Filipidara 2
2
Kirisitii dɩbara wur na mɔ̃ Thãgba ɩɩrʋʋnɩ
1Anɩ bɩɛl do na Kirisiti dor gɩrɛ n thɔɔ nɩnɩ bɛ? Dɩ naʋ n ma narɛ bɛ? Dɩ Thu Phuu kuune n hale bɛ? Dɩ bɔ jɩ kpɩɛrɛ na bɔ fʋʋr n hale bɛ? 2Nɩ cʋɛ thale daʋ n hi mar phi, mɔ̃ nɩ‐n hananɩ kpɩɛr bɩɛl, na naʋ ca bɩɛl, nɩ dɔ bɩnɛ n donɩ kha bɩɛl, nɩ hanana dakha kpɩɛr ƴɛ bɩɛl. 3Na‐n cʋʋ thɩ̃ bɩɛllakɛ na dɩbara na kpɩɛrɛ na i ƴaalaˈ, sɩ nɩ dɔ dɩbara jor n cʋʋ nɩ, ʋ na‐n hɩɩn ʋ, mɔ̃ a kɔ̃tɩnɩ a jʋɔ. 4Na‐n ƴaalɛ gɩrɛ na bɔnɩ ʋkhasɔra, ga do gɩrɛ dɔnɩ anɩda dɩbara ga. 5Nɩ hanana ha caakɛ Jeju Kirisiti kɔɔ hananɩ:
6“Kɛkɛkɛrarakɛ bɩɛlla a do na Thãgba,
sɩ aa kɔɔ hɩɩn ɔɔ Thãgba doole dɩɩ do thɩ̃ɛɛkɛ a na fʋnɩ na khɩmɩnɔ kĩkĩkə̃ˈ.
7Sɩ ɔɔ thɛthɛ kɔɔ faa ɔɔbara
sa debi a gba dee dʋʋr,
a hana tomɩr tibil khaa,
dɩ mɔ̃ a debini a do tibil,
8a wurre ɔɔbara a nɩ nũu a dana khir,
kʋkʋ thɩrʋra a khirakɛ ɓoɓo.
9Gɛrra gɩ dɩ Thãgba thʋ̃ ɩɩrʋʋ dɩ do dakpɩɛ,
a hanaa ire dɩɩ kəə iera fɛʋ.
10Dɩ ireelera a hananɩ da‐n do Jeju, na dor nɔɔ,
nɛkhilə fɛʋ thãgbara ƴũ, na thɩɩra, a gbana tɩɛrdara fɛʋ,
na gulẽgaraarɛ,#Eja 45:23
11dɩ delẽbe fɛʋ na caan phasɩ nayɩ:
Jeju Kirisitira dor Kɔ̃tɩn,
dɩ Thãgba Thɩrɛ na ˈlɛr i dʋbɩrɛ.”
Dahɩrɛ dʋʋr thɩɩra
12Mɛ̃ gɩ ɩ̃ omisɔɔkɛ mɩ‐n nanɩ, mɔ̃kɛ nɩ‐n kɔɔ nɩ mɩnɩ nũu wire fɛʋ, na‐n dɔ thɔma anɩ taarara na cʋrɛ na jẽu, ga‐n do bɔɔkɛ mɩ‐n hanɩ kha na nɛrɛ dɩbara ga, sɩ nɩ ka na cʋɛ ga‐n jɔ mɛ̃ bɔɔraakɛ ma hanɩ kha na nɛrɛ bã. 13Gɩdonɩ Thãgba dɔ ʋrɛ n pɩɛrnɩ ƴaalɛ anɩ hara na punone dɩ na‐n cʋʋna gɩrɛ a‐n ƴaalnɩ ga‐n cʋɛ. 14Na‐n cʋɛ thɩ̃ɛ fɛʋ sɩ na‐n ƴɛaˈ, na‐n bana thɩ̃ banaa dakha ga; 15mɛ̃ na ˈlee dɩ paar, na hana sɩ paaraˈ, nɩ do Thãgbaa bɩsãsɔɔkɛ ˈleanɩ sor tɩbɩlaakɛ golonenɩ a kʋɛna dakhaa thɩ̃thɩɩn, kãkɛra nɩ‐n caranɩ dahɩrɛ khaa thɩɩra,#Dət 32:5 16dɩ na‐n ˈlaana yi thɩmɩɩr; thale na dɔ ɩ̃ məbida Kirisitii wi, dɩ ga do mɔlɔ mɩ kɔɔ ca ɩ̃ kɔlɔ̃kɔaˈ, ga do mɔlɔ mɩ kɔɔ do dakha thɔma woaˈ. 17Anɩ ha pɛ dor bonɩ ji thɩ̃ɛɛkɛ nɩ‐n hanɩ Thãgba, sɩ ado gɩ teenanɛ ɩ̃ tɔmɩ̃ n deere ga bonɩ jirəəle dakha, gɩ da marɛ, dɩ gɩ da marɛrakɛ wo na nɛrɛ. 18Nɛrɛ dakha nɩ dɔ ga‐n da nar ɔmɛ̃, dɩ nɛrɛ na mɛrɛ nɩ dɔ ga‐n da sar kha.
