Matthew 20
20
De gau hai hegau i de veelengaa grape
1“Gai de nohoanga hodooligi o de langi e bei dagodo o dahi dangada aamua e oho laa e hano e ssala dangada gi hulo gi hai hegau i dana veelengaa grape. 2Gai ga heloongoi huu gilaadeu ma de gau hai hegau bolo de hagaoanga se dahi denarius i de laangi, gai ia ga hai gilaadeu gi hulo gi hai hegau i dana veelengaa grape.
3Ia ne ahe ange hogi i daha ssiva aoaa#20.3, 5-6 ssiva aoaa … tuele … tolu i de ahiahi … lima i de ahiahi: de Beebaa Greek e hai ange go tolu aoaa … de ono aoaa … ssiva aoaa … de madaangahulu ma dahi aoaa. ga gidee hanu dangada e ngadi tuu i de mommee hagao mee, 4gai ia ga hai ange gi gilaadeu, ‘Goodou hulo hogi hai hegau i dagu veelengaa grape, gai au ga hagao adu goodou i de mee e heohi.’ Gai gilaadeu ga hulo ai loo.
5Taane laa ne ahe ange hogi i tuele aama tolu i de ahiahi ga hai mee mau. 6Ia ne ahe ange hogi i de lima i de ahiahi gai ia gu gidee hogi hanu e ngadi nnoho, gai ia ga ssili ange gi gilaadeu, ‘Gu aha gu ngadi nnoho ai naa goodou i de laangi nei alodahi?’
7Gilaadeu ne hai ange gi de ia, ‘Go hiidinga e deai donu se dangada e gaamai hanu hegau maamaadeu.’
Ia ne hai ange gi gilaadeu, ‘Goodou hulo hogi hai hegau i dagu veelengaa grape.’
8Gai ga ahiahi huu de mee, gai tangada niiana de veelengaa grape ga hai ange gi dono dangada hai hegau, ‘Hagahia de gau hai hegau ga hagao ange gilaadeu. Gai koe damadaa mai i gilaadeu ne loomai i de hagaodi ga hanage ai gi gilaadeu ne loomai i taamada.’ #Lev 19.13; Deut 24.15
9Dangada ne loomai laa ga hai hegau i de lima i de ahiahi ne loomai ga kave olaadeu hagaoanga, dahi ma dahi ne kave e dahi denarius. 10Gai de masavaa huu olaadeu ne hai hegau i taamada ne loomai ai e kave olaadeu hagaoanga, gai gilaadeu ne maanadu bolo olaadeu hagaoanga e kii ange naa. Aagai gilaadeu ne kave hogi e dagidahi denarius. 11Gai de masavaa huu ne kave ai olaadeu hagaoanga, gai gilaadeu ga nnanu i taane aamua laa. 12Gilaadeu ne hai ange, ‘De gau ne loomai nei i muli ne hai hegau donu huu i e dahi aoaa, gai koe e hagahedae ange gimaadeu gi gilaadeu, gai gimaadeu ne hai hegau kona laa i de masavaa hagavvela!’
13Taane aamua laa ne hai ange gi dahi daane i olaadeu magavaa, ‘Dogu soa, au tigi vaivai dagodo adu donu gi de goe; e dee deenei de hagaoanga odaadeu ne heloongoi ai laa, e dahi denarius? 14Gaavee doo hagaoanga hannoo ai. Au e lodo hogi e gaavange gi gilaadeu ne loomai i de hagaodi gi bei dagu mee ne gaavadu gi de goe. 15E aha, e dee heohi dagu hai be se aha oogu e lodo ai i agu mee donu? Aabe goodou gu lodo gaiaa naa i hiidinga au e abodonu?’
