Malachi 2
2
De hagaseegina o de gau haimeedabu
1“De gau haimeedabu, muna nei ni muna adu gi goodou: 2Noo goodou e dee hagallongo mai, noo goodou e dee daohi muna nei i oodou lodo, e hagadubu ai dogu ingoo, go Tagi o denga hagabuulinga hebagi e hagadaba, gai au e hai naa gi humai de malaia gi goodou, gai au e hai naa doodou manuuia gi se malaia. Ni muna abodonu, au gu hagamalaia donu mee nei, i hiidinga goodou e dee daohi mee nei i oodou lodo.
3Tilo, au e hagaduasala naa oodou hagadiilinga, ma de hulu oodou mada i denga duudae o denga manu e hai ai laa oodou sigidaumaha, gai goodou e gaavee gee naa madali mee nei, 4gi iloo ai e goodou bolo go au donu ne daalaa adu muna nei gi goodou, gai gi dee sui ai dagu hagatoo donu hagaheloongoi ange gi Levi, go Tagi o denga hagabuulinga hebagi e hagadaba.#Num 3.11-13 5Dagu hagatoo donu hagaheloongoi ne hai madali ia, se hagatoo donu ange gi de mouli ma de nnoho baba, gai au ne gaavange gi de ia, gai ia ga hagadubu ai au. Gai ia ne madagu i de au aama de madagu i dogu ingoo.#Num 25.12 6Gai ia e agoago mee heohi i dono ngudu, gai e deai donu se mee dee heohi e tala i dono ngudu. Gai ia ne seesee madali au i de baba ma de heohi, gai ne hagadaahuli gee dangada soa mai i olaadeu baubau.
7Tangada haimeedabu gi daohia de iloo mee i ana muna e tala, gai dangada gi gaavee ana muna gi agoago ai, i hiidinga go ia tangada e daalaa muna a Tagi o denga hagabuulinga hebagi. 8Aagai goodou gu hulo gee i de haiava heohi, gai oodou agoago gu hagahaisala dangada soa; goodou gu oha de hagatoo donu hagaheloongoi a Levi, go Tagi o denga hagabuulinga hebagi e hagadaba. 9Gai au ne hai gi hagangadi mee ina goodou ma de hagamaolalo ina goodou i madamada o dangada alodahi, i hiidinga goodou tee daohi agu muna, aagai goodou ne vae dangada i doodou hai hegau i de hainga.”
Judah tee hai hegau i de mee abodonu
10E aha, e dee se Damana daudahi odaadeu alodahi? E aha, tee dahi donu huu Maadua ne haia gidaadeu? Gai gu aha gidaadeu gu oha ai nei de hagatoo donu hagaheloongoi a odaadeu dubuna madagidagi, i taadeu dee daohi denga hagatoo donu i odaadeu magavaa?
11 Judah gu oha delaadeu hagatoo donu. Dahi hegau hakino gee gu hai i Israel ma Jerusalem: dangada o Judah gu hai ma gu hakino gee de mommee dabu o Tagi Maolunga e aloha ai laa, gilaadeu gu hai bodu ange gi denga haahine e daumaha ange gi diinonga gee. 12Gai Tagi Maolunga gi aaua gee mai i daho Jacob, denga hagadiilinga o tangada ne haia de hegau nei, e dee galemu donu dana gaamai dahi sigidaumaha gi Tagi o denga hagabuulinga hebagi!
13Deenei ange dahi mee oodou e hai: goodou e haoli de mommee o ssigidaumaha a Tagi Maolunga i oodou loimada. Goodou e tangi ma de tangi see i hiidinga ia gu dee anga adu gi oodou sigidaumaha, aabe e malangilangi i de kave oodou mee e gaavange. 14Gai goodou e ssili, “Gu aha?” Go hiidinga Tagi Maolunga go ia e hagadonu ai mee i ooluu magavaa ma doo bodu, i doo masavaa goi dama daane ai. Koe tee hai hegau ange gi doo bodu i de mee abodonu, e dee galemu donu go ia doo soa, ma doo bodu ne hai i de hagatoo donu hagaheloongoi.
15E aha, e dee go de Maadua ne haia gooluu gi dahi? De angaanga ma de hagasaalunga ni mee niiana. Gai se aha a de Maadua e ssala? Go denga hagadiilinga dabu.#2.15 Muna Hebrew i kinei e dee iloo danuaa dono hagadoonunga. Deenei ai, goodou dagidiiloo dagodo o oodou lodo, goodou gi dee oohaa de hagatoo donu ange gi doo bodu mai i doo masavaa e dama daane ai.
16E hagadaba Tagi Maolunga, de Maadua o Israel, “Au e kino i de maavae; tangada maavae ange laa gi dono bodu e vaivai donu ia, go Tagi o denga hagabuulinga hebagi e hagadaba. Deenei ai, goodou kana ange dagidiiloo oodou lodo, goodou aude oohaa oodou hagatoo donu.”
Tangada hagailoo o Tagi Maolunga
17Goodou gu hakoso Tagi Maolunga i oodou muna.
Aagai goodou e ssili, “Dee hee demaadeu hai ne hagadalea ai ia?”
Go doodou hagataba, “Dangada alodahi e haia de baubau e danuaa donu huu i mada luu mada o Tagi Maolunga, ia e malangilangi donu i gilaadeu,” aabe go doodou ssili, “I hee iai donu de Maadua o de heohi?”
Currently Selected:
Malachi 2: DBD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
