Lévinu 11
11
Wi zinnu valé wi naanénu
(2 BDWS 14:3–21; Kw 10:11–16)
1Gakelebale we fe Moizi valé Arɔn lɛ yé é lé wo lɛ léé: ’Ka fe Izraɛl lé nénu lɛ léma: 2Tɛrɛlawinu faa va winu lé ka dan a ble lɛ, wo lé ke ’ko: 3Sɔnéwɔlɛwi faa lé wo sɔnéwɔlɛ blan ke, ’té woo puaan fɛ nya, ’ka wo ble. 4Naa, a lɛ do lé ’bɛnu éé puaan, té ka ’bɛnu ble lo, yé a lɛ do lé wo sɔnéwɔlɛ blan ke, té ka ’bɛnu ble lo. ’Bɛ zo lé, nyɔgɔmé lé éé puaan fɛ nya, yé a sɔnéwɔlɛ blan ’ka lo, té ka ’bɛ ble lo; ’ka ’bɛ ye fɛ tiridɔle nya. 5Wi lé wa laama daman, éé puaan fɛ nya, naa, é ’ka sɔnéwɔlɛwi nya lo, té ka a ble lo; ’ka ’bɛ ye fɛ tiridɔle nya. 6Té ka gwené ble lo; éé puaan fɛ nya, naa, é ’ka sɔnéwɔlɛwi nya lo; ’ka ’bɛ ye fɛ tiridɔle nya. 7Té ka suru ble lo; é a sɔnéwɔlɛwi nya, naa, é ’ka puaan fɛ nya lo; ’ka ’bɛ ye fɛ tiridɔle nya. 8Té ka wo wi ble lo, té ka mane wo gale ma lo; ’ka wo ye fɛ tiridɔle nya.
9’Yi va winu faa lé ka dan wo ble lɛ, wo lé ke ’ko: fɛnu faa lé wo lalagan valé wo ma kɔlɛ ke, dé wa wɛyi vaoo, dé wa yuu vaoo, ’ka wo ble. 10Naa, fɛ faa lé éé kɔɔan ’yi va, fɛ faa lé ke é yuɛma ’yi va, dé wa wɛyi vaoo, dé wa yuu vaoo, ’té wo lalagan valé wo makɔlɛ ’ka lo, 11’ka wo ye fɛ naané nya; té ka wo wi ble lo; ’ka wo gale ye fɛ naané nya. 12Fɛ faa lé ke ’yinu va, ’té wo lalagan valé wo makɔlɛ ’ka lo, ’ka wo ye fɛ naané nya.
13Mianénu va mianénu lé ka dan wo ye lɛ fɛ naané nya, ’té ka ’ka wo blé lo, wo lé ke ’ko: gola koo, vaa koo, wɛyi la gola koo, woo lé; 14kwa koo, plén valé é bɔlunu koo, 15kanwéi valé é bɔlunu faa koo, 16miané lé duo koo, kurubéli koo, ’yilablaséi koo, gyɛɛnplén valé é bɔlunu koo, 17banblégunbɛ koo, burulu valé pɔrɔkurubéli koo, 18pɔblekuu koo, valusanbla valé ’yilagamian koo, 19bwibalo koo, gyɛɛsunani valé é bɔlunu koo, daliwé koo, ban koo, woo lé. Té ka wo ble lo.
20Fɛ kénéné faa lé woo sié, ’té woo tawoo ’wo mɛn ziɛn ta, ’ka wo ye fɛ naané nya. 21Naa, fɛ kénénénu lé woo sié, ’té woo tawoo ’wo mɛn ziɛn ta bɛ, wo va fɛnu lé ka dan a ble lɛ, wo lé wo gane bɔra wo ta loru, ’té woo fɔrɔan tɛrɛ ta, woo lé. 22Wo lé ka dan wo ble lɛ, wo lé ke ’ko: flɛlɛ?-?gaan koo, poongaan koo, see koo, nyɔnɔsibwɛɛ koo, wo bɔlunu koo, woo lé. 23A pɔnénu lé woo sié, ’té woo tawoo ’wo mɛn ziɛn ta, ’ka wo faa ye fɛ naané nya. 24Wo dan ka tiri dɔ lɛ; dé miomian mane wo gale ma, azan tiri dɔ fɔɔ nyanadi, 25yé dé miomian wo gale sia, ’élé sɔnu zuru yé a tiri é dan vo lɛ é dɔle fɔɔ nyanadi.
26Sɔnéwɔlɛwi faa lé wo sɔnéwɔlɛ blan ’ka lo, ’té wo ’ka puaan fɛ nya lo, ’ka wo ye fɛ tiridɔle nya; dé miomian mane wo ma, a tiri é dan dɔ lɛ. 27Winu faa lé woo tawoo ’wo bɛ la, ’ka wo ye fɛ tiridɔle nya; dé miomian mane wo gale ma, azan tiri dɔ fɔɔ nyanadi, 28yé dé miomian wo gale sia, ’élé sɔnu zuru yé a tiri é dan vo lɛ é dɔle fɔɔ nyanadi. ’Ka wo ye fɛ tiridɔle nya.
