Matthew 16

De usuusu ange Iesu gi haia dahi hagailonga

(Mark 8.11-13; Luke 12.54-56)

1Hanu Pharisee ma Sadducee ne loomai e hagatale Iesu, gai gilaadeu ga hai ange, “Gimaadeu e llodo e tilo dahi hagailonga mai i de langi.” #Mat 12.38; Luke 11.16

2Iesu ne hai ange gi gilaadeu, “Goodou e hagataba i de masavaa e ahiahi ai, ‘E laohie naa de mee; i hiidinga e mmea lo te langi.’ 3Gai goodou e hagataba i taiao, ‘E baubau naa de mee ailaa nei, go hiidinga gu mmea lo te langi ma de hagauliuli age.’ Goodou ni dangada e daahangadia dangada, goodou e iloo de tilo dagodo o lo te langi, aagai e dee tonu ange gi denga hagailonga e hai i de masavaa nei. 4De atangada baubau ma tee hai hegau i de mee abodonu e ssala dahi hagailonga, gai e deai ange donu se hagailonga e hagaago ange gi gilaadeu, go de hagailonga donu huu o Jonah.” #Mat 12.39; Luke 11.29 Gai ia ga hano gee mai i olaadeu daha.

Mee hagahua a denga Pharisee ma Sadducee

(Mark 8.14-21)

5De masavaa o denga dangada agoago ne tae ai gi de baasi gee de vai, gai gilaadeu ne ngalo de kave hanu pelaoaa. 6Iesu ne hai ange gi gilaadeu, “Goodou kana ange dagidiiloo goodou i mee hagahua a denga Pharisee ma denga Sadducee.” #Luke 12.1

7Gai gilaadeu ne pasa i olaadeu magavaa ga hagataba, “Go hiidinga gidaadeu ne ngalo i de gaamai hanu pelaoaa.”

8Aagai Iesu gu iloo e ia alaadeu maanadu, gai ia ga hai ange, “Goodou ni dangada e vaaligiligi oodou kai, gu aha gu pasa ai naa goodou i teai oodou pelaoaa? 9Goodou tigi tonu ange naa donu? Goodou gu ngalo naa pelaoaa e lima ne haangai ai laa de limamano, gai ne hia laa gede ne hhao ga hoohonu i mee ne doe?#Mat 14.17-21 10Aabe go pelaoaa e hidu ne haangai ai laa de haamano, gai e hia laa gede oodou ne hhao ai mee ne doe?#Mat 15.34-38 11E aha, goodou tigi tonu ange naa donu bolo au tee basa adu i denga pelaoaa? Gai au e hai adu goodou gi kana ange i mee hagahua a denga Pharisee ma Sadducee.” 12Aagai gilaadeu gu tonu ange bolo ia e dee hai ange gilaadeu gi kana ange i mee e hagahua ai laa pelaoaa, gai gilaadeu gi kana ange i agoago a denga Pharisee ma Sadducee.

De tala a Peter bolo Iesu go de Klisdo

(Mark 8.27-30; Luke 9.18-21)

13De masavaa o Iesu ne hano ai gi de vaaenga o Caesarea Philippi, gai ia ga ssili ange gi ana dangada agoago, “Dangada e hagataba laa bolo goai Tama a Tangada?”

14Ana dangada agoago ne hai ange, “Hanu bolo koe go John taane Babudaisi, gai hanu bolo go Elijah, aagai hanu bolo go Jeremiah aabe go dahi pelaabisi ange laa.” #Mat 14.1-2; Mark 6.14-15; Luke 9.7-8

15Gai ia ga ssili ange gi gilaadeu, “Aagai goodou e hagataba bolo au goai?”

16Gai Simon Peter ga hai ange gi de ia, “Go koe donu de Klisdo, Tama Daane a de Maadua e mouli laa!” #John 6.68-69

17Iesu ne hai ange gi de ia, “Simon tama daane a Jonah, koe gu manuuia! Go hiidinga e dee go dangada ne hagaagona adu mee nei gi de goe, aagai go dogu Damana i de langi laa. 18Au e hai adu, go koe go Peter;#16.18 Peter: de muna Greek go Petros e bei go de hadu. go honga de baba nei aagu e hagaduu ai dogu nohoanga dabu, gai ssauaa o Hades e dee maua donu i de hagadee kii. 19Gai au e gaavadu naa gi de goe de gii o de nohoanga hodooligi o de langi; gai be se aha naa huu aau e pono i henua i lalo, gai e pono hogi i de langi; gai be se aha naa huu aau e dugu ange gi hai i henua i lalo, gai e dugu ange hogi gi hai i de langi.” #Mat 18.18; John 20.23 20Aagai Iesu ga hai ange gi ana dangada agoago gilaadeu gi dee daalaa ange gi dangada bolo go ia de Klisdo donu.

De tala a Iesu dono hagaduasala ma dono magau

(Mark 8.31—9.1; Luke 9.22-27)

21Dua de masavaa laa, gai Iesu ne daamada de tala ange gi ana dangada agoago bolo ia e hano naa gi Jerusalem e hagaduasala ai i daho denga dagi, ma de gau haimeedabu maolunga, aama de gau sisi, gai ia e daa naa gi magau, aagai de hagadolu laangi naa huu gai ia gu mouli age.

22Gai Peter ne kave Iesu ga hagasee, ga hai ange, “Tagi Maolunga, de Maadua e dee dugu ange donu gi hai mee nei! Mee nei e dee hai adu donu gi de goe!”

23Iesu ne huli dua ga hai ange gi Peter, “Satan, hannoo gi ogu dua! Koe se dangada e buibuia ngau. Go hiidinga au maanadu e dee bei lodo o de Maadua, aagai e bei lodo o dangada.”

24Iesu ne hai ange hogi gi ana dangada agoago, “Be goai e lodo e daudali mai i de au, gai ia gi hagangadi mee ina ia, ga saabai dono laagau lui ga daudali mai ai i de au.#Mat 10.38; Luke 14.27 25Be goai e hagaola ina dono mouli e tili donu; aagai be goai e tili dono mouli i ogu hiidinga e hagaola donu dono mouli.#Mat 10.39; Luke 17.33; John 12.25 26Ni haigamaiana aha de maua e tangada henua i lalo alodahi, aagai dono mouli e tili? Aabe se aha a tangada e gaavange e sui ai dono mouli? 27Gai Tama a Tangada e humai naa i de mahamaha o dono Damana, madali ono dangada de langi, gai ia ga hagao ange ai gi bei dagodo hegau a dahi ma dahi.#Mat 25.31; Psa 62.12; Rom 2.6 28Ni muna abodonu aagu e hai adu nei gi goodou: e hanu donu dangada e tuu i kinei e dee maakau ga dae ai gi delaadeu gidee Tama a Tangada e humai i dono nohoanga hodooligi.”

Currently Selected:

Matthew 16: DBD

Highlight

Copy

Compare