Matthew 21

De ulu o Iesu i Jerusalem

(Mark 11.1-11; Luke 19.28-40; John 12.12-19)

1Gai ga paa ange gilaadeu gi Jerusalem, gai gilaadeu gu tae gi Bethphage, i de Mounga o denga Olive, gai Iesu ga hai gi hulo e dogolua ana dangada agoago, 2ga hai ange gi gilaau, “Gooluu loadu gi de aduhale i ooluu mada i mua naa, gai gooluu e gidee naa dahi donkey e nnoa, gai dana dama i ono daha hogi; gai gooluu ga tala ga dagi mai gi ogu daha i kinei. 3Gai noo gu basa adu dahi dangada gi gooluu, gai gooluu hai ange, ‘Tangada Aamua e lodo e hai hegau i luu manu nei,’ gai ia e hagamoolau naa ga hai gi loomai luu manu laa.”

4Mee nei ne hai e hagassula ai muna gu tala laa i daho de pelaabisi, e hai ange,

5“Goodou hai ange gi tamaa hine o Zion,

‘Tilo, doodou hodooligi e humai naa,

ia e lodo maolalo, gai e gage i honga dahi donkey ma dana dama,

se dama nii dahi donkey.’ ” #Isa 62.11; Zec 9.9

6Gai luu dangada agoago laa ne hulo ga hai mee alodahi a Iesu ne tala ange laa gi gilaau. 7Gai gilaau ne dagi mai de manu laa ma dana dama gi daho Iesu, gai gilaadeu ga hhola ange olaadeu malo gi honga de manu laa, gai Iesu ga gage ange ga noho i ono elunga. 8Aagai dangada soa ne hhola ange olaadeu malo gi lo te haiava, gai hanu ne duuduu iho denga laa manu ga dugu ange gi honga de haiava. 9Gai dangada e hulo laa i ono mada i mua ma gilaadeu e loadu i ono dua ne hevaalogi, ga hagataba,

“Hosanna ange gi Tama a David!

E manuuia Tangada e humai i de ingoo o Tagi Maolunga!

Hosanna i de mommee maolunga mmao!” #Psa 118.25-26

10Gai de masavaa huu o Iesu ne ulu ai i Jerusalem, gai gu hellumi de aduhale alodahi, gai dangada ga ssili ga hagataba, “Goai taane nei?”

11Gai dangada soa laa ga hai ange, “Deenei Iesu, de pelaabisi mai i Nazareth o Galilee.”

De hagagilimalali o de temple

(Mark 11.15-19; Luke 19.45-48; John 2.13-22)

12Gai Iesu ne ulu gi lo te buibui o de temple ga alualu ai de gau hagao mee alodahi i lo te buibui o de temple, ma de hagaabongi denga deebele o dangada e seenisi ina sseene, ma seaa o dangada e hagao ina manu kono. 13Gai ia ne hai ange gi gilaadeu, “Gu sisi e hai ange, ‘Dogu hale e hagaingoo ange go de hale dalodalo;’ aagai goodou gu hai gi se mommee niio de gau gaiaa.” #Isa 56.7; Jer 7.11

14Gai de gau dee kide ma de gau balagelage ne loomai gi ono daha i lo te buibui o de temple, gai ia ga hagaieiangi gilaadeu. 15Aagai de masavaa huu a de gau haimeedabu maolunga ma de gau sisi ne gidee ai denga mee hagalele mouli a Iesu gu hai laa, ma de hevaalogi o denga gauligi i lo te buibui o de temple, ga hagataba, “Hosanna ange gi Tama a David!”, gai gilaadeu gu kona donu de llili; 16gai gilaadeu ga hai ange gi de ia, “Koe e langona naa muna a dangada e tala laa?”

Iesu ne hai ange gi gilaadeu, “Uaa, gai goodou tigi dau ange naa donu bolo e hai ange,

‘Koe gu hai denga gauligi ma gaagaa

gi hevaalogi gi duuhia’?” #Psa 8.2

17Gai Iesu ga hano gee mai i olaadeu daha ma de aduhale laa, ga hano gi Bethany ga noho ai i de boo laa.