29Wi kiénénu lé woo tawoo tɛrɛ va, wo va winu lé ka dan wo ye lɛ fɛ tiridɔle nya, wo lé ke ko: wi lé wa laama top koo, ’moné valé wɔrɔ koo, wo bɔlunu koo, 30’téli koo, yolu koo, kuli koo, toroko koo, kana koo, woo lé. 31Wi kiénénu faa va, ’ka wo ye fɛ tiridɔle nya. Dé miomian mane wo gale ma, a tiri é dan dɔ lɛ fɔɔ nyanadi. 32Fɛ faa lé wo mane wo gale ma, wo tiri dɔ; dé yilifɛ léé, dé sɔ léé, dé wikɔlɛ léé, dé bɔlɔ léé, dé fɛofɛan woo fɛ kɛla a nya, dé ’bɛ léé, ’ka wo vɔ ’yi va, yé ’wo vo ’wo tiri nya fɔɔ nyanadi; a zuo a gi é dan bɔ lɛ. 33Dé a vafɛ dia tɛrɛbɔ ta, a gifɛ faa tiri dɔ, yé ka dan bɔ ’wii lɛ. 34Blefɛ faa lé a ’yi zén a ta, a tiri dɔ; dé é a minifɛofɛan nya, dé é a bɔobɔan gi, a tiri dɔ. 35Fɛ faa lé wo gale vafɛ do dia a ta, a tiri dɔ; dé é a ’furu nyaoo, dé é a guni nyaoo, ka dan wo ’wii lɛ; wo tiri dɔ yé ka dan wo ye lɛ fɛ tiridɔle nya. 36’Yibɔna valé ’yiguru lé, ’yi kiɛre ke a gi, ’bɛnu saa gi é dan vo lɛ é bɔle; naa, mi lé é mane wo gale ma, a tiri dɔ. 37Fɛwɔlɛ lé ka dan a vɔ lɛ, dé wo gale vafɛ do dia ’bɛ ta, a gi é dan vo lɛ é bɔle duowo; 38naa, dé wo fɛwɔlɛ ’ko vɔ ’yi va turu yé wo gale vafɛ do dia ’bɛ ta, ’ka ’bɛ ye fɛ tiridɔle nya. 39Dé ka blewi do ga, mi lé é mane ’bɛ gale ma, ’bɛzan tiri é dan dɔ lɛ fɔɔ nyanadi; 40mi lé é a gale ble, ’élé sɔnu zuru yé a tiri é dan vo lɛ é dɔle fɔɔ nyanadi, yé mi lé é a gale sia, ’élé sɔnu zuru yé a tiri é dan vo lɛ é dɔle fɔɔ nyanadi.
41Wi kénénénu faa lé woo giéan tɛrɛ va, ’ka wo ye fɛ naanénu nya; té ka wo ble lo. 42Wi kénénénu faa lé woo giéan tɛrɛ va, dé wo tawo ’wo plɛ laoo, dé wo tawo ’wo mɛn ziɛn taoo, dé wo tawo ’wo mɛn kiɛre laoo, té ka wo do kpen ble lo; naa, ’ka wo ye fɛ naanénu nya. 43Wi kénénénu lé woo giéan tɛrɛ va bɛ, té kabo kɛlɛ naané wo nya lo; té kabo gi sɛrɛ wo nya lo, té kabo tiri dɔ wo nya lo. 44Naa, maa a Gakelebale, kalé Bale nya; maa a sauun, amalé ’ka kabo pa é yɛrama, yé ’ka kɛlɛ sauun; té ka kabo gi sɛrɛ wi kénénénu faa lé woo giéan tɛrɛ va bɛ, wo nya lo. 45Naa, maa a Gakelebale lé é ka si Éjipiti tɛrɛ la, a nya, kɛlɛle kalé Bale nya we gi, ’bɛ valé ka kɛlɛle sauun we gi lé maa kɛlɛ; naa, maa a sauun.
46Winu koo, mianénu koo, fɛ yuɛmalenu lé woo giéan ’yi va koo, fɛ yuɛmalenu lé woo giéan tɛrɛ va koo, wolé we lé ma a fe ka lɛ, yee lé ke bɛ. 47Yee lé a tiri ke koo, yee lé a tiri ’ka lo koo, winu lé wa blé koo, winu lé wo ’ka wo blé lo koo, kalé a gi dɔɔle we ma lé maa wolé we fe ka lɛ.
Currently Selected:
Lévinu 11: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
