Mi Nɔnɔle 30
30
Balekunle lé we
(2 BDWS 23:21–23; BWGFZ 5:3–6; Mt 5:33–37)
1Dére faa lé Gakelebale a vo Moizi va, Moizi a fe Izraɛlnu lɛ. 2Moizi we fe Izraɛl bɛnnu nwiinzannu lɛ yé é léé: Dére lé Gakelebale a vo an va, yee lé ke ’ko:
3Dé mian Gakelebale kun, dé ’bɛ kaan lo, dé é Bale ’nyɔɔn léé, é dan we do kɛlɛ lɛ, té ’é dére nɔla lo, naa, dére faa lé é si a ’léé, ’é a lɛ sɔɔ.
4Dé le boroné a tan é ti lé kɔn ’léé yé é Gakelebale kun, dé ’bɛ kaan lo, dé é Bale ’nyɔɔn léé, é dan we do kɛlɛ lɛ, 5alé Gakelebale kunmawe valé Bale ’nyɔɔndére bɛ, dé a ti ana ye, dé a ti ’ka we do si lɛ a ta a zi lo, alé Gakelebale kunmawe bɛ, ’é valé alé Bale ’nyɔɔndére, é a lé é a lɛ sɔɔ; 6naa, dé a ti a gi dɔɔ yian nya yé é ’ka a nyi si lɛ lo, alé Gakelebale kunmawe valé alé Bale ’nyɔɔndére, é ’ka dan kɛlɛ lɛ a ma we do nya lo. Gakelebale é dan a ma we vo lɛ; a ti ’ka a nyi si lɛ lo, azama.
7Dé le bo si faa, yé ’bɛ zuo é Bale kun, dé ’bɛ kaan lo, dé é Bale ’nyɔɔn we do ma, 8yé dé a zana a gi dɔɔ, yé é ’ka we do si lɛ a ta a zi ’bɛ yi nya lo, alé Bale kunmawe valé alé Bale ’nyɔɔndére lé é a fe bɛ, é a lé ’é a lɛ sɔɔ. 9Naa, dé a zana a gi dɔɔ yian nya yé é ’ka a nyi si lɛ lo, ’é alé Bale kunmawe valé alé Bale ’nyɔɔndére yi ga, yé Gakelebale é dan a ma we vo lɛ.
10Dé gyɛzarale léé, dé le bɔrale léé, dé é Bale kun, dé ’bɛ kaan lo, dé é Bale ’nyɔɔn weowean ma, é a lé é a lɛ sɔɔ.
11Dé le do a é zana lé kɔn ’léé, dé é Bale kun, dé ’bɛ kaan lo, dé é Bale ’nyɔɔn 12yé dé a zana a gi dɔɔ, dé ’bɛ ’ka we do si lɛ a ta a zi lo, yé é ’ka a yi ga lɛ lo, alé Bale kunmawe faa valé alé Bale ’nyɔɔndére faa, é a lé é wo lɛ sɔɔ. 13Naa, dé a zana a gi dɔɔ yian nya yé é wo yi ga ’bɛ yi nya, alé Bale kunmawe faa valé alé Bale ’nyɔɔndére faa bɛ, wo ’ka dan kɛlɛ lɛ a ma we do nya lo. Gakelebale é dan a ma we vo lɛ. A zana ’ka a nyi si lɛ lo, azama. 14A se a a zana lɛ léé, ’é na lé Bale kunle faa valé Bale ’nyɔɔnlenu faa lé é a kɛlɛ ébo kɛlɛle kiéné we ma bɛ, ’é a yi ga; yé a se a a lɛ léé, ’é a nyi si. 15Naa, yi kenu giéle nya, dé a zana ’ka we do si lɛ a ta a zi lo, ’bɛ gi lé, alé Bale kunmawe faa valé alé Bale ’nyɔɔndére faa bɛ, é wo nyi si. É a gi dɔɔ yian nya, yé é ’ka we do si lɛ a ta a zi lo, azama. 16Naa, yi lé é a gi dɔɔ a nya, dé ’bɛ gié yé ’bɛ zuo é a yi ga, a na lé wenyané é dan dɔ lɛ a nwiin.
17Bélidɔwenu lé Gakelebale a nɔ gɔné valé é na zé nya, ’é valé blɛnzan lé é ke le boroné nya yé é a é ti lé kɔn ’léé, yee valé é ti zé nya, yee lé ke bɛ.
Currently Selected:
Mi Nɔnɔle 30: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
