Mi Nɔnɔle 27
27
Lomu lé zarafɛ lé we
(Mi N 36; Joz 17:3, 4)
1Jozɛfu be Manasé lé ke Manasé kulu gi mi nya, a be Makii be Galaad be Éfɛɛ be Sɛlofesad lunu lé ke Makla koo, Ogla koo, Milka koo, Tiisa koo, wo nya. 2Lomu ’ko da Moizi koo, Balebanzan Éléazaa koo, minwiinzannu valé munu faa koo, wo va, zén‐ékevasɔkɔn ’léé. Wo léé: 3Ko ti ga bwi gi; Koré lé palu lé wo nwa Gakelebale ma, é ’ka wo va lo, naa, alé wenyané ma lé é ga, yé alé négɔné do kpen ’ka lo. 4Mɛmalé wo ko ti tɔ sié é gɔnɔlamunu vaa? Ko ti lé négɔné ’ka lo, ’bɛlé we ma lé wa kɛlɛɛ? ’Ka kozé tɛrɛ nɔ ko ti bwenu va.
5Moizi go we ’ko laa lɛ Gakelebale lee. 6Yé Gakelebale lé Moizi lɛ léé: 7Sɛlofesad lunu lé we a néné. ’I wozé fɛna nɔ wo ti bwenu va, yé ’i wo ti zarafɛ nɔ wo lɛ. 8Bé fe Izraɛlnu lɛ léé, dé gɔné do ga yé alé négɔné ’ka vo lɛ a pa gi lo, ’ka a zarafɛ nɔ a lu lɛ. 9Dé a lu do kpen ’ka lo, ’ka a zara nɔ a bwenu lɛ. 10Dé a bwe do kpen ’ka lo, ’ka a zarafɛ nɔ a ti bwenu lɛ. 11Dé a ti bwenu ’ka lo, ’ka a zara nɔ abo lé mi do lɛ wo gɔnɔ gi, yé é kɛlɛ ’bɛzé nya. We ’ko ’é kɛlɛ Izraɛlnu lé bélidɔwe do nya, yee valé wolé tawolawe nya, Gakelebale dérean fe Moizi lɛ, a yɛrama.
Jozué kɛlɛ Moizi paizan nya
(Fw 29:38–46; Ézék 46:11–15)
12Gakelebale lé Moizi lɛ léé: ’I vɔ Abarim gɔ ’ko nwiin, yé tɛrɛ lé maa a nɔ Izraɛlnu lɛ, yé bé nagini. 13I dan a ye lɛ i yuɛ nya é pla, naa, bii é ziin, i dan go lɛ i tranu va, bélé fɛan zo lé i bwe Arɔn go wo va, a zo. 14Ka an lɛgama Tisɛn bwi la, munu lé wesia bléyi va, yé ka ’ka an kɛlɛ lɛ blɛn wo yuɛ gi ’yi lé we ma lo, azama. ’Yinu ’ko, wesia ’yinu lé ke Kadɛs, Tisɛn bwi la, wo lé.
15Moizi lé Gakelebale lɛ léé: 16Gakelebale, mi faa lélinu lé Bale, ’é mi do dɔ mununwiinzan nya ma, 17’té éé goo, ’té éé dan wo yuɛ va, ’té éé goo wo nya, ’té éé dan wo nya, léé, té Gakelebale lé munu é vo bélé ’blanu lé wo tabinzan ’ka lo, wo zo lo.
18Gakelebale lé Moizi lɛ léé: Nɛn be Jozué lé Léli ke a gi, bé si, yé ’i bɛ pla a ta. 19Bé dɔ Balebanzan Éléazaa valé munu faa ’lɛ, yé ’i bélidɔwe nɔ a lɛ wo faa yuɛ va. 20A se a bii lɛ fɛan zo, bé se kɛlɛ a lɛ a zo, léé, Izraɛlnu faa ’wo tɔné dɔ a lɛ. 21É a lé é go Balebanzan Éléazaa va, yé ’bɛ é dan alé wenu laa lɛ urim lee Gakelebale ’lɛ, yé ’bɛ é dan a ma we fe lɛ, yé Jozué koo, Izraɛl munu faa koo, wo dan go lɛ Éléazaa dére ta, yé wo dan da lɛ a dére ta.
22We lé Gakelebale a fe Moizi lɛ, é a kɛlɛ. É Jozué si yé é a dɔ Balebanzan Éléazaa valé munu faa ’lɛ. 23É ’é bɛ pla a ta, yé é wenu pla a lɛ, fɛan zo lé Gakelebale a fe a lɛ Moizi lɔlu nya, a zo.
Currently Selected:
Mi Nɔnɔle 27: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