16Deenei ai, gilaadeu e hagaodia e hai naa go gilaadeu i mua, gai gilaadeu i mua e hai naa go gilaadeu e hagaodia.” #Mat 19.30; Mark 10.31; Luke 13.30
De tala a Iesu dono magau i tolu hanonga
(Mark 10.32-34; Luke 18.31-34)
17De masavaa o Iesu ne hanage ai gi Jerusalem, aagai ia ne vvae gee ana dangada agoago e dinoangahulu ma dogolua i honga haiava, ga hai ange gi gilaadeu, 18“Tilo, gidaadeu e hulo naa gi Jerusalem. Gai Tama a Tangada e gaavange naa gi de gau haimeedabu maolunga ma de gau sisi, gai gilaadeu e hagamodu naa ono muna e daa gi magau, 19gai e gaavange naa ia gi denga Gentile gi doo mee i de ia ma de hagailiili aama de daudau ia i de laagau lui. Gai de hagadolu laangi naa huu gai ia gu mouli age.”
Tangidangi a dahi dinana
(Mark 10.35-45)
20Tinana o luu dama daane a Zebedee ne humai madali luaana dama daane, gai ia ga duuduli i mada luu mada o Iesu e dangidangi ange gi de ia i dahi mee.
21Iesu ne ssili ange gi de ia, “Se aha oou e lodo ai?”
De hine nei ne hai ange gi Iesu, “Dugua ange luaagu dama gi nnoho madali goe i honga doo nohoanga hodooligi, dahi i doo baasi madau, gai dahi i doo baasi masui.”
22Iesu ne hai ange gi luaana dama, “Gooluu e dee iloo donu ooluu mee e dangidangi ai. Gooluu e maua i de unu i de ubu oogu gu dai unu ai?”
Gilaau ne hai ange gi de ia, “Gimaau e maua!”
23Iesu ne hai ange gi gilaau, “Gooluu e unu donu i de ubu oogu e unu ai, aagai e dee go au e hilihilia dangada e nnoho i dogu baasi madau ma dogu baasi masui. Aagai mommee nei gu hagadabena ange gi gilaadeu a dogu Damana gu hagamodu ange laa aagena.”
24Gai ga langona huu e tinoangahulu dangada agoago ange laa, gai gilaadeu gu llili i de hai daina daane laa. 25Iesu ne hagahi gilaadeu, ga hai ange, “Goodou e iloo bolo dagi o denga Gentile e hai gi de mahi dangada i olaadeu sauaa, gai olaadeu dangada aamua e hagahai hegau gilaadeu i olaadeu sauaa.#Luke 22.25-26 26Aagai goodou e dee hai hegau bee nei i oodou magavaa. Aagai be goai e lodo gi maolunga ia i oodou magavaa, gai ia gi se dangada hai hegau niiodou,#Mat 23.11; Mark 9.35; Luke 22.26 27gai be goai e lodo ia gi se dangada aamua i oodou magavaa, aagai ia gi se dangada hai hegau niiodou — 28bei dagodo o Tama a Tangada, ia tee humai gi hai hegau ange dangada gi de ia, aagai ne humai e hai hegau ange gi dangada, ma de gaavange dono mouli e hagaola ai dangada soa.”
De hagaieiangi o e dogolua daane dee kide
(Mark 10.46-52; Luke 18.35-43)
29Gai ga ssao huu Iesu ma ana dangada agoago e hulo gee i Jericho, gai dangada soa mmao ga daudali ange i de ia. 30Gai tilo, e dogolua daane dee kide e nnoho i gaogao de haiava i kilaa, gai ga langona huu e gilaau bolo Iesu gu humai i de haiava laa, gai gilaau ga hevaalogi ga hai ange, “Tagi Maolunga, Tama a David, lodo aloha mai gi gimaau!”
31Gai dangada ne hagasee gilaau, ga hai ange gilaau gi dee hagalongaa, aagai gilaau ga kii ange donu de oo ga hai ange, “Tagi Maolunga, Tama a David, lodo aloha mai gi gimaau!”
32Gai Iesu ne duu ga hagahi gilaau ga ssili ange, “Se aha ooluu e llodo au gi haia adu mooluu?”
33Gilaau ne hai ange gi de ia, “Tagi Maolunga, huugea omaau ganomada.”
34Gai Iesu gu lodo aloha i gilaau ga poo ange olaau mada, de masavaa laa donu huu gai olaau ganomada gu ieiangi, gai gilaau ga daudali ange i Iesu.
Currently Selected:
Matthew 20: DBD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
