Mi Nɔnɔle 31
31
Wo Madiannu gyɛ guli nya
(Mi N 25; Wg 2:14; Joz 13:21–22)
1Gakelebale we fe Moizi lɛ yé é léma: ’I Izraɛlnu lé we lɛgi pa Madian munu ma; 2’bɛ zuo yé i dan go lɛ ilé munu va.
3Moizi lé munu lɛ léma: ’Ka munu ma’lɛrɛ gulidanle we ma, yé ’wo go guli dan Madiannu va yé we lé Gakelebale a fe Madiannu ma, wa lɛ sɔɔ. 4’Ka mi wuru soru soru si sunya nya Izraɛl bɛnnu faa do do gi.
5Wo munu si a va Izraɛlnu bɛn gɔnɔ do do gi mi wuru soru soru; munu lé wo ’wo ma’lɛrɛ gulidanle we ma, wa mi baa suiɛdo. 6Moizi bɛn do do gi sunya wuru soru soru pa zia, ’é valé Balebanzan Éléazaa be Finé nya, ’té fɛnu lé wo wo pa é yɛrama Bale bannafɛnu nya, ’é valé bélinu lé wo dére zuoi éé goo, ’té wa a lee. 7Wo nwa Madian ma dérean Gakelebale a fe Moizi lɛ, a yɛrama, yé wo gɔnénu faa gyɛ. 8Wo Madiannu valé wo nwiinzannu gyɛ ékeva, Évi koo, Rékɛm koo, Suu koo, Uru koo, Réba koo, woo lé; wo nwiinzan blɛn soru tɔ lé ke bɛ, yé é ziin wo Béɔɔ be Balaam gyɛ gwɔun nya. 9Madian lomu koo, wolé né kiénénu koo, Izraɛlnu wo si luunu nya, yé wolé winu koo, wolé trubɛnu koo, wolé fuafɛnu faa koo, wo wo si gla nya. 10Wo wolé fla blɛnnu faa valé wolé flanénu faa kyɛ ble. 11Fɛ faa lé wa si gla nya, ’é valé gulizarafɛnu faa, munu valé winu, wa sia, 12yé luunu koo, gulizarafɛnu koo, fɛnu lé wa si gla nya koo, wo go wo nya, Moizi koo, Balebanzan Éléazaa koo, Izraɛlnu faa koo, wo va, ’té wa é nyanale Moab lé fɛna pɛblɛɛna, Juudɛn yuu sɔnɔ, Jériko yara zia.
13Moizi koo, Balebanzan Éléazaa koo, munu nwiinzannu faa koo, wo go wo ’lɛ zia fla gini ma. 14Moizi bli fli sunyanu ’lɛzannu ma, sunya wuru soru soru ’lɛzannu koo, sunya yɔ soru soru ’lɛzannu koo, wo ma. 15É lé wo lɛ léé: Mɛmalé ka lomu faa vo é yuɛmaa? 16Woan Izraɛlnu sia ana yé wo yuɛgi blan Gakelebale lé we kɛlɛle ma Baal‐Péɔɔ lé we nya Balaam dére ta loo? yé ’bɛ lé we maan migyɛgyɛ ’wii Gakelebale lé munu ta loo? 17Sin, ’ka gɔnénénu faa gyɛ, yé lomu faa lé gɔné yia wo va, ’ka wo faa gyɛ; 18naa, blɛnnénu faa lé wo ’ka gɔné dɔɔ lɛ lo, ’ka wo vo é yuɛma kazé nya.
Wo gulizarafɛnu guli
(1 Sam 30:20–25; WP 14:20)
19Yé ’kaa, ’ka vo fla gini ma yi sɔrafié, ka va munu faa lé wo mi gyɛ koo, ka va munu faa lé wo mane mi gale ma koo, ’ka kabo kɛlɛ tegele a yi yaazan valé a yi sɔrafiézan nya, ka valé kalé luunu nya. 20’Kalé varɔnu faa zuru é ziin, fɛnu faa lé wa kɛlɛ wikɔlɛ nya koo, sɔ faa lé wa tan bolikyɛɛ nya koo, fɛ faa lé wa kɛlɛ yili nya koo, ’ka wo faa zuru.
21Balebanzan Éléazaa lé sunyanu lé wo go guli ma, wo lɛ léé: Bélidɔwe lé Gakelebale a vo Moizi va, yee lé ke ’ko: 22Kyan koo, gɔɔlifu koo, zéné koo, foliɛwɔlɛ koo, tini koo, lɛe koo, 23fɛnu faa lé kyɛ ’ka wo blé lo, ’ka wo vɔ kyɛ va wo gibɔle we ma. Naa, fɛnu lé kyɛ a blé, ’ka wo gi bɔ, fɛ kɛlɛ tegele ’yi nya; ’ka wo zuru ’yi nya. 24’Kalé varɔnu zuru yi sɔrafiézan nya yé ka dan kɛlɛ lɛ tegele; ’bɛ zuo, a zi a ka lɛ léé, ka go fla.
