau ga tala ange gi Iesu ono dagodo. 31Gai ia ga hano ga poo dono lima ga hagahidi age ia, gai dono angaanga gu dee vvela. Gai de hine laa ga hidi age ga hai ange hanu gai e gaimee ai gilaadeu.

32De ahiahi laa, gai dangada ne gaamai gi Iesu denga hagadaagangaa magi alodahi ma dangada iai denga hagasaalunga baubau. 33Gai dangada alodahi i de aduhale laa gu hagabuni mai gi luu baasi de haitoga o hale laa. 34Gai Iesu ga hagaieiangi denga magi alodahi ma de hai gi hulo denga hagasaalunga baubau. Aagai ia tee dugu ange denga hagasaalunga baubau gi pasa, go hiidinga gilaadeu e iloo be go ia goai.

Iesu e agoago i denga synagogue

(Luke 4.42-44)

35Gai Iesu ne oho age i taiao ga hano gi de mommee e deai dangada iai, ga dalodalo ai. 36Gai Simon ma dangada madali ia ne loomai ga ssala ia, 37gai ga gidee huu e gilaadeu ia, gai gilaadeu ga hai ange, “Dangada alodahi e ssala goe.”

38Gai ia ga hai ange gi gilaadeu, “Gidaadeu ga hulo gi denga aduhale e paa mai nei, gai au ga agoago ai hogi i kilaa; go hiidinga deenei donu de hiidinga oogu ne humai ai nei.” 39Gai Iesu ne hagadaga i Galilee alodahi, ga agoago i denga synagogue ma de hai gi hulo denga hagasaalunga baubau.#Mat 4.23; 9.35

De hagaieiangi a Iesu dahi daane lebelaa

(Mat 8.1-4; Luke 5.12-16)

40Gai dahi daane lebelaa ne humai gi daho Iesu ga duuduli ga dangidangi ange, ga hai ange, “Noo koe e lodo, gai koe e maua donu i de hagagilimalali au.”

41Gai Iesu gu aloha i de ia, gai ia ga haalo dono lima ga poo ange ia, ga hai ange, “Au e lodo, koe gu gilimalali.” 42De masavaa laa donu huu gai lebelaa o taane laa gu ieiangi, gai ia gu gilimalali.

43Gai Iesu ne hagakana ange ia, ga hai ia gi hano,#Lev 14.1-32 44ma de hai ange gi de ia, “Aude daalaa ange mee nei gi dahi dangada daudahi, gai koe hannoo hagaagona ange goe gi tangada haimeedabu, ma de hai ssigidaumaha o tangada gu gilimalali, bei dagodo muna a Moses, e hagadonu ai ⌊doo ieiangi⌋ i olaadeu daha.” 45Aagai taane laa ne hano ga hagadele de longo laa. Gai Iesu gu dee maua i de hano gi denga aduhale e hagasula ange gi dangada soa, ia gu noho donu huu i mommee e deai dangada iai. Aagai dangada ga loomai gi ono daha i mommee alodahi.

Currently Selected:

Mark 1: DBD

Highlight

Copy

Compare