Mi Nɔnɔle 13
13
Wo mi vu ta fié pa zia Kanaan tɛrɛ naginile we ma
(2 BDWS 1:19–25)
1Gakelebale lé Moizi lɛ léé: 2’I munu nwunvɔ, ’wo go Kanaan tɛrɛ lé maa a nɔ Izraɛlnu lɛ, a naginile we gi. ’I wo si wo tranu gɔnɔ gi do do, ’té wo faa a munu nwiinzannu nya. 3Moizi wo nwunvɔ léé, ’wo si Paran bwi la yé ’wo go Kanaan tɛrɛ la Gakelebale dére ta; munu ’konu faa a mi nwiinzannu nya.
4Wo tɔnu lé ke ’ko:
Rubɛn gɔnɔ gi, Zakuu be Samua lé.
5Siméɔn gɔnɔ gi, Oori be Safat lé.
6Juda gɔnɔ gi, Jéfuné be Kalɛb lé.
7Isakaa gɔnɔ gi, Jozɛfu be Jigal lé.
8Éfraim gɔnɔ gi, Nɛn be Oozé lé.
9Bɛnjamɛn gɔnɔ gi, Rafu be Palti lé.
10Zabulɔn gɔnɔ gi, Sodi be Gadiɛl lé.
11Jozɛfu gɔnɔ gi, Manasé gɔnɔ gi, Suzi be Gaadi lé.
12Dan gɔnɔ gi, Gémali be Amiɛl lé.
13Azɛɛ gɔnɔ gi, Mikaɛl be Sɛtuu lé.
14Néfitali gɔnɔ gi, Vofisi be Nasibi lé.
15Gad gɔnɔ gi, Maki be Géuɛl lé.
16Munu lé Moizi wo nwunvɔ tɛrɛ naginile we ma, wo tɔnu lé ke bɛ. Moizi Nɛn be Oozé tɔ do pa Jozué.
17Moizi wo nwunvɔ Kanaan tɛrɛ naginile we ma. É lé wo lɛ léé: ’Ka gié ’ko, yirinwana bɛyilazia, yé ’ka gɔ gié. 18Ka dan tɛrɛ ye lɛ fɛan zo lé é ke, a zo, yé munu lé wo ke a ta, dé wa plɛplɛɛ? dé wa tɔɔtɔɔ? dé wo ’léé a kiénéé? dé wa kiɛree? 19Tɛrɛ lé wo ke a ta, dé é a kaa? dé é a é zimaa? dé é a naanéé? Flanu lé wo ke a ta, dé wa kaa? dé wo zi a é plaa? dé gɔrɔ a wo zii? 20Dé a tɛrɛ boen a kaa? dé a nyɔnɔ aa? dé a nyɔnɔ ’ka loo? dé yilinu anaa? dé yilinu ’ka ana loo? ’Ka bli tadɔ plɛplɛ yé ’ka da yee tɛrɛ la fɛnu nya. É a wolé dɔrɔporo vininzannu sobléyi nya.
21Wo gié yé wo tɛrɛ nagini. Wa péli sia Tisɛn bwi la fɔɔ yé wo bɔ Réob, Amat lé zi ta. 22Wo gié yirinwana bɛyilazia, yé wo go fɔɔ yé wo bɔ Ébrɔn; ana lé Aiman koo, Sésai koo, Talmai koo, wo ke. Wa Anak?-?munu nya. Wo Ébrɔn fla pa yé ’bɛ zuo lɛɛ sɔrafié wo Soan pa Éjipiti tɛrɛ la. 23Wo go fɔɔ yé wo bɔ Esikɔl gɔ worona, ana lé wo dɔrɔ bɛ do so, ’té a pan a a ma. Mi fié go a nya, ’té é a é dunle yili ma wo méléna. Wo grénadéporo valé bɔrɔyiliporo so yé wo go wo nya é ziin. 24Wo fɛkona tɔ pa Esikɔl gɔ worona, dɔrɔporo pan lé Izraɛlnu a bɔi ana, azama.
25Wo vo tɛrɛ naginina yi yɔ fié wuo, yé wo nɔla wo pa gi. 26Wo bɔ aan wo, wo da Moizi valé Arɔn va, woo valé Izraɛlnu faa lé é ke é zénle ékeva Kadɛs lé ke Paran bwi la ana bɛ, wo va. Wo ’wo sina glewo wo lɛ, woo valé zén‐ékevamunu faa lɛ, yé wo tɛrɛ ’ko la fɛnu nagɔɔn wo lɛ.
27Wo sina gle lé wa wo Moizi lɛ, yee lé ke ’ko: Ko go tɛrɛ lé i ko nwunvɔ ana, a ta. Webozen lé, é a tɛrɛ nyɔnɔzan nya. Ana fɛnu lé ke ’ko. 28Naa, tɛrɛ ’ko la munu a plɛplɛ; wolé flanu a blɛn, yé gɔrɔ a é bole wo zi; yé ko Anak munu ye ’bɛna. 29Amalɛk munu éé nyanaan yirinwana bɛyilazia. Étimunu koo, Jébusimunu koo, Amorémunu koo, woo nyanaan gɔ nwiin, yé Kanaanmunu éé nyanaan wɛyi sɔnɔ, é valé Juudɛn yuu bɛ fiénu ta.
30Munu a gun gyɛna Moizi ma, yé Kalɛb wo tadɔ. Yé é léé: ’Ka nwa, kaa go tɛrɛ ’ko si; kaa dan kɛlɛ lɛ a ’wuovolɛzannu nya. 31Naa, munu lé wo go wo nya ana, wo léé: Ko ’ka bɔa gole lɛ munu ’ko va lo; wo plɛplɛ mini ko ta, azama. 32Yé tɛrɛ lé wa nagini, wo alé we zuo fe Izraɛlnu lɛ. Wo léé: Tɛrɛ lé ko gié ana a naginile we ma, é a tɛrɛ lé é ’é tamunu gya, a nya. Munu faa lé ko wo ye ana, wa mi grɔgrɔnu nya; 33yé ko mi pɔrɔpɔrɔ ye ’bɛna, Anak munu lé; bɛn pɔrɔpɔrɔ glaliglali lé ke wo nya; ko kobo ye bélé gangannu zo kobo yuɛ gi, yé wo ko ye ’bɛ zo é ziin.
Currently Selected:
Mi Nɔnɔle 13: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