Timothe na Epafʋrɔdɩtɩ Filipi dɩɩra
19Mɩ pɛrɛ haar ado Jeju Kɔ̃tɩn tu, kɩɛr na gbe ma thɔ̃ narɛ Timothe, ɩ̃ puno ɩ̃ nɩ anɩ tutugo ɩ̃ faa haar mer. 20Gɩdonɩ ma hana tibilikɛ sɩ‐n ˈlinəni kha ɔɔ kha, kɛ n kpɩɛrna nɩnɩ na haar vʋ̃ʋaˈ. 21Gɩdonɩ tɩbɩla fɛʋ gɩrɛ na bɔ warnɩ dɩbara wɩ‐n ƴaal, sɩ wa‐n ka ƴaal Jeju Kirisitiida ga. 22Nɩ jɩrɛ mɔ̃ jʋʋrɛ kɔɔ nɩnanɩ Timothee tɩɩ bɔ do, dɩ mɔ̃kɛ bɩsaan n hanɩ na ɔɔ thɩ, mɛ̃ a kɔɔ ha na mɛrɛ tutugo bʋɔɔ thɔna. 23Mɩ pɛrɛ haar ɔr ma thɔ̃ dapaara ado mɩ jɩɩ jɩ mɔ̃ thɩ̃ɛ na ha marnɩ. 24Sɩ mɩ hananɛ ha pɛrɛ gel Kɔ̃tɩnna, dɩ mɛrɛɛ thɛthɛ na pɔr le kɩɛr na gbe.
25Mɩ yɩɛrɛ dɩɩ bɔr dɩ ma thɔ̃ nar Epafʋrɔdɩtɩra ɩ̃ omi, kɛ dɔnɩ ʋrɛ sɩ kɔɔ donanɩ kha thɔma, na ʋrɛ sɩ kɔɔ kɛ̃kɛrɛnanɩ kɛ̃kɛrɛ̃ bɩɛl, kɛ dɔnɩ ʋrɛ nɩ kɔɔ thɔnɩ dɩ bul mi. 26Gɩdonɩ anɩ thu fʋʋrɛ ka, dɩ gɩ pɩɛraarɛ dɛr nɩɛrɛraakɛ nɩ nɩɛnɩ ɔɔ khora. 27Sobɔr gɩ, gɩ kɔɔ khʋʋrɛ waa dɩ thɔɔ khir, sɩ Thãgba kɔɔ jɩɩrɛ bʋɔra, sɩ ga do ɔr dɩbara Thãgbara kɔɔ jɩ bʋɔra ga, sɩ mɛrɛɛkɛrakɛ dakha, dɩ mɛ̃ ma hana gbobire na bir na dɛbɩ gbobirera ga. 28Gɛr gɩ mɩ thʋɔnɛ kɔrɔ dɩ mɛ̃ ga da nar mɔ̃ na birni na yɩɩ, gɩ do nɔɔ dakha ɩ̃ gbobi n ba gbe. 29Dɩ nɩ teaa na daʋ vʋ̃ʋ Kɔ̃tɩnɩ tee, na‐n cɔ tibil ca wele. 30Gɩdonɩ Kirisitii thɔ̃ dɔ nɔɔ dɩ danɔ khir, fɩɩʋ sɛra sɩ ɔɔ yi n bu, mɔ̃ a gbanɩ thɔmaakɛ nɛrɛɛ thɛthɛ na kɔɔ punoni a cʋʋ maraˈ, da‐n cʋʋ.
Currently Selected:
Filipidara 2: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