De hagamalaia o de fig

(Mark 11.12-14, 20-24)

18Taiao age, i dono masavaa ne ahe ai gi de aduhale, gai ia gu saalohia. 19Gai ia gu gidee dahi fig e somo i gaogao de haiava, gai ia ne hano e tilo be hanu hua iai, gai ia tee gidee hanu hua i de manu laa, gai ni lau manu donu huu iai. Gai ia ga hai ange, “Koe e dee ahe ange naa donu e hua!” Gai de fig laa gu mmae i de masavaa laa donu huu.

20Gai de masavaa huu a denga dangada agoago ne gidee ai mee laa, gai gilaadeu gu llele mouli, ga hagataba, “Dee hee de hai ne moolau ai nei de mmae de fig nei?”

21Iesu ne hai ange gi gilaadeu, “Ni muna abodonu aagu e hai adu nei gi goodou, noo goodou e hagadonusia, e dee llodo lagolago, gai goodou e maua donu i de hai hegau ne hai ange nei gi de fig, aagai noo goodou e hai ange hogi gi de mounga nei, ‘Malanga age dilia ange goe gi lo te moana,’ gai e hai naa donu ga bei oodou muna.#Mat 17.20; 1 Co 13.2 22Gai be se aha naa huu oodou e dangidangi ai i talodalo, gai e gaavadu donu gi goodou, noo goodou e hagadonusia.”

De ssili a denga dagi dagodo ssauaa o Iesu

(Mark 11.27-33; Luke 20.1-8)

23De masavaa o Iesu ne ulu ai ga agoago i lo te temple, gai de gau haimeedabu maolunga ma denga dagi ne loomai, ga ssili ange, “Niioai ssauaa aau e hai ai naa mee nei? Gai goai ne gaavadu gi de goe ssauaa naa?”

24Iesu ne hai ange gi gilaadeu, “Au e ssili adu hogi gi goodou dahi mee, gai noo goodou e pasa mai gi dagu muna ssili, gai au ga tala adu hogi gi goodou be niioai ssauaa aagu e hai ai nei mee nei. 25Go hee ne humai ai ssauaa o John e babudaisi ai laa? Se mee mai i de langi aabe se mee mai i daho dangada?”

Gai gilaadeu ne pasa i olaadeu magavaa, ga hagataba, “Noo gidaadeu e hai ange, ‘Se mee mai i de langi,’ gai ia e ssili mai naa, ‘Gai gu aha goodou gu dee hagadonusia ai naa ana muna?’ 26Aagai noo gidaadeu e hai ange, ‘Se mee mai i daho dangada,’ gai gidaadeu e maatagu i hagabuulingaa dangada soa nei, go hiidinga gilaadeu alodahi e hagataba bolo a John se pelaabisi.”

27Gai gilaadeu ga hai ange gi Iesu, “Gimaadeu e dee iloo.”

Gai ia ga hai ange gi gilaadeu, “Au e dee tala adu hogi be go hee ne humai ai ssauaa aagu e hai ai nei mee nei.

De mee hagasengasenga o e dogolua hai daina

28“Aahee oodou maanadu? Dahi daane e dogolua ana dama daane. Gai ia ne hai ange gi tama madua, ‘Dagu dama, hannoo hai hegau i dagu veelengaa grape ailaa nei.’

29Gai ia ne hai ange, ‘Au e dee hano,’ aagai muli mai ia ne sui dana maanadu ga hano.

30Taane laa ne hano hogi ga tala ange muna mau gi tama gauligi; gai ia ga hai ange, ‘Tamana, au e hano donu,’ aagai ia tee hano.

31Goai de gilaau ne haia lodo o dono damana?”

Gilaadeu ne hai ange, “Go tama madua.”

