Wepélisiananu 48
48
Jakɔb Jozɛfu be fiénu drɔɔ vo
(1 MNzfs 5:1–2; Joz 14:4)
1We ’konu zuo, wo da a fe lɛ Jozɛfu lɛ léé: Gyɛ a i ti ma. Yé yee valé é be fiénu go; Manasé valé Éfraim lé. 2Wa dale fe Jakɔb lɛ yé wo lé a lɛ léé: Bé ye, i be Jozɛfu a dana i va. Yé Izraɛl kwa kuli yé é nyana élé yialafɛ ta.
3Jakɔb lé Jozɛfu lɛ léé: Plɛplɛfaazan Bale bɔra an yuɛ va Luz, Kanaan tɛrɛ la, yé é an drɔɔ vo. 4É lé an lɛ léé, ’é dan an fan lɛ, yé ’é an kɛlɛ di. Yé ’é dan an kɛlɛ lɛ bɛn gɔnɔ kiɛre nya. ’É dan tɛrɛ ’ko nɔ lɛ an kulunu lɛ an zuo, yé é vo wozé nya lɛɛfaama. 5Sin, i be fié lé bé yaa Éjipiti tɛrɛ la an dale i va ’lɛ, wo dan kɛlɛ lɛ anzé nya. Éfraim valé Manasé é dan kɛlɛ lɛ anzé nya bélé Rubɛn valé Siméɔn zo. 6Naa, i nénu lé i wo yaa wo zuo, ’bɛnu ’é vo izé nya. Wo dan wo laa lɛ ’wo bwenu tɔ nya wolé zara we gi. 7An sile Padan zuo, Rasɛl ga zia an sɔnɔ, Kanaan tɛrɛ la, Éfrat punma. Ana lé maa a pa, Éfrat lé wa laama kyɔ Bɛtléɛm, alé zi ma.
8Izraɛl Jozɛfu benu gini yé é léé: 9Denu lé ke koo? Jozɛfu lé é ti lɛ léé: An benu lé, Bale wo nɔ an lɛ ’ko, wo lé. Izraɛl léé: ’I wo bié an sɔnɔ yé maa wo drɔɔ vo ma. 10Izraɛl a é kwa, amalé a yuɛ va gunu a; é ’ka fɛna yé é dɛrɛ lo. Yé Jozɛfu wo bié a sɔnɔ. Izraɛl wo tuu gyɛ, yé é pwɛpwɛ vɔ wo ma. 11Izraɛl lé Jozɛfu lɛ léé: É ’ka an gi léé, maa dan i yara ye lɛ é dɛrɛ lo, yé bé ye, Kazambale ilé nénu nagɔɔn an lɛ. 12Jozɛfu wo si é ti gane la, yé é dia é bli la tɛrɛ va a ’lɛ. 13’Bɛ zuo Jozɛfu né fiénu si; é Éfraim si é bɛyi nya yé é go a nya Izraɛl bɛbolazia, yé é Manasé si é bɛbo nya yé é go a nya Izraɛl bɛyilazia, yé é wo bié a sɔnɔ. 14Izraɛl é bɛyi soi, yé é a pla a voélazan Éfraim ’wuo la, yé é bɛbo pla Manasé ’wuo la, dɔlé ’té Manasé ɛ ke né vininzan nya; é bɛ pla wo ta a zo ’ébo yuɛ va. 15É Jozɛfu drɔɔ vo yé é léé: Bale lé, an tinu Abraam valé Izak tawo a yuɛ va, ’té é ke Bale lé é an pa an yaabléyi va fɔɔ kyɔ, a nya, 16’é valé lanje lé é an si wenaané faa gi, ’wo né ’konu drɔɔ vo ma. ’Wo wo laa an tɔ nya ma, ’é valé an tinu Abraam valé Izak tɔ nya ma. Yé ’wo fan, yé ’wo kɛlɛ di tɛrɛ ’ko la ma. 17Jozɛfu a ye aan wo léé, é ti é bɛyi pla Éfraim ’wuo la, é ’ka sɔ lɛ a lɛ lo. É kun é ti bɛ ma, a sile Éfraim ’wuo ta we gi yé é go a nya Manasé ’wuo ta. 18Yé Jozɛfu lé é ti lɛ léé: An ti, té bé kɛlɛ ’bɛ zo lo. A vininzan lé ke ’ko. ’I bɛyi pla ’bɛ ’wuo ta. 19A ti ’ka a nyi si lɛ lo, yé é léé: Maa a gi dɔɔoo dɔɔ, an be. Yee é ziin é dan kɛlɛ lɛ bɛn do nya, yee é ziin é dan kɛlɛ lɛ blɛn; naa, a zuané kɛlɛle blɛn é dan mini lɛ a ta, yé ’bɛ kulu é dan kɛlɛ lɛ bɛngɔnɔ di nya. 20’Bɛ yi la é wo drɔɔ vo yé é léé: Izraɛl munu é dan munu drɔɔ vo lɛ ka tɔ nya. Wo dan munu drɔɔ vo lɛ a fele nya léé: Bale ’é i pa bélé fɛan zo lé é Éfraim valé Manasé pa, a zo. Yé é Éfraim dɔ Manasé ’lɛ.
21Izraɛl lé Jozɛfu lɛ léé: Maa a dana ga lɛ. Kazambale é dan kɛlɛ lɛ ka va, yé é dan go lɛ ka nya ka tinu lé tɛrɛ la é ziin. 22Maa dan izé nɔ lɛ bélé i bwenu zé zo, yé maa izé taa pa. Tɛrɛ lé maa a si Amoré munu lee anlé gwɔun valé anlé sa nya, yee lé maa izé taa pa a nya.
Currently Selected:
Wepélisiananu 48: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
