Wepélisiananu 49
49
Jakɔb é benu drɔɔ vo balelawefele nya
(2 BDWS 33)
1Jakɔb é benu laa yé é léé: ’Ka zén ékeva, yé we lé é dan bɔ lɛ ka ma é voéla, maa dan a fe lɛ ka lɛ.
2Jakɔb benu, ’ka zén ékeva yé ka tɔné dɔ;
’Ka tɔné dɔ ka ti Izraɛl lɛ.
3Rubɛn, bii ɛ ke anlé né vininzan nya;
Bii a anlé plɛplɛ nya, anlé pɛniɛ la né vininzan lé i nya.
I tɔ mini, yé ilé plɛplɛ mini;
4Naa, bii a yuɛgiblanzan nya bélé wɛyi zo; i ’ka dan kɛlɛ lɛ mi vininzan nya lo.
Naa, i vɔ i ti lé yialafɛ ta,
Iin, i vɔ anlé yialafɛ ta, yé bé tiri dɔ, azama.
5Siméɔn valé Lévi a bwe valé zuané nya.
Wolé gwɔunnu a migyɛfɛ naanénu nya.
6We lé é dɔ wo ’wuo gi, té anbo vɔ ’bɛ gi lo.
Dé wo zén ékeva, té an léli é kɛlɛ wo nya do lo.
Naa, wo munu gyɛ ’wolé bliflile zi;
Wo gi san ’wobo ma yé wo dirigɔnénu ganezi miinnu bɔi.
7Wolé bliflile a é nyané amalé ’wo bale pa wo ma ma;
Wo wɛwɛ a, yé wo bli ta a plɛplɛ,
Amalé maa dan wo kini lɛ ékema Jakɔb va,
Yé maa dan wo sɔɔla lɛ Izraɛl méléna.
8Bii, Juda, i bwenu é dan i tɔ zin fe lɛ;
I bɛ é dan dɔra lɛ i nyanézannu nwun zi;
I ti benu é dan dia lɛ ’wo bli la i lɛ;
9Juda a bélé golizra boroné lé
É si ’élé wi gyɛna, a zo; an beoo an be!
Éé gane plin‐an, yé éé yian bélé golizra zo,
Bélé golizrada zo; de ɛ dan a nwa lɛɛ?
10Plaminwiin soowolivwii ’ka dan si lɛ Juda lee pelo,
Plaminwiin yili ’ka da si lɛ a gane worona lo
Fɔɔ yé Siilo é da, ’bɛ gi léé, mi drɔɔ,
Yé munu a lɛdɔma.
11É dan élé sokofale polu dɔ lɛ dɔrɔyili ma;
É dan élé sokofaleda lé né polu dɔ lɛ dɔrɔyili zimanu ma;
É dan élé varɔ zuru lɛ dɔrɔ va,
É dan élé sɔ zuru lɛ dɔrɔporoyi sɔɔn va.
12Dɔrɔ é dan a yuɛ tana lɛ;
Yé a suiɛ é dan kɛlɛ lɛ fu dirinyɔyi nya.
13Zabulɔn é dan nyana lɛ wɛyi sɔnɔ,
Fɛana lé ’yitagoronu éé dɔa, é dan nyana lɛ ana,
Yé a glɛ é dan soi lɛ yé é bɔ Sidɔn ma.
14Isakaa a bélé sokofale plɛplɛ zo;
Éé yiaan winu lé kɔn gi.
15É a ye léé, flinle a é zima
Yé ana tɛrɛ a é zima,
Amalé éé tuaan kɔné dɔle é nwiin we ma,
Yé é vagɔɔli banwole nyi sié.
16Dan é dan élé munu lé we ble lɛ
Bélé Izraɛl bɛn do zo.
17Dan é dan kɛlɛ bélé méné zo zi ta;
É dan kɛlɛ lɛ bélé ménénwunnu zo zi kiéné ta,
’Té éé suiɛ dɔa wisoo gane tɛn ma
Atazan diale é zuozia we gi.
18Oo, Gakelebale, an bli a a lɛ léé, i dan an béli lɛ.
19Munu lé gulidanfɛnu ke wo lee, wo dan guli dan lɛ Gad va;
Naa, é dan wo kele lɛ, yé é wo zuo bin.
20Azɛɛ é dan fɛblele zima kɛlɛ lɛ
Yé é dan minwiinmunu lé fɛ néné kɛlɛ lɛ.
21Néfitali a bélé vɔlɛ zo éboma;
Éé dére néné fé.
22Yili lé a poro éé baan di, Jozɛfu a a bɛ zo;
Yili lé a poro éé baan di, ’té é a ’yi sɔnɔ, é a bélé a bɛ zo;
A bɛnu éé nwaan gɔrɔnu ta loru.
23Wa blifliwe kɛlɛ; wo sawɔlɛ vuli a va;
Sadunmunu a zuo bin, a za nya ’wo gi.
24Naa, alé sa vo plɛplɛ,
Naa, Jakɔb lé Bale plɛplɛ,
Mitabinzan Bale, Izraɛl lé Gɔlɛ,
A bɛ ɛ Jozɛfu bɛ dɔ plɛplɛ.
25I ti lé Bale é dan bɔ lɛ i va,
Plɛplɛfaazan Bale lé zin zi, é dan i drɔɔ vo lɛ;
É dan i drɔɔ vo lɛ lagi loru drɔɔ vole nya;
É dan i drɔɔ vo lɛ ’yi wuo drɔɔ vole nya;
É dan i drɔɔ vo lɛ nyɔ valé bɔn drɔɔ vole nya;
26Anlé i drɔɔ vole mini an yaamunu lé an drɔɔ vole ta,
Fɔɔ yé é bɔ gɔnu lé wo ’ka zanaan monomono lo, wo nwiin.
Drɔɔ vole ’konu faa ’é vo Jozɛfu nwiin;
Mi lé é kɛlɛ mi blɛn nya é bwenu méléna, yee ɛ nwiin lé é vo.
27Bɛnjamɛn a bélé glau lé, éé mi wi kinié ékema, a zo.
Wi lé é a gyɛ, éé a blé bladi,
Wi lé é a ye, éé a gulian nyanadi.
28Izraɛl bɛn vu ta fié lé ke bɛ; ’bɛ zo lé wo ti wo drɔɔ vo. A yara a lé wo drɔɔ é vo fɛan zo do do, a zo lé é wo drɔɔ vo.
Jakɔb gale
29’Bɛ zuo é lé wo lɛ léé: An dan go lɛ anlé munu va. ’Ka an pa an tinu va gɔmaguru lé ke Et mi Éfrɔn lé féi, a gi. 30Yee lé é ke Makipéla tɛrɛ la, Mamré yara zia, Kanaan tɛrɛ la. Tɛrɛ lé Abraam a lɔ Et mi Éfrɔn lee ézé mipana nya, yee lé. 31Ana lé wo Abraam valé é na Sara pa; ana lé wo Izak valé é na Rébéka pa; ana lé an Léa pa. 32Féi valé gɔmaguru lé ke ana, Abraam wo lɔ Et benu lee.
33Jakɔb nyaa aan wo é benu bélidɔle nya, é ’é gane wɔra ’é va ’élé yialafɛ ta, yé a lɛbo yé é go élé munu va.
Currently Selected:
Wepélisiananu 49: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