Iesu ne hai ange gi gilaadeu, “Ni muna abodonu aagu e hai adu nei gi goodou, de gau hagabudu taagisese ma denga haahine hai be ni manu, e ulu i de nohoanga hodooligi o de langi i oodou mada i mua. 32Go hiidinga a John ne humai e hagaago adu gi goodou de haiava o de heohi, aagai goodou tee hagadonusia ana muna; gai dangada e hagabudulia taagisese ma denga haahine hai be ni manu ne hagadonusia ana muna. Goodou ne gidee donu hogi ana hegau ne hai, gai goodou tee daahuli oodou lodo aabe ne hagadonusia ana muna.#Luke 3.12; 7.29-30

De gau e diiloo ange de veelengaa grape

(Mark 12.1-12; Luke 20.9-19)

33“Goodou nnoho mai ange hagalaangona dahi mee hagasengasenga. E dahi daane aamua ne doo dahi veelengaa grape ga buibui luu baasi, ma de geli dono mommee kumi grape, aama de hagaduu ai dahi hale dagitilo, ga dugu ange gi hanu dangada hai veelenga, gai ia ga hano gi dahi henua gee.#Isa 5.1-2 34Gai de masavaa huu ne maatua ai hua o dana veelenga, gai ia ne hai gi hulo ono dangada hai hegau, gi daho dangada e diiloo ange dana veelenga, gi gaavee ai dana diba mai i denga huamanu.

35Aagai de gau laa ga poo ono dangada hai hegau ga hagailiili dahi, gai ga daa dahi gu magau, gai ne maga dahi i denga hadu. 36Gai ia ne hai ange hogi gi hulo de gau hai hegau e soa ange i gilaadeu i taamada. Aagai de gau e diiloo ange dana veelengaa grape ne hai hogi gilaadeu bei de gau hai hegau i taamada. 37Muli mai gai ia ne hai gi hano dana dama daane gi gilaadeu, ia ne hagadaba, ‘Gilaadeu e hagadubu naa dagu dama daane.’

38Aagai ga gidee huu e gilaadeu dana dama, gai gilaadeu ga hagataba, ‘Deenei tama e bolo ange aagena de mommee nei. Loomai, gidaadeu ga daa ia gi magau, gai gidaadeu ga kave dono boolonga.’ 39Gai gilaadeu ga poo ia ga kave gi tua de veelengaa grape ga daa ai ia gu magau.

40Deenei ai, ni aha ai naa a tangada niiana de veelengaa grape e hai ange gi de gau laa i dono masavaa e humai ai?”

41Gilaadeu ne hai ange gi de ia, “Ia e hagaduasala naa de gau baubau laa ga daa gilaadeu gu maakau, gai ga gaavange de veelenga laa gi hanu dangada gee, gai gilaadeu ga gaavange ai gi de ia dana diba i denga huamanu i de masavaa e hagihagi ai.”

42Iesu ne hai ange gi gilaadeu, “E aha, goodou tigi daulia ange naa donu muna nei i de Beebaa Dabu?

‘De hadu a de gau hagatuu hale ne hagangadi mee

gu hai go de hadu i tege;

de mee nei go Tagi Maolunga ne haia,

gai e hagalele mouli i taadeu tilo.’ #Psa 118.22-23

43Deenei ai, au e hai adu gi goodou, de nohoanga hodooligi o de langi e kave gee naa i oodou daha, ga gaavange gi de huaahenua e hai hegau i de heohi. [44Be goai e doo ange gi honga de hadu nei e maoha dono angaanga, aagai be goai e doo ange de hadu nei gi ono elunga, gai ia e balaginagina donu.”]#21.44 Hanu beebaa Greek ange laa e dee dagodo ai de gubu nei.

45De masavaa huu a de gau haimeedabu maolunga ma denga Pharisee ne langona ai denga mee hagasengasenga a Iesu, gai gilaadeu gu tonu ange bolo ia e basa i olaadeu dagodo. 46Gai gilaadeu ne hagatale de poo ia, aagai gilaadeu ne maatagu i dangada soa, go hiidinga dangada e hagataba bolo Iesu se pelaabisi.

Currently Selected:

Matthew 21: DBD

Highlight

Copy

Compare