25Gakelebale lé Moizi lɛ léé: 26Bii koo, Balebanzan Éléazaa koo, kɔnzannu koo, ’ka gulizarafɛnu nɔnɔ; fɛ lé wa si, munu valé trubɛnu, yee lé. 27’Ka gulizarafɛnu ’ko guli sunyanu lé wo go guli dan lɛ, wo valé munu faa ma. 28Sunyanu lé wo go guli dan lɛ, ’i Bale zé fɛ si wozé fɛnu va, ’bɛ gi léé, dé é a munu nyaoo, dé é a dirinu nyaoo, dé é a sokofale valé ’blanu nyaoo, dé wa wuru fié yɔ soru, ’té Bale zé a do. 29Bé si sunyanu zé va, bé nɔ Balebanzan Éléazaa lɛ Gakelebale zé nya. 30Izraɛlnu zé lé wa nɔ wo lɛ, bé do do si fɛ yɔ fié wɔlɛ vu vu va, munu koo, dirinu koo, sokofale valé ’blanu koo, winu faa koo, woo lé, yé bé nɔ Lévinu lé wo Gakelebale lé sɔkɔn tabin‐é, wo lɛ.
31Moizi valé Balebanzan Éléazaa a kɛlɛ, dére lé Gakelebale a fe Moizi lɛ, a yɛrama.
32Sunyanu lé gulizarafɛnu lé ke lomu valé trubɛnu nya, wo ’léé a ’ko zo: ’bla a baa wuru do yɔ suiɛdo wɔlɛ vu ta sɔrafié, ’é ta lé ’bla wuru soru; 33diri a baa yɔ do wɔlɛ vu ta suiɛdo; 34sokofale a baa yɔ do wɔlɛ vu wuru soru; 35lomu a baa vu ta suiɛdo; wo ’ka gɔné dɔɔ lɛ lo. 36Munu lé wo go guli dan lɛ, wozé gulizarafɛ lɛ do a ’bla baa yɔ sɔraa wɔlɛ sɔraa wuru sɔrafié yɔ soru. 37Wo va ’bla wuru yaa yɔ yaa wɔlɛ vu ta soru a Gakelebale zé nya; 38diri a baa vu ta sɔraa, yé wo va diri yɔ yaa wɔlɛ vu ta fié a Gakelebale zé nya; 39sokofale a baa vu ta soru wuru fié yɔ soru; a va sokofale yɔ yaa wɔlɛ do a Gakelebale zé nya; 40yé mi a baa sɔraa, yé wo va mi yɔ do wɔlɛ vu ta fié a Gakelebale zé nya. 41Fɛan wa tadɔ Gakelebale zé nya, Moizi a nɔ Balebanzan Éléazaa lɛ, fɛan zo lé Gakelebale a fe, a yɛrama. 42Fɛnu lé wa nɔ Izraɛlnu lɛ, ’té Moizi a si gulidanmunu zé va, 43yé é kɛlɛ Izraɛlnu zé nya, yee lé ke ’ko: ’bla a baa yɔ sɔraa wɔlɛ sɔraa, ’é ta lé ’bla wuru sɔrafié yɔ soru; 44diri a baa vu ta sɔraa; 45sokofale a baa vu ta soru ’é ta lé wuru fié yɔ soru; 46mi a baa sɔraa. 47Fɛnu lɛ do lé wa nɔ Izraɛlnu lɛ, dé fɛ a yɔ fié wɔlɛ vu, Moizi a do si a va; dé é a mi nyaoo, dé é a wi nyaoo, é a si wo va, yé é a nɔ Lévi munu lé woo Gakelebale lé sɔkɔn ta bin‐é, wo lɛ, fɛan zo lé Gakelebale a fe Moizi lɛ, a yɛrama.
48Sunya wuru soru nwiinzannu koo, sunya wuru soru ’lɛzannu koo, sunyanu yɔ soru ’lɛzannu koo, wo da Moizi va, 49yé wo lé a lɛ léé: Sunyanu lé ke ko wuo, i wuozannu wo nɔnɔ, yé ko va mi do ’ka so lɛ a ’léé lo. 50Ko faa do do, kyanfɛnu lé ko a ye, ko da wo nya Gakelebale lɛ, blɛ nya; kyanbalenénu koo, bɛmakyannu koo, bɛnwɔlɛmakyannu koo, tɔnégikyannu koo, bɔrɔmakyannu koo, ko da wo nya, léé, ’wo kɛlɛ kolé wenyané ’yibofɛ nya Gakelebale ’lɛ. 51Wo kyanfɛ ’konu faa nɔ Moizi valé Balebanzan Éléazaa lɛ. 52Kyan faa lé sunya wuru soru ’lɛzannu valé sunya yɔ soru ’lɛzannu a nɔ Gakelebale lɛ, balebanfɛ lé wa nwaan Gakelebale lɛ, a nya, éé sikla sian sikla baa sɔraa wuru yaa yɔ sɔrafié wɔlɛ vu. 53Gulizarafɛ lé sunyanu a ye, é vo wo lee. 54Moizi valé Balebanzan Éléazaa, wo kyan si sunyanu wuru soru ’lɛzannu valé sunya yɔ soru ’lɛzannu lee, yé wo go a nya zén‐ékevasɔkɔn gi, we sele dɔ Izraɛlnu gi fɛ nya Gakelebale ’lɛ.
Currently Selected:
Mi Nɔnɔle 31: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